美斯結婚了！美斯終於要與青梅竹馬的女友安東妮娜拉埋，其實兩口子仔都生咗兩個，金球獎頒奬禮美斯亦有攜眷出席，今個夏季無美洲國家盃同世界盃，終於有時間搞婚禮。
大家都知目前巴塞陣中同美斯由細玩到大嘅係得碧基，以前美斯、法比加斯同其他青訓隊友成日會去有錢仔碧基屋企聚腳，一直相當老友。如今西班牙報章竟然透露，美斯大婚不但止兄弟團無碧基份，連請帖都唔會預佢。
做咩咁大件事？之唔係又係為女人。據報章El Pais報道，原來準美斯嫂安東妮娜同碧基的前度湯瑪絲是閨密友好，佢覺得碧基認識Shakira後見異思遷，所以好唔喜歡佢哋呢對，更戥死黨湯瑪絲唔抵，咁話！
話說碧基同湯瑪絲一對本來都好地地，直至碧基因為幫2010年世界盃宣傳，結識咗為大會唱主題曲嘅Shakira，好快一撻即著，飛咗湯瑪絲，同Shakira一齊，仲生咗兩件。
估唔到生平好少換畫嘅美斯，都一樣被WAGs搞到頭痕…… 不過，女人嘅事始終無影響美斯同碧基的關係，場內場外依然好兄弟。世界上所有後衛都阻唔到佢嘅美斯，咁小事應該唔會擺平唔到老婆啩，唔係以後點接手做隊長？http://www.dailymail.co.uk/sport/football/article-4328694/Barcelona-s-Gerard-Pique-miss-Lionel-Messi-s-wedding.html
相隔二十年後，再有古華特為阿積士入球
請按此登錄後留言。未成為會員? 立即註冊