艾朗藍斯--不應打上阿仙奴正選的人

噢.乜當奴 於 31/07/2017 發表 收藏文章
  艾朗藍斯(Aaron Ramsey),2008年加盟阿仙奴,曾在加盟後被稱為新法比加斯的天才球員,可惜在2010年斷腳後,一直欠缺高光表演,表現為人詬病,直至2013-2014賽季爆發,整季收獲16個入球及10個助攻,更傳巴塞有意用5000萬鎊收購,讓人對藍斯重新燃起希望。
  
  可是,在該季過後,藍斯似乎退步下來,定位亦變得含糊。在爆發後的賽季,因為奧斯爾重新佔回進攻中場的位置,藍斯開始被更多安排在右中場或右邊鋒位置出現,雖然出有著出色的體能,但作為右中場或右邊鋒明顯欠缺了速度及突破能力,往往安排了藍斯站在右邊路位置,就如自斷一臂,犧牲了右邊路的進攻。
  或許如此,雲加不再把藍斯放到右邊去,重新把藍斯放回中場去,可是在雲加的4-2-3-1陣式下,藍斯能夠打的位置就只餘三個,防守中場,中場中又或是進攻中場。論防守能力,比不起在2014年12月從查爾頓回歸的高基連,藍斯欠缺的高基連的掃蕩力及死纏爛打的能力;論護球、派牌、傳送能力及視野,完全比不上卡蘇拿、奧斯爾及沙卡,接到球時經常猶豫不決,自轉360度,傳球又不到位,一遭到埋身防守時更將球亂傳出去,所以以4-2-3-1的陣式中,根本沒有藍斯的位置。
  對於藍斯來說,速度、盤扭、護球、傳送、視野及防守能力均不出色的情況下,藍斯餘下的優點就只是充沛的體力和後上入楔的能力了。所謂蜀中無大將,廖化作先鋒,在今季季尾轉陣成3-4-3後,藍斯才穩定獲得正選位置,亦再發揮後上入楔的能力,但其缺點亦使他浪費了無數的機會。如果以一隊中下遊的球隊來說,藍斯這類型的球員是可以接受的球員;但以一隊以爭冠為目標的球隊,藍斯的表現是完全不合格,不值得打上正選,我亦深信如果下季卡蘇拿真的能夠復出時,就算3-4-3 陣式,也不會有藍斯的位置。
  今年26歲的艾朗藍斯,應該要重新審視自己的定位,若只繼續依賴體力而欠缺對其他能力的鍛鍊,在日後阿仙奴再轉變陣式時,會再次失去正選位置。如果他有機會重新看過自己比賽的片段,不知他會否跟我一樣,大聲地「鬧」這個球員......藍斯,有價好賣了。

留言


請按此登錄後留言。未成為會員? 立即註冊
  • Peelala 於 31/07/2017 評論 NO. 1

    昨天看完四角賽,同意藍斯沒能力打正選中場
    帶死波,以為自己可以突破分球
    傳球眼界一般,沒有KILLER PASS
    總括而言,技術特點不夠豐富

  • 噢.乜當奴 於 31/07/2017 評論 NO. 2

    昨日場酋場盃睇完後,就已立刻寫了這篇文,以現時藍斯的實力,只能作後備所用,跑上跑落,為者用來穩定勝局的球員,並非真正能帶球隊突破困局的合適人選。

  • 閒雲野鶴 於 31/07/2017 評論 NO. 3

    筆者又太武斷,卡蘇拿重傷完有幾多成功力好難講,沙加鍾意逗住後面唔上前,高基連嘅掃盪力同體能都退步明顯,近幾個月已經冇正選,落場亦都開始賣弄個人技術博雲加歡心。

    藍斯係真正有本錢打中場中、Box to Box嘅唯一一個。佢護球能力絕不下於沙加,左腳唔係生蟲亦係一大本錢,唔似幾個隊友咁係單蹄馬 (連山齊士同奧斯爾都係用一隻腳為主)。用左腳傳中、長傳甚至埋門都難唔倒藍斯,佢係冇卡蘇拿用左腳射罰球同開角球咁癲啫。

    另一方面,好多人都係忽略咗藍斯係有相當出色嘅入楔智慧。雖然山齊士或者奧斯爾唔會次次都搵佢嚟傳,但你睇直播就知,藍斯入楔嘅時機次次都係啱啱好,仲要係走一個隊友傳得倒嘅位。呢一招其實係同以前龍格堡非常接近,只係宜家冇球員擅張放嗰啲出奇不意嘅Through Pass,專打守門員、中堅之間嘅空檔啫。

    當然射門質素同頭錘準繩佢都未必頂級,成日浪費咗啲攻勢,但係如果要高基連成日走去前場滲一腳,我就寧願上去嗰個係藍斯喇。

  • 噢.乜當奴 於 31/07/2017 評論 NO. 4

    無可否認,藍斯的入楔能力的確是很出色,近年獲得的足總盃也是靠著藍斯出色的入楔而令球隊最後能奪冠而回,但始終不能掩蓋其粗糙的腳下技術的缺點。
    阿仙奴現在正是蜀中無大將,藍斯才得以正選,高基連被雲加的亂改造也怕會變成另一個藍斯,希望是藍斯能夠加以練習自己的傳球及護球,真正有能力成為阿仙奴的中場主力。

  • 閒雲野鶴 於 01/08/2017 評論 NO. 5

    雖然有好多人話藍斯佢分波唔掂、冇傳波技術,但係偏偏藍斯喺上季英超嘅數據又唔係極之差喎!以下係whoscored.com資料:

    全季一共收獲4個助攻,不及山齊士、奧斯爾同張伯倫,但係平均308分鐘就貢獻一次助攻,係比山齊士同奧斯爾仲要快,為隊內第二。

    而上季嘅傳球成功率為88.4%,為全隊第三。僅比卡蘇拿、沙加兩位傳球高手略低,比起高基連、伊禾比、張伯倫、艾蘭尼甚至韋舒亞等中場球員都要高。(法比加斯為84.5%、簡迪為88.8%、馬迪87.7%、靴里拉87.6%、卡域克89%、普巴85.1%)

    當然數據嘅嘢用嚟J就得,每個人上陣時間有別,傳球侵略性有異,成功率自然有高低之分,但我真係唔覺藍斯係一個唔識傳波嘅球員。而且論到足球智慧,我認為佢係少數可以跟得上山齊士、奧斯爾同卡蘇拿嘅隊友,沙加雖然係傳得準,但佢明顯同前幾者缺乏互動,一季以來冇幾多次做到所謂嘅 "眉來眼去"。高基連喺呢方面就更加不能相提並論。

    好似筆者話齋 "蜀中無大將",我覺得都係嘅,但係以藍斯最近幾個月嘅表現去睇,唔值正選,就真心唔知邊一個可以塞返落去踢佢嘅位置喇。

  • 14號站牌 -- RK 於 02/08/2017 評論 NO. 6

    目前來說 Ramsey是陣中和Xhaka搭檔效果比較好的一個
    問題在於Ramsey防守位置與積極度可以再提升一些
    雖然有充足的體力去協防
    但有些時候仍可以看到他懶得立即回防造成其他球員需要幫他補位
    間接暴露Xhaka更多的防守位置還不夠到位的問題

快捷鍵:←
快捷鍵:→