奧脫福大三巴半季點評

夢劇院風雲 於 30/12/2016 發表 收藏文章
澳門有大三巴牌坊雄立,奧脫福亦有大三巴屹立不倒,大三巴謂誰?伊巴、普巴、月巴(肥朗隊長)是也。半季過去,曼聯僅排第六,三位大帝半程表現又如何?

(圖片來源:Goal.com)


伊巴

上陣次數:26
入球 (助攻):17 (4)


「最接近神的男人」伊巴謙莫域夏季免費來投,使曼迷精神為之一振!35歲嘅瑞典神鋒絲毫不見廉頗老矣疲態,反而場場正選上陣踢足90分鐘。雖然有球迷批評佢太慢,拖慢進攻節奏;又話佢今季單刀波處理麻麻,浪費太多黃金機會。然而君不見今季佢成日自己孤身搏哂命喺前場衝鋒陷陣,做高空長波第一點,吸引防守幫隊友開路,戰術價值一流;加上佢有天生異稟嘅身體質素,撞緊唔跌,護波控球能力頂級,傳射仲成日有神來之筆,咁都仲有得彈?今季伊巴為曼聯於各項正式賽事上陣26場,攻入17球,雄據球隊首席射手之位!下半季賽程緊湊,希望佢無病無痛,延續強勢,繼續領軍曼聯鋒線!


(圖片來源:Eurosport)
普巴

上陣次數:24
入球 (助攻):5 (4)


普巴天價回巢,曼迷對佢寄予厚望,希望呢位中場天才可以帶動中場線。可惜事與願違,開季初段普巴落場真係令球迷眼火爆:一來佢太獨食,中場接波一定要上腳(網民謂:妹下妹下),成日想扭波過人,拖慢節奏之餘,仲成日失波,俾機會對方打反擊;二來普巴防守態度差,防守時往往喺中場踱步,拍都唔拍,做個樣算,季中又幾球都係佢防守睇漏,跟唔實對手俾人入波;三來扮大牌,成日手指指叫隊友落位,自己交失波傳出界就歸咎隊友。
不過鬧還鬧,近一個月佢表現的確大有改善,接波傳波都少咗上腳。可能係摩佬諗通咗,中場搵靴里拉同卡域克拍住佢,幫佢做防守纏繞工作,釋放佢潛力專心疏理進攻節奏,創造入球。過去11場波曼聯8勝3和,佢同伊巴聯手攻堅,全隊24球波兩巴或傳或射參與咗16 個;而上場對新特蘭,普巴有世界級Box-to-Box中場表現,剷波攔截射門數據都領先全隊,美中不足係有球勁射中柱。盼望佢來年愈戰愈勇,做返祖記個位天才普巴。

(圖片來源:The Independent)

月巴

上陣次數:22
入球 (助攻):3 (8)


「沒有期望,哪有失望」呢句足以概括隊長半季表現。開季球隊磨合期間,摩連奴都會出隊長正選,當俾下面佢。可惜歲月不饒人,昔日英格蘭金童已經急速退化成豬油大叔,速度、控球、推波、射門質素全線下滑(向兩邊長傳分波還可以),喺咁嘅情況下佢仍然有8球助攻,都幾令人驚訝。其實今季朗尼依然好賣力咁喺前線奔走,但係明顯睇到佢心有餘而力不足,最常見嘅情節只係佢落底線執返個波,或者同球證投訴‥‥‥平心而論,球隊無傷病困擾情況下,正選就唔輪到朗尼,做中場輪換佢就綽綽有餘。傳聞中超球會高薪挖角,佢而家差兩球就破到卜比sir球會入球紀錄,佢應該點都會留到季尾,爭取名垂千古,做球會史上第一人,所以有咩轉會消息就留返7月再講啦。

如果喜歡我們的文章,請即分享到︰

留言


請按此登錄後留言。未成為會員? 立即註冊
  • tinchi3721 於 31/12/2016 評論 NO. 1

    樓上rip組合😂笑左我5分鐘

快捷鍵:←
快捷鍵:→