賽後筆記：香港 2-0 馬來西亞 精選

關鍵一刻
馬來西亞中場沙菲克踩中丹尼，直接領紅。呢位中場核心被逐之後，大馬基本上已經喪失控制中場嘅能力，失波之後更加無力回天。
三位歸化兵
1. 列斯奧喺後防大部份時間都相當穩健 (除咗下半場一次回傳之外)，有必要嘅時候都會壓前助攻，負責駁腳。有佢鎮守右路之下，擔任翼衛嘅徐德帥大可安心做一部唔穩陣嘅傳中機器。
2. 丹尼今場喺左邊受到嘅考驗都唔算多；亦都頻頻上前助攻，輔助跑得快但係控球唔算好嘅麥基，尚需磨合不過效果唔算差。
3. 佐迪繼地標戰之後，再度以頭鎚為港隊先開紀錄。除咗一球入波之外，佢走出禁區嘅駁腳，同黃威嘅配合，以至後上嘅遠射都相當引人注目，今場港隊嘅3-4-3基本上就係依靠佢去串聯中前場。上陣70分鐘之後因傷退下火線，表現可人。
最有驚喜嘅，係肯用波
或者係因為新兵用波能力比較好，又或者係因為對方全面退守，港隊今場的確係多咗時間用波同埋嘗試地面組織。不論係雙黃配、換入鞠盈智、定係加上陳俊樂嘅中場配搭，佢哋加埋有時後上嘅羅拔圖、列斯奧或者兩邊嘅翼衛都會嘗試保持控球，慢慢尋找機會再分去兩邊傳中。雖然有時略嫌節奏較慢，加上走位唔多之下，拉唔到好多空位，不過比起以往單靠幾位前線歸化兵嘅個人能力，港隊進攻嘅表現似乎有進步。

有待改善......
1. 黃威踢後一格表現真係冇咁好，用佢踢中場中其實防守力都有所削弱，用佢串連中前場效果應該會更加理想。
2. 高梵有時真係太獨食，呢兩場踢翼嘅時候同隊友嘅配合都未如理想。
3. 辛祖嘅把握力同喺傑志真係差太遠；嘗試做啲串連嘅工作效果都係麻麻。4. 今場做傳中機器嘅徐德帥表現唔太穩定，下半場後段都開始隱形。

好消息：多謝黎巴嫩？
保住出線希望嘅同時，黎巴嫩已經以5-0擊敗北韓，接近提前出線2019年亞洲盃決賽周，下場將會喺11月作客香港。到時睇下港隊有冇機會喺呢支西亞球隊身上偷雞，掌握出線嘅主導權啦。