[再戰英超] 解約金獵人 - 賓尼迪斯 精選

開季6勝6和16負嘅紐卡素，終於抵受唔住麥卡倫嘅無能，宣佈將佢辭退
三個小時後，隨即宣佈賓尼迪斯成為球隊新任主帥
「魯營不敗男」敗走班拿貝之後，一直未有返新工
今次重返英超，無得打盃賽，無得爭前四，目標只得一個︰護級

相信呢一幕對紐迷一啲都唔陌生
08-09球季，球隊傳奇人物舒利亞臨危受命，要喺8場以內帶領舊東家走出降班旋渦
結局大家都好清楚，當然就係失敗收場，跌落英冠，星散

有人話肥賓由季初教皇馬，去到季尾教紐卡素
就有如住開半山嘅人走去住公屋
的確，賓尼迪斯呢位教頭履歷相當亮麗
曾經執教利物浦、國際米蘭、車路士、皇馬等大球會
更係史上唯一贏過晒歐霸、歐聯、歐洲超級盃及世冠盃嘅教練
實力同名銜絕對稱得上係頂級
以紐卡素今時今日連中型班都稱唔上嘅實力
肥賓來投可以話係紓尊降貴

不過，唔好唔記得，紐記有個疊水肥佬老細 Mike Ashley
有留意開嘅球迷都知，根據福布斯2015年嘅統計
紐卡素係全球排名第17富有嘅球會（比聯賽排名更高！）
財力可想而知
加上作為今個冬季轉會窗最豪氣嘅球隊
有「解約金獵人」之稱嘅肥賓話唔埋就係睇中呢點
玩夠十場之後就華麗轉身攞錢走人...

當然以上只屬陰謀論啦
不過賓尼迪斯嘅任務一啲都唔簡單
上任第一場就要作客英超龍頭李斯特城
一嚟就打大佬，都唔知係好彩定唔好彩
話說回來，以紐卡素嘅人腳，要撼贏兩大護級對手新特蘭同諾域治
加上打少一場嘅優勢應該都仲係秤高一線

假如肥賓真係護級成功
又假如下季摩佬真係入魔
再假如施蒙尼都上埋車
連埋確實咗加盟曼城嘅哥迪奧拿
加上原本嘅雲爺爺X2同高普
下季英超真係精采過歐聯（所以啲豪門先唔駛踢歐聯嘛）