【你都有今日】利物浦翼鋒扭到尼馬踢空,獲官方選為「最佳技藝」

《越位陷阱》 於 20/09/2018 發表 收藏文章

尼馬自出道到成名到成為兩億巨星,招牌貨就係濕手巾,成日掛住德國門神––扭呀,扭到有得交都唔交,睇就好睇,但一唔成功就搞到攻勢斷纜。

呢位扭怪估唔到有今日,在歐聯利物浦對巴黎聖日耳門之戰,尼馬好少有咁走到大後方回防,可惜防守始終唔係佢強項,遇上同是10號仔的紅軍翼鋒沙迪奧文尼,單對單對決,文尼呢隻快馬今次唔用速度爆過,竟然班門弄斧,用返尼馬最拿手嗰招,放慢腳步,然後向右一個假動作,再向左闖過對方,尼馬完全中伏,成個飛咗去另一邊,被文尼甩開成兩、三個身位仲踢空氣,非常清脆利落。更令尼馬尷尬的是,歐聯賽會對文尼呢吓動作十分欣賞,官方公佈選之為「本日最佳技藝」(Skill of the Day),在官網可以看到尼馬被人扭過的畫面不斷loop,歐聯官方社交媒體仲用咗一個儍眼加O嘴表情符號同「令人吃驚」嚟形容。

尼馬老貓燒鬚,自然想做返場好戲挽回面子,佢去邊線引球推進,想用技術闖關,但被萬能老倌占士米拿出腳好準繩咁攔截,尼馬成個跌低,滾出界外。其實老占在歐聯都有過俾美斯通坑渠嘅經典一幕,不過今場應付尼馬就無失拖,仲憑十二碼取得一個入球。

尼馬慘被攞彩不特止,巴黎聖日耳門最終仲以3:2輸埋。

尼馬上次為巴西上陣時表演滾地葫蘆,被網民瘋狂惡搞,誕生大量好爆笑嘅二次創作,今次俾人咁樣扭到飛起,相信又會成為極具娛樂性嘅創作素材!
https://kep.cdn.index.hu/1/0/2096/20968/209684/20968442_1335008_65adb7b0ef3e35ca17bf64fdd7296aaf_wm.gifhttps://www.youtube.com/watch?v=JDpFA7IQB8c
www.uefa.com

留言


請按此登錄後留言。未成為會員? 立即註冊
  • 亞男 於 20/09/2018 評論 NO. 1

    掉返轉頭,佢肯回防返到去嗰個位已經好叻豬

快捷鍵:←
快捷鍵:→