港超聯賽後筆記:東方龍獅 3–2 富力R&F

場邊筆記 於 02/09/2018 發表 收藏文章
港超聯首輪賽事尾場,東方龍獅兩度落後下,憑艾華頓、洛迪古斯同荷西安祖嘅入球,於補時階段以3-2反勝富力R&F,取得陳婉婷教練回歸後首場勝仗。

先講東方龍獅,牛丸回歸之後,踢得比預期中好:論用波走位、傳送組織,東方其實都相當流暢;兩閘後上助攻亦令進攻更加立體。幾位中前場華人球員都有唔錯嘅發揮,不過如果少啲上腳嘅話,進攻威脅可能更大。

但係東方嘅進攻都唔係冇問題。當富力死守後半場嘅時候,東方有一段時間係有啲束手無策:李康廉同徐德帥嘅突破能力不足;艾華頓踢邊嘅威脅亦明顯比踢正前鋒高。邊位進攻球員可以擔當前線停球嘅支點,撕破對手嘅密集防守,會係牛丸需要思考嘅一環。最後時刻東方踢得比較簡單,反而可以扭轉局勢,希望呢場可以幫助牛丸諗下東方進攻嘅Plan B。

防守上,或者純粹係富力球員太多失誤,東方喺中前場嘅壓迫同反搶睇落幾有效。不過兩閘要應付利安高、林志堅呢啲速度、技術,甚至身形兼備嘅球員確實有啲吃力;上半場荷西安祖對過頭波嘅判斷都有啲問題;防守反擊嘅時候,東方防線嘅企位都有待改善。希望教練團可以處理一下。
最後外援人選方面,雙中堅係咪都要用外援值得商榷,不過東方中堅選擇本身都唔多,最多應該都係基頓踢正選。


另外好簡單咁講富力R&F:

首先,可能狀態真係未操起,傳送失誤太多。

此外,喺楊正光嘅帶領下,富力真係同舊年飛馬分別不大:你當利安高係會踢邊嘅查維斯,林志堅係踢邊嘅利馬應該就差唔多。先入波嘅話,穩守應該問題不大;但係先失波嘅話,進攻好可能真係要靠個人能力。

最後,羅港威繼上年對飛馬嘅左路直升機解圍後,喺附近位置再創新猷。雖然艾華頓係有動作,但係解圍真係要清脆啲。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→