摩連奴大巴慾又起主場熱刺再敗紅軍 [熱刺0:1利物浦賽後感]

英超講場 於 15/01/2020 發表 收藏文章
近呢幾個禮拜英超每輪都差不多有場大戰,而啱啱過去呢一個禮拜就上現左換帥後嘅熱刺對上巨人利物浦,而今次嘅賽果顯示熱刺再一次挑戰利物浦失敗。
先講同第一輪對決比較下,變化較為多嘅主隊熱刺。係摩連奴上任之後,熱刺大部份時間使用4231嘅陣型,無奈熱刺差不多每場後防都會有失波,令到一向注重防守嘅摩連奴開始失去耐性,之前更公開表明話球隊如果再有一啲冇必要嘅失波就會調整戰術,而今場佢就黎個變化,使用我最驚熱刺用嘅3中堅。點解我會最驚熱刺用三中堅?因為熱刺嘅硬件上冇辦法享用比較多人防守下帶黎嘅防守優勢,因為現有後防球員質素一般,有幾位人士更係計時炸彈。再者進攻上,兩則翼衞尤其重要,岀波及速度覆蓋邊線成條走廊嘅能力缺一不可,然而右邊嘅aurier就無腳好波,左邊嘅rose就因為近排用得少手腳冰冷。再者,係大部分時間都執行4231下,熱刺球員對新陣型嘅企位整體概念都不足,其實好多次都可以見到多人企喺自己半場度,但係防守非常鬆散,開波唔夠一陣就差啲失波,係龍門條柱同門將神救先令半場同紅軍保持一球差距。而中場三人,就用左身型比較單薄嘅三人組,alli, 大力臣同雲克斯,工兵型嘅就因為傷無得岀,但係呢三位球員都難以係全場執行保持高頻率嘅防守,迫搶力有欠壓力,連結要務不清下令熱刺反擊上半場打唔岀,可見摩佬想加強防守嘅原意不但不成功更影響左自己嘅節奏同進攻機會。可惜嘅係去到下半場中段,佢先放棄3中堅,用翻4後衛,效果即刻非常明顯,成功製造唔少入肉嘅攻勢,只可惜未能把握,最終1:0失敗告終,而轉陣前後嘅表現都可以間接宣告摩佬今場準備失誤,高估3中堅帶黎嘅防守好處,低估左3中堅為球隊帶黎嘅負面影響。
至於利物浦,可以話佢地值得入多一兩球,亦應該輸翻一兩球,勝利可以話係全靠摩佬岀錯陣,又換得慢。早段係對方收縮下,的確有幾球差啲成功就攻破對方大門,只係欠左啲運氣。但係尾段熱刺轉換陣型後,多次令後防手忙腳亂,若非孫大人半單刀炒飛機,個球其實真係足以令雙方有握手言和嘅收場。由近況已經可以見到紅軍今季最大嘅敵人:傷病,防中及中堅人手不足下令球隊演出開始有起伏。慶幸嘅係暫時三叉戟同埋後防兩閘依然身體健康,但若果兩閘二缺一其實足以令佢地功力大減,因為後備上無人能夠取代兩者嘅存在,可見兩閘位深度不足嘅問題係一大潛伏問題,雖然積分榜上依舊遙遙領先,但若果出現任何不幸嘅傷病係閘位同中堅上,積分優勢有機會大大縮減,始終不可輕視曼城追後嘅威脅性,希望高普能繼續輪換得宜,必要時考慮一兩筆不太大消費嘅針對性補強,確保本年嘅紅軍盛勢。

如果喜歡我們的文章,請即分享到︰

標籤: 熱刺  利物浦  英超  aurier  rose  alli  雲克斯  

留言

會員
我要評論
請按此登錄後留言。未成為會員? 立即註冊
  • 船頭尺
    船頭尺 於 15/01/2020 評論 NO. 1

    要怪就怪,高普打造成的後防線太完美了。尤其係左右兩閘,當年

  • Gor SK
    Gor SK 於 17/01/2020 評論 NO. 2

    唔泊大巴唔通用熱刺個陣同利記鬥攻咩?

  • 英超講場
    英超講場 於 17/01/2020 評論 NO. 3

    完全同意Gor SK呢位兄台, 但大巴都有好多款既,4後衛都可以做到大巴既效果,你睇下熱刺後期轉陣用返4後衛效果幾好,但唔應該用上熱刺最差既一款3中堅大巴姐

快捷鍵:←
快捷鍵:→