作為英超最大品牌，曼聯每年都有好多贊助商、合作夥伴要應酬，公關大員想度期搵班球星大帝出來拍吓廣告，滿足吓一眾米飯班主，絕對不比贏波容易。
曼聯官方媒體前日發佈了一段最新製作的廣告片，聯合宣傳球會及出產智利紅酒的贊助商，廣告以當家主將伊巴謙莫域擔正主角，卡域克、迪基亞等隊友做老臨，有一秒鐘出鏡時間，而最厲害的是天大面子請出在奧脫福有銅像的六十年代「三條煙」粉墨登場，講述今季加盟的伊巴已被三位老叔父祝酒認可，升上神檯，晉身紅魔鬼殿堂，講真都拍得幾型棍……
咪住！曼聯「三條煙」即係英格蘭核心卜比查爾頓、蘇格蘭神鋒丹尼士羅，同埋北愛球王佐治貝斯……佢唔係已經仙遊咗架啦咩？係，所以曼聯搵咗個人頂佢個位，佢就係……華倫西亞！
華倫西亞在曼聯雖然都算資深員工，仲立哂頭著哂老西咁款，但企埋去做「三條煙」之一，真係夾硬咗啲喎！霞姨，你搵茄喱啡可唔可以專業少少呢？其實曼聯公關唔係搵唔到名宿，大大個傳奇射手高爾棟咗響度，做叔父佢點都叫近磅啲啩，幾時輪到華倫西亞挺身而出，睇嚟選角方面真係好有問題。
https://twitter.com/ManUtdhttps://www.youtube.com/watch?v=AWu-X7sSUGg
請按此登錄後留言。未成為會員? 立即註冊