美斯一動作集合三技術:告魯夫轉身+後腳+通坑渠

《越位陷阱》 於 29/11/2018 發表 收藏文章

睇咗美斯十幾年,當大家以為乜到見過,冇乜可以再令你「O嘴」同嘩嘩聲嘅時候,佢總會再有新驚喜。

歐聯早前巴塞對熱刺,美斯連續三次作出傳球式射球,頭兩次都擦柱而過,第三次終擦柱而入,三次都令洛里斯無法撲救,睇到評述員話嘆為觀止。

呢款射球睇落似用掃把腳傳球,但動作較細,難捉腳影,雖然勁度欠奉,但精準度極高,係瞄準門柱內側發射,龍門想撲都好難,同以往美斯擅長帶弧線嘅射球好唔同。

除咗呢款射球,美斯最近又有新招,連對手睇見都呆一呆。於周末打和馬體會1比1場大戰中,美斯擺脫菲臘比路爾斯嘅時候,竟然將三種技術融合為一個動作:告魯夫式轉身、後腳、通坑渠,全部於一秒之內發生。球迷同菲臘比路爾斯一樣,睇完都一頭霧水,唔知發生咩事,要用慢鏡睇多幾次重溫。

當時美斯將個波頂高之後想控定,菲臘比路爾斯係佢身後逼搶,美斯用後腳輕輕一撩通佢坑渠,同時180度轉身,係佢右手邊闖過。路爾斯發現個波唔喺美斯腳下,又唔喺自己度,頭上出現咗「個波呢?」呢句對白同好大個問號。

除咗菲臘比路爾斯之外,今場仲有基士文成為美斯腳下「犧牲品」。美斯帶住個波於中路突破,惹來三、四個馬體會球員埋去阻截,其中一個係早前自稱與美斯「同枱」(同一水平)嘅基士文,佢俾美斯扭過後,有一刻出現同菲臘比路爾斯一樣嘅「天然呆」,構成有趣嘅畫面,除咗成為二次創作素材外,有人更發現,同《足球小將》中戴志偉被三杉淳扭過嘅一幕好相似。

有評論員就話,基士文應該話自己係最接近美斯水平嘅球員,事實上佢都有可能係,不過最接近都可以係好遙遠,一啲都唔接近,呢個講法聽落又真係幾精警。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→