因禍得福曼城客場反勝皇馬[皇馬1:2曼城賽後感]

英超講場 於 27/02/2020 發表 收藏文章
一直以來小編都淨係暫時專注做英超嘅賽後感,而歐聯其實係上個禮拜就開展左淘汰賽嘅階段,眼見英超球隊三隊全部敗陣之下,不禁為英超今年歐聯形勢感到擔心,於是較定個鬧鐘四點起身睇呢場重頭戲,亦成為左我係歐聯賽場嘅第一個賽後感。
先講賽事形勢,係上半場作客嘅曼城就主要用上442收縮防守,前場只係留翻B.施華及迪布尼,8成時間都全軍退守做反擊。當然呢個比賽模式曼城嘅一眾球員顯得就唔太習慣,平時係英超賽場大部份時間主攻嘅佢哋,要忽然一場專注防守實在係有啲難度。 根叔同rodri不時顯得幾狼狽,球員亦無咩做貼身迫搶,只係靠遮線同等對方大腳失控球,亦都可見哥帥叫佢地故意放棄球權,等反擊嘅機會。而係上半場曼城嘅反擊尚算有效,因為對方普遍球員比較慢,特別中場上,如果要鬥速度曼城嘅前線有耶蘇,馬列斯等人之下係有輕微嘅優勢,成個上半場就係靠迪布尼嘅一流視野同傳波製造感幾個有威脅嘅射門。
而主場嘅皇馬就做控球做進攻一方,但主要就係大腳去揾兩邊打身後,再而岀波,作用及威脅都不大,只係搏斬到入禁區制亂。而中場線上人選魔笛等人其實轉身都比較慢,再加上右邊進攻點又缺速度,就得翻左邊可以作為突破點,所以皇馬就難以揾到機會打開缺口。上半場整體只係贏到球權但贏唔到形勢,反而對住對方反擊嘅時候就要岀動古圖爾斯去救翻自己球隊一命,要講優勢真係數唔到啲咩。
而去到下半場,曼城就多左少少迫搶,嘗試等對方控住個波時無咁舒服,但亦係咁有啲唔上唔落,又未係平時主攻嘅自己,又唔係上半場咁一心一意做退守。最尾60分鐘就後防失誤失輸一球,但壞消息就變好消息,因為呢球嘅失波就間接幫曼城反cup。係作客下輸緊一球,返到主場又要焗攻怕輸翻作客入球下,曼城只好回歸自我,做翻平時控球進攻嘅自己,係換人換入史達寧後場面就同上半場調返輸,兩隊攻守轉換。而皇馬一下子亦唔太適應,係一次禁區睇落無機會嘅情況下,無俾足夠壓力迪布尼,俾佢岀左個彎波俾耶蘇,而拉莫斯係跳頂時機唔係最好嘅情況下輸左俾耶蘇,就被追和。追和之後曼城就憑住氣勢繼續攻,由啱啱入黎好氣好力嘅史達寧搏到對方落腳最終係迪布尼操刀下射入十二碼反勝。雖然施丹係落後之後有做翻調動,但一次後場失誤下拉莫斯為保護球隊免多失一球阻單刀申領紅牌結束呢場比賽嘅懸念。
作為勝方嘅曼城其實有點幸運成份,賽前未知對方陣容及戰術下,明白保守嘅原因,但見到對方陣容下,可以見到對手只係得一邊進攻點有速度,賓斯馬同 easy go速度唔高,反擊並唔會太有效同有威脅,係客場有入球優勢下無必要咁保守,迫自己球隊做唔擅長嘅防守,其實應該踢到上半15分鐘左右摸清皇馬就已經可以做翻自己,曼城絕對可以由442轉翻433。皆因哥帥砌岀黎嘅人腳根本就即刻可以變,但就要等到球隊下半場60分輸左球先放擔去變,變完就即刻收成正果,所以哥帥今次唔洗為自己過於保守而付出代價好彩,先落後係曼城嘅福氣。
而主場嘅皇馬,小編有點驚訝施丹竟然唔選擇引對方大舉進攻,然後放雲尼修斯,華斯基斯 or bale作兩側反擊點去爆曼城邊路,(未知係因為佢地啱啱好翻而未能正選定點,)反而控球在腳俾對方踢翻自己最好嘅劇本,揀控球唔係唔得但皇馬就無地面入滲組織力只係靠大腳揾對方身後就真係無咩用。另外就係對佢第一個調動有懷疑,係領先一球下換走有力助攻嘅雲尼修斯,換入bale。然而isco今場其實邊路都比較靜,領先一球下皇馬就係揀左防守突擊,咁點解唔換走isco等球隊打反擊嘅時候有兩邊揀呢?加上雲尼修斯今場表現晤錯,算係幾考起對手walker防守,仲有球助攻,呢個調動上施丹真係有斟酌嘅地方。
係主場輸左兩球嘅情況下,皇馬下場作客唔簡單hazard亦無可能趕到復岀,再者係無拉莫斯坐陣下,簡直係禍不單行,睇下施丹會選擇點嘅路帶皇馬走岀劣勢亦期待哥帥嘅應對決擇啦。

如果喜歡我們的文章,請即分享到︰

標籤: 曼城  迪布尼  英超  歐聯  皇馬  hazard  拉莫斯  施丹  Isco  哥帥  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→