皇馬事隔接近兩年半終再次勝出西班牙國家打吡 [皇馬2:0巴塞賽後感] 精選

繼上次小編突破做下歐聯賽後感之後，呢個禮拜就咁啱有西班牙國家打吡，不妨又玩下突破罕有地做下西甲嘅賽後感，加上今次仲要係西甲盛事，連C朗都翻翻黎包廂睇，我地今次就轉一轉台黎西甲啦！
先講下已經好耐無贏過國家打吡嘅皇馬，佢哋陣型近似4141及433之間，最初段時間會進行收縮，確保唔好失波先，頭十至二十分鐘進行中低位壓迫，甚至會有時候見到十一個人全部退守落自己半場。係對住巴塞嘅442下，除左基沙文個下近距離黃金機會炒飛機下，都唔算受到啲咩考驗。而係進攻上，銀河艦隊就主要用反擊，係邊路不斷利用撞牆去打開缺口，由後生嘅華維迪同維尼修斯係兩側製造麻煩。前者就主要防務係中場非常活躍去堵截對方嘅傳球路線，係進攻上參與就靠岀波明買明賣揾隊友，佢嘅活躍係呢場勝利應記一功。而後者嘅維尼修斯就係主要進攻上帶黎貢獻，不時見佢接應傳波之後就靠個人能力爆底傳中，當然年幼嘅佢傳波入去禁區嘅選擇同時機仲有待改善，但冇辦法否認佢係進攻上為對方帶來嘅威脅。隨住比賽嘅推進，皇馬亦開始多左迫搶，球隊一失去控球嘅時候就會積極壓迫對手，盡快搶翻控球，然後快速透過兩側反擊點岀波製造射門。皇馬整體嘅防守壓力成功箝制左巴塞短傳連結，對方中路嘅突破機會寥寥可數，只有幾次走甩美斯製造危機嘅機會，但多人防守下亦成功限制美斯參與攻勢，減低左自己失波機會，施丹冒險以體力壓迫對手下成功換黎一場勝利，而皇馬最終亦係透過邊路維尼修斯同埋下半場換入嘅馬利安奴二人嘅左右各一次嘅邊路突破機會製造到入球。至於巴塞，係陣容岀爐之後，小編就留意到一點對佢地非常不妙，就係呢十一人嘅442陣容非常缺乏機動性及速度。望一望中場線先，靠邊路嘅係維達爾同迪莊，搭上arthur同年事已高嘅布斯基斯而佢地嘅前面就係基沙文同美斯。若果做主攻一方，442嘅企位下就缺少一位靈魂嘅進攻中場，雖然可以靠美斯回後引領攻勢，但始終係佢年紀漸大之下好難要求佢高頻率嘅走動，何況要佢回後攞波派牌之下再插入，再加上兩側無正式嘅進攻點，vidal同dejong亦唔適合做拉邊等嘅工作，主攻之下就得翻中路透過傳控突破，兩側基本上已經折翼難飛。若收縮442當然非常適合，兩邊同禁區頂都有足夠保護，但陣容上就接近無一位中前場球員有足夠嘅速度做反擊點，再係不斷防守消耗體能後更加無咩可能打岀到有效威脅，所以收縮下就只有久守必失嘅局面。講到黎呢到已經可以了解到巴塞今場嘅尷尬局面，只可以靠中路透過創造力先有片生天。點知就遇著皇馬係早段就先死守後積極壓迫，令自己未能舒服地控球在腳，更係巨大壓力下頻頻失去控球，vidal等比較慢嘅球員不斷被迫甩，每次被迫甩就要回追對手，對布斯基斯等人真係夠哂辛苦，於是巴塞就係咁係今場攻無力守吃力嘅情況下失去勝出嘅機會。當然呢場除左施迪安係選人排陣上有問題下導致巴塞外，巴塞一眾球員係呢場既把握力都係落敗因素其一，基沙文同美斯其實都有各自既黃金機會，但佢哋都可能因為大賽腳緊令佢哋係對住平時應該輕鬆搞掂既機會上處理得唔係咁好，放生皇馬幾次後俾機會佢哋企返穩陣腳，放虎歸山。若果佢哋把握到其中一個機會，就可以調返轉享用442下既防守優勢，防守縮後時就唔怕對手反擊及自己缺乏速度既缺點，隨時係皇馬破密集能力比較弱下守到尾，結局可能大不同，所以巴塞領隊及球員今次係國家打吡既失利上都要一齊負責任。