一「子」錯滿盤皆落索又一例證,阿士東維拉惜負熱刺 [維拉2:3熱刺賽後感]

英超講場 於 18/02/2020 發表 收藏文章
係英超冬歇期休息再一排無同大家分享賽後感,真係令小編覺得好空虛,少左足球同分享嘅雙重娛樂,所以英超一有翻比賽當然要即刻睇波之後再同大家送上賽後感啦!而時間過得真係好快,英超已經黎到第26輪,係過往爭冠同護級鬥爭白熱化階段嘅時候,當然今年冠軍就已經無咩懸念,利物浦都只係得翻武漢肺炎呢個最大敵人,皆因如果到時係英國大爆發,英超呢啲人群眾集嘅活動就只好腰斬。
講翻今場先!事隔兩個月未曾取勝嘅熱刺作客阿士東維拉都係以4231示人,防守時就轉為442確保兩側同禁區頂有足夠嘅保護,亦係之前幾場比賽上都見到嘅部署。而今場摩佬就決定用孫大人打箭頭,摩拉就去翻邊路,嘗試用下身型比較好嘅孫大人頂替前鋒睇下有無比摩拉好嘅效果,畢竟之前幾場由摩拉踢前鋒踢岀黎嘅效果都麻麻,加上阿士東維拉後防球員幾位接近米九,實在好難叫得米七嘅摩拉揾食,所以小編理解摩佬今次嘅嘗試。而孫大人踢箭頭表現今場實屬麻麻,唔習慣企係中路嘅佢好難做到有效嘅支點停波轉身走位,就算係禁區內最後一腳都好,佢起動同最後一腳嘅位置同以前大大不同,而踢前左就會對最後一腳嘅觸覺嘅需求增加,所以好易見到佢係今場就算有黃金機會都把握唔到,射嘅位置考唔起今場半開掛嘅對手門將連拿。不過我認為呢個位置可以再俾孫大人試多一兩場,始終熱刺進攻體系習慣去揾支點,若繼續用因為身高不足踢得吃力嘅摩拉作前鋒就真係好難係簡利缺陣下進攻上有好表現,不坊俾多幾次機會孫大人睇下效果都唔過份。
整體熱刺今場嘅比賽全取三分真係唔多唔少有幸運女神嘅幫助,再亦都反映佢地幾個老問題,絕對有機會影響佢地未來爭四同歐聯。前鋒人選少都唔洗多講,若果孫大人同摩拉遲啲因為一週兩場而受傷都唔知佢地點算。後防球員質素及深度問題,炸彈太多,難以依賴佢地交岀穩定表現,對於呢個問題小編都唔知講左幾多次,難以理解管理層點解唔係冬窗補強,就算唔買頂級嘅人都買啲副選俾摩佬可以放心輪換啊,反而更放走兩位後防球員,實在猜唔透呢幾個操作,定還是摩佬真係咁憎佢地?今場佢地可以話係精銳盡出,更用左唔體力同對手來回對攻,攻守轉換,實在會為佢地擔心要係週中要對上德甲勁旅RB會唔會有影響,所以造成呢個尷尬局面就要問責熱刺管理層啦,無付出又點會可以期望有收穫呢?
今場熱刺嘅失球雖然帳面上只得兩球,但事實上若果有睇上半場嘅球迷都會知道,佢地真係應該失得更加多,呢方面就要讚對手阿士東維拉嘅部署。佢地係取態上選擇唔泊大巴唔收埋做防守,反而係頭70分鐘有體力嘅時候壓岀去,造成快速互相攻守嘅局面,嘗試挑戰熱刺三線中最弱嘅一環,後防線。雖然熱刺整體上嘅球員質素比對手優勝,但當喺節奏明快,快上快落嘅時候,後防就算岀現翻今季嘅老毛病,一係企位企得唔整齊一係甩位,再唔係就個別球員爆炸。而維拉絕對係比賽初段成功製造佢地期待嘅畫面,多番岀現黃金機會,只係把握唔到最後一腳。但點數都好,維拉今場教練團隊嘅部署都正路,點都值得一場和波,唔洗全失三分。只可惜臨完場前嘅最後三十秒,自己後防就送大禮,停左個靚波俾孫大人送佢一程單刀,比分係最後時刻改成2:3,仇都無得報,完美展現一「子」錯滿盤皆落索嘅名句,希望維拉球員唔會因為咁失去信心,始終剩低嘅賽事尚有空間俾佢地係降班旋渦入面逃出生天,做好自己係未來比賽爭分,幸運女神回歸嘅時候亦都可以接受佢嘅大禮。

如果喜歡我們的文章,請即分享到︰

標籤: 英超  利物浦  英國  熱刺  阿士東維拉  摩拉  

留言


請按此登錄後留言。未成為會員? 立即註冊
    快捷鍵:←
    快捷鍵:→