五千萬鎊買基爾獲加,哥迪奧拿是否失去理智?

論足球 於 21/07/2017 發表 收藏文章

今夏目前為止最具爭議性的轉會非基爾獲加莫屬。哥迪奧拿在失落愛將丹尼爾艾維斯後,以五千萬鎊從宿敵熱刺買入英格蘭國腳基爾獲加。無論如何,基爾獲加其實一定不值這個價錢,將現價打個五、六折才較為合理。哥迪奧拿在這單交易中做了水魚,但他是否真的失去理智?

我認為不是,哥迪奧拿是逼不得已的。他作出這個決定的最主要原因是市場上根本嚴重缺乏一、二線的右閘。在過去幾年,右閘這個位置的平均質素嚴重下降,歐洲五大聯賽中的頂級右閘少之又少。以英超為例,除了基爾獲加外,可能只有艾斯派古達屬於世界一二線的球員。其他強隊的右閘如佳尼、華倫西亞、比爾連都有明顯的弱點,未夠全面。甚至巴塞,在丹尼爾離隊後,去季都未能在這個位置找到適當的替補,反映現今球壇嚴重缺乏有質素的右閘。

縱觀現今球壇,在拿姆退役後,可被喻為一線右閘的我認為只有卡華積、桑法蘭和丹尼爾。前兩者離開皇馬和馬體會的機會微乎其微,而後者則剛剛拒絕了哥帥,轉投巴黎聖日耳門。退而求其次,球壇上二三線的右閘有什麼選擇?艾斯派古達、奧利亞(Aurier)、希沙積(Hysaj)、比斯錫(Piszczek)、施美度(Semedo)、馬里奧加斯柏(Mario Gaspar)、薛迪比(Sidibe)、馬利安奴(Mariano)、比爾連和華倫西亞。貴為英超數一數二的右閘,我亦會將基爾獲加列入這個行列。細心審視這個名單,我相信哥迪奧拿也會發現他的選擇相當有限。艾斯派古達、比爾連和華倫西亞正效力死敵,比斯錫和馬利安奴年屆三十一二,施美度剛轉投巴塞,馬里奧加斯柏和薛迪比剛與維拉利爾及摩納哥續了約,奧利亞被場外紀律問題困擾。換句話說,在這個名單中只剩下希沙積和基爾獲加兩人,而前者亦不似想離開拿玻里。

當然,他亦大可以選擇一個實力較弱但有潛質的年輕球員,如華倫西亞的簡西路(Cancelo)、利華古遜的軒歷捷斯(Henrichs)、或亞特蘭大(剛轉投AC)的干提(Conti)。但試問來季哥迪奧拿還有任何失敗的餘地嗎?在揀無可揀的情況下,哥迪奧拿為了簽下一名有質素的右閘,就逼不得已地多付一二千萬鎊,選了基爾獲加。

在取笑哥帥為水魚的同時,我們也要明白他的苦衷。

標籤: 足球  英超  曼城  基爾獲加  哥迪奧拿  熱刺  

留言


請按此登錄後留言。未成為會員? 立即註冊
  • Borman Chan 於 21/07/2017 評論 NO. 1

    算啦!呢條光頭不嬲都係低能㗎啦!由佢買自己友傻閪包禾之後全世界都睇到阿(冠軍)教頭有幾勁㗎啦!😂😂😂😂😂😂😂😂😂😂😂😂😂😂

  • Chris0321 於 21/07/2017 評論 NO. 2

    哥帥=on99

  • @michael@ 於 21/07/2017 評論 NO. 3

    在我心中,哥帥唔算一流領隊,由教巴塞B隊成長到A隊只係維持告魯夫風格,在現有強隊中揾出每人的缺陷,再位置上補血,他不會調整球員心態及能力或改造的位置。宇宙仁更唔使講,全自動波,每個球員為自己面子,榮譽而戰,補血的金錢更不成問題。到曼城,先趕走老大哥,冰鎮耶耶托尼穩固自己更衣室嘅權力,入包禾,球隊狀態不穩,球員對他信心不足,執行指令不足。

  • 論足球 於 21/07/2017 評論 NO. 4

    回應返Borman兄,咁又唔可以因為一兩單轉會就否定佢嘅能力嘅,冇乜邊位領隊係未試過入錯貨。

  • 論足球 於 21/07/2017 評論 NO. 5

    回應返Michael兄:無可否認哥迪奧拿嘅理念係深受告魯夫影響,始終告魯夫都係佢嘅啟蒙者。不過,除咗告魯夫之外,佢嘅理念都深受其他人影響,如前智利教練Marcelo Bielsa和4231的始創者Juanma Lillo(不過要詳述哥帥的理念可能就要在另一篇文章中再講)。關於改造球員方面,他在巴塞將美斯從右翼改造成False Nine,亦將馬斯查蘭奴改成中堅。在拜仁亦是,將拿姆改造成中場,甘美治改成中堅和右閘,艾拿巴改成中堅等等。而拜仁的踢法在他的帶領下亦改變了許多,球隊的位置感(Positional sense)和組織(Organization)都有別於之前的風格。當然去季曼城的表現不理想,但也許也要給他時間適應英超的踢法吧。

  • qwertyuu 於 21/07/2017 評論 NO. 6

    仲要買埋丹尼路

  • 閒雲野鶴 於 21/07/2017 評論 NO. 7

    修咸頓右閘薛迪梳亞利斯咪幾好,係冇獲加咁大隻同爆得,但佢個人能力好平均,踢傳控,佢技術上係夠細膩,助攻帶波過人同斬中都有一定質量,仲要連防守功夫都紮實。一個年青、有英超經驗兼係國家隊正選右閘,又唔係叫價叫緊幾千萬,唔明點解哥迪奧拿會睇唔上眼。

  • tinchi3721 於 21/07/2017 評論 NO. 8

    唔係廢哥教得好 而係巴塞 拜仁 美斯太強 強到邊個教都拎到冠既地歩 我只認為安76 摩帥 等先可以叫上名帥

  • 論足球 於 21/07/2017 評論 NO. 9

    薛迪梳亞利斯係唔錯,我估哥帥嫌他的盤扭/控球能力不夠好,同埋佢都未算係頂級。再者,個人認為除了右閘和右翼衛,基爾獲加在曼城有機會在3後衛陣式中司職右中堅(艾斯派古達的位置),要勝任這個位置要有一定的身體質素和應付高波的能力。

  • 閒雲野鶴 於 21/07/2017 評論 NO. 10

    獲加係大份兼大隻,但高空優勢並唔係真係咁明顯 (身高僅僅178cm),而且佢一向掌握跳頂嘅時機都唔係極之優秀。如果要佢長期打右中堅,仲反而會少咗機會運用佢最耍家嘅單對單過人,咁嗰5000萬鎊就更加唔值喇。

  • 閒雲野鶴 於 21/07/2017 評論 NO. 11

    不過講到尾,就算冇貨揀,你宜家冇閘用,揀一個有防守功底嘅年青球員,都好過炒價入一件有風險係計時炸彈嘅獲加吖

  • 論足球 於 21/07/2017 評論 NO. 12

    當然這未必會是他最常踢的位置,不過他在有需要時有能力可擔當這個位置。其實哥迪奧拿在拜仁都將艾拿巴放在左中堅,防守時踢三中堅,而進攻時就將陣形變為235或325,將艾拿巴推前進攻,所以這樣也未必會限制他進攻的機會(他的能力當然不及艾拿巴)。不過都係純粹猜測,因為他目前為止曼城都未買任何中堅,而丹尼路和史達寧都可勝任右翼衛。

  • 論足球 於 21/07/2017 評論 NO. 13

    當然這未必會是他最常踢的位置,不過他在有需要時有能力可擔當這個位置。其實哥迪奧拿在拜仁都將艾拿巴放在左中堅,防守時踢三中堅,而進攻時就將陣形變為235或325,將艾拿巴推前進攻,所以這樣也未必會限制他進攻的機會(他的能力當然不及艾拿巴)。不過都係純粹猜測,因為他目前為止曼城都未買任何中堅,而丹尼路和史達寧都可勝任右翼衛。

  • 論足球 於 21/07/2017 評論 NO. 14

    2個因素啦我諗,第一係曼城大把錢,第二係佢知道下年唔贏唔得,所以唔想冒太大風險買後生仔。同埋獲加呢兩年都好左好多嘅,不過今時今日英超嘅市場真係離哂譜。

  • Borman Chan 於 21/07/2017 評論 NO. 15

    多謝論足球真心討論,算我講大咗希望閣下唔好介意😁

  • 論足球 於 21/07/2017 評論 NO. 16

    點會介意,多謝你回應就真😂

  • DjArg Fung 於 22/07/2017 評論 NO. 17

    平買列治史迪拿😬

  • Cyrus_to 於 22/07/2017 評論 NO. 18

    你係好少肯理性討論哥迪奧拿嘅人

  • 論足球 於 22/07/2017 評論 NO. 19

    其實文章只係想討論獲加這單交易,冇諗過引發到咁多對哥帥嘅怨氣。都係個句,換轉你係曼城領隊,你會買邊個右閘?市場上有更好選擇嗎?你夠膽賭押在一位年青球員上嗎?球會買人有很多不同考慮,要鬧佢都嘗試明白左事情因由先。

  • 閒雲野鶴 於 22/07/2017 評論 NO. 20

    #55嗰位師兄,當年李斯特城奪冠嘅陣容大部分都係球探華殊搵返嚟,簡迪、侯夫同富治斯都係佢嘅提案。而呢條友之後都已經極速畀愛華頓挖走咗。至於雲尼亞里上季季初簽嗰堆人呢,冇一個有星級發揮,最後雲尼亞里搞到自己都要執包袱。

    講到點石成金,前任領隊皮亞臣先係。冠軍班底大半係佢嘅心腹,華迪、馬列斯、艾伯禮頓、真禾特同摩根,冇一個同雲尼亞里有關。你可以話佢激發倒球員嘅最大潛能,但論到搵名不經傳嘅新星就真係唔係雲尼亞里嘅強項。

  • 閒雲野鶴 於 22/07/2017 評論 NO. 21

    回覆#61,你不妨留意下,我敢講FanPiece可以話係一個曼聯Fans嘅集中營。所以有大堆。大堆嘅留言鬧哥迪奧拿同丁 恥笑阿仙奴都係啲好平常嘅事。你係唔會見到有幾多人留言嗰啲車、利、熱刺嘅文章就大概會知讀者嘅分佈。

  • 論足球 於 22/07/2017 評論 NO. 22

    多謝師兄提點。見到你嘅留言,都想回應下#55嗰位師兄。你講得冇錯,可以從弱隊買球員然後訓練到佢地好勁贏冠軍係勁。但我相信領隊勁嘅準則唔只係呢樣,要評價一位領隊嘅功力還要看很多方面,如戰術和管理球隊氣氛等等。有勁的球員都不一定容易管理,個個大牌,未必合作到。

  • livgbilly 於 22/07/2017 評論 NO. 23

    50m買獲加其實唔貴 第1英人第2佢英超經驗豐富同近年進步左好多幫到city攻防
    仲有icc睇到佢回追速度高 例子icc兩次成功回追到Rashford

  • 論足球 於 22/07/2017 評論 NO. 24

    回應樓上師兄,認同你講嘅野,5-6折即20-30m是他的身價。我認為不合理的地方只是他的轉會費比身價高出一倍。我明白現時英超市場係咁,但現況係咁唔代表合理。況且,他的價值並不是本文的主要論點。

快捷鍵:←
快捷鍵:→