九九八十一斬的遺憾

夢劇院風雲 於 02/01/2017 發表 收藏文章
曼聯兩分鐘連下兩城反勝米杜士堡,昔日永不言敗嘅曼聯彷佛重現眼前,亦為費sir送上一份精彩生日禮物。今場波曼聯久攻不下卻先失守、末段全民兵臨城下圍攻對手、兩分鐘連入兩球,看在眼內,劇本同三年前莫椰子經典九九八十一斬果場波何其相似,只係當年曼聯未能笑到最後,俾戴倫賓特絕殺‥‥‥呢場波亦間接 kills the season.


回帶去14年2月9日,曼聯主場迎戰富咸,其時曼聯狀態頹靡,過去五場聯賽2勝3負,只排第七,24場波輸8場,遙遙落後榜首曼城13分。主場對住排包尾嘅富咸,諗住可以此祭旗!誰知上半場一次後防大意就俾對手輕鬆先入一球,曼聯隨後傾力反撲,惜破門乏力,莫耶斯惟有祭出經典戰術 --- 上斬昏君、下斬讒臣嘅九九八十一斬

精華在此:https://www.youtube.com/watch?v=zkiKcazMsTY
斬呀斬、斬呀斬,點知球球一係就俾對手解圍,一係就掠門而過。球迷都打定輸數,預咗曼聯會再一次主場輸波之際,78分鐘雲佩斯門前撞入追平!

圖片來源:Daily Mail

入球點燃起鬱結嘅奧脫福,球迷重現生氣,熱切期待反cup一刻。曼聯後上之勢氣勢如虹,唔好俾佢停,80分鐘曼聯再一次邊路攻勢,對手解圍不遠,卡域克禁區頂拉弓,皮球直飛遠處,2:1!!成功反超!本來焦慮萬分嘅莫耶斯喺場邊向球迷激動揮拳慶祝,口中念念有詞,一吐污氣!

截圖來源:Sky Sports

反超後曼聯全民退守,只要穩穩陣陣,用血汗拼搏返嚟嘅呢3分就袋袋平安;球迷都以為勝利在望,開定哂香檳。豈料事實總是殘酷,補時階段,後防再次走漏對手,迪基亞撲出曼聯舊將李察遜勁射不遠,俾戴倫賓特近門頂入。94分鐘,2:2。
圖片來源:Daily Mail

此刻奧脫福頓鴉雀無聲,曼聯球員一臉茫然,難掩失望之情。要知道踢波最講氣勢,先落後、圍攻、再反超,到最後一刻竟被追平,過山車嘅變化大傷球隊士氣。80分鐘時仍然意氣風發嘅莫耶斯賽後未能回過神來,對和局無言以對,堅持兩翼出波係曼聯優良傳統,坦言「臨天光賴尿」反映球隊精神軟弱。賽後曼聯落後第四位利物浦9分,基本上緣盡歐冠。呢場尷尬和局成為該屆曼聯嘅棺材釘,只留下破英超紀綠嘅81斬讓球迷回味(當然莫椰子經典 斬!斬!斬呀gif亦俾網民無限回帶瘋狂loop)

正所謂「一將無能,累死三軍」
當年莫耶斯喺球隊久攻不下時抱頭叫苦,當眾示弱。戰局已經不穩,球員放在眼內,軍心更難定
圖片來源:Daily Mail

相反摩連奴泰山崩於前而色不變,落後不餒,反超後慶祝幾秒就冷靜指點球員,兩帥高下立見。(見影片4:40)


https://www.youtube.com/watch?v=kJsaxHKfO20
p.s. 好多球迷都聚焦高空波優劣,其實筆者都只係想講下被對手補時追平對士氣嘅負面影響。斬波無問題呀,靈活造到攻勢入到波就係好波;相反當年莫耶斯一成不變淨係斬,俾對手摸通哂路就好有問題。對米堡一役曼聯兩邊出波好多時都係肋位入楔,摩佬睇出對手查奧爾成日助攻,不及回防,設計戰術俾福仔馬仔沿左翼位入禁區爆,出波好有威脅,可惜幾球都係中路撞唔入個波。

如果喜歡我們的文章,請即分享到︰

留言


請按此登錄後留言。未成為會員? 立即註冊
  • Chris0321 於 02/01/2017 評論 NO. 1

    抽水不遺餘力

  • ckomaster 於 02/01/2017 評論 NO. 2

    當年如果對米堡哩啲升班下游隊,斬入左幾世啦

  • 數據就是事實 於 02/01/2017 評論 NO. 3

    睇番數據,球證玩死曼,係在後費時代已開始,費最後的幾季曼已經常死火,(月巴初形已見),要不是有云配C神兵空降,曼敗像在後費時代就已開始!到莫椰子天才時代只係惡化,而莫椰子對,球證玩死,完全沒有方法阻止,而云膠耳對此也依然不見起色...曼需要既,係要同球證與英足總相討...

快捷鍵:←
快捷鍵:→