又到聖誕:曼聯經典Boxing Day比賽

夢劇院風雲 於 24/12/2016 發表 收藏文章
就到英超聖誕快車嘅日子,傳統上26號拆禮物日就會揭開快車序幕,9日踢3場好考球員體能同主帥調動能力,幾場波足以影響該季爭標形勢。
英超成立後曼聯26號嘅比賽錄得18勝2和2負佳績,往績冠絕英超。夢劇院風雲就精選過往廿年5場曼聯Boxing Day經典同大家一齊重溫下。

1) 2012 年 曼聯 4:3 紐卡素


一場經典曼聯式反勝 --- 補時入波。雙方入球梅花間竹,開波4分鐘,紐卡素已經喺奧脫福先開紀錄,雖然隨後伊雲斯門前撞入扳平,幾分鐘後佢擺烏龍,英雄變罪人。下半場艾夫拿禁區頂勁射破網追返平,之後施斯同雲佩斯嘅入波又令繼續雙方平手。戰至90分鐘,眼看要握手收場之際,卡域克右腳chok入禁區,小豆瞓身剷射為曼聯奠定勝局!開心到費格遜跳下跳下!12-13賽季曼聯多番最後關頭入波致勝,而家望返,實在久違呢種血性。

比賽精華link:https://www.youtube.com/watch?v=Frl1JsZT2bo

2) 2011年 曼聯 5:0韋根

小強韋根對親曼聯都無運行,11年都唔例外,曼聯靠朴智星、華倫西亞,同埋hea碧托夫大演帽子戲法,5球狂數韋根。保加利亞前鋒貝碧托夫雖然當季不受重用,但係腳法依然,技術精湛。hea碧第一球先攞定傳波,再霸身位,最後先淡定射入網;第二球佢喺禁區內瀟灑轉身擺脫防守,再怒射破網,睇到球迷拍爛手掌;最後一球十二碼佢助跑窒步,呃哂龍門睇定射右下角,順利完成帽子戲法。

比賽精華link:http://www.dailymotion.com/video/xn9qm9_m-u-5-0-w-a-26-12-2011-www-daily-foot-com_sport

3) 2003年 曼聯 3:2 愛華頓


快車賽期主將輪休,各位曼迷可以留意下呢場嘅球員名單:施(豬)維施(豬)達、畢特、奧沙、基巴臣、比利安、科東尼同迪贊巴。頭三個都叫老臣子;後面四位頂多係一線尾、二線頭(非常厚道),踢完曼聯都唔知去咗邊,應該要球齡十年以上嘅曼迷先會對佢地有印象。當年費sir帶住呢班兵都可以有聯賽三甲,反觀今時今日大筆大筆錢攞去買人都係得個桔。

講返場波,對面拖肥嘅正選前鋒係只得18歲,仍然有好多頭髮嘅朗尼,仲有李鐵打後衛;曼聯就有C朗正選(當年個髮型真係唔知想點)。開波無耐畢特已經勁射先入一球,後來加利仔入波,你無睇錯,係最有速度嘅加利仔,不過係入老烏,幫拖肥追平。完半場前同下半場來自巴西嘅基巴臣同法國仔比利安各入一球,完場前愛華頓名將鄧肯費格遜入返球都無補於事,最後曼聯主場擊敗愛華頓,三分袋袋平安。

比賽精華link:https://www.youtube.com/watch?v=tUZ7FMu9LlI

4) 2002年 米杜士堡 3:1 曼聯


呢場波有咩咁特別?曼聯過去廿幾年boxing day只係輸過兩場(另一場係舊年雲92帶隊輸俾史篤城),當年今日曼聯強陣作客河畔球場,光頭佬巴夫斯把守最後一關,中場有養傷多月復出嘅鐵血隊長堅尼、史高斯、「阿根庭巫師」華朗同傑斯,前面仲有「雲佬」雲尼斯達萊拍住蘇斯克查。可惜當年由布朗同奧沙領軍嘅後防帶自爆屬性,先失兩球,之後傑斯追返都無用,對面完場前入多粒,為曼聯球迷送上一份難忘嘅聖誕禮物。值得一提嘅係,當時米杜士堡有幾位成員都係為英超迷所熟悉嘅,教頭係前費sir副手同英軍主帥麥卡倫,上年仲踢緊李斯特城嘅舒華沙該場負責把關,隊長兼正選後衛就係現任英格蘭領隊修夫基。

比賽精華link:https://www.youtube.com/watch?v=4nwMpMgo6sQ


5) 2013年 候城 2:3 曼聯


開賽不過13分鐘已經兩度失守,20分鐘一次角球靠史摩寧先追一球,26分鐘肥仔朗尼禁區頂勁射,貼柱邊入網為曼聯追平。下半場迪基亞同門楣先後救曼聯一命,最後靠對手擺烏龍曼聯先可以作客全取3分,迎來三連勝,穩守聯賽榜7弟嘅位置……

比賽精華link:https://www.youtube.com/watch?v=H5gI7HDu6IU

2016年 曼聯 v.s. 新特蘭


今年Boxing Day曼聯將會主場迎戰而家喺護級區嘅新特蘭,如果三位大帝伊巴、普巴同月巴發揮正常就應該食硬黑貓 (不過今季曼聯好有和波格…) 仲有今場波會係前教頭莫椰子第一次以敵方主帥身份重返奧脫福,唔知到時班球迷會點招呼呢位 「被挑選的一位」(“The Chosen One”)呢?

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→