球迷會掛巨幅粗口banner 仲大過球場大鐘 精選

少入球場，球迷質素呢家野，真係識條鐵！見到陳七空門大撻，麥基單刀橫傳，我哋都會好齊咁一齊"X"一聲....
人哋大國勃起乜都要大要有霸氣就唔同啦。上周中國足協盃四強賽江蘇蘇寧主場鬥上海申花，主隊的球迷會整咗幅banner大一大，粗口寫到大一大 (冇串錯字架) ，仲要驚死你睇唔到，擺正大鐘底！英超球迷會有無咁勁呀？冇呀嘛，咁即係中超又勝一仗了！

運動家有所謂體育精神，英超今季加咗新例，球員粗言穢語，可以被紅牌趕出場，證明君子有所為，有所不為。打氣還打氣，都要知分寸。

又咁講，其實回心一諗，相比之前經常全武行，開拖開到去日本，自己人打自己人，日仔食住花生(同杯面)開心笑。家陣只係出吓口術，抛吓洋文，已經好hi卡，好文明，都算有進步。 唔知係咪唔識英文，賽會監場同球場管理人員都無即時過問，事後足協高層派人查完字典，明白原來「福建大學」，唔係指位於福建嘅大學，於是就決定作出處分，係咁易罰咗四萬蚊人民幣。

咁其實足協又真係幾唔俾面，人哋光酥餅騷靈唔係山西豆腐隊，話哂係堂堂國際米飯班主(應該係國際米蘭班主)，閒閒地買個一啲都唔super嘅喔噢馬里奧，都四千萬歐羅啦，你罰佢四萬人仔，叫人哋去邊度搵碎銀過你呢？而家仲邊有人收斗零架？咪玩啦！
https://kknews.cc/sports/xb8mn8.html