港超聯賽後筆記:冠忠南區 0–2 東方龍獅

場邊筆記 於 20/10/2018 發表 收藏文章
冠忠南區主場出擊迎戰東方龍獅,不過下半場連失兩球,最終以0-2不敵對手,四連勝告終。

喺失波之前,南區表現其實比較出色:後場保持密集防守,前線則以蘇沙嘅左路突破,單箭頭夏志明嘅入楔,與及卡拉錫嘅後上進攻作為武器。不過夏志明上半場多次失機,卡拉錫亦有一次遠射中柱,加上蘇沙下半場一次單刀被葉鴻輝救出,埋下輸波伏線。

至於東方,上半場依然維持控球在腳同中路組織嘅踢法,但係面對南區嘅穩守似乎成效不大,後防更多次出現傳送失誤。教練陳婉婷半場果斷換走笠臣,以艾華頓入替,進攻亦變得比較直接。而把握力亦成為雙方嘅分野:52分鐘,洛迪古斯把握一次列文嘅失誤,入楔單刀得手,打破僵局。取得優勢嘅東方,就開始穩住局勢。

失波之後嘅南區都唔係冇攻勢,只係蘇沙接應夏志明右路傳中嘅撞射,再度被葉鴻輝救出。但係隨後鄭兆聰嘅幾個調動都欠缺成效:左翼嘅許宏鋒、右後衛沈國輝助攻表現一般,入替踢左閘嘅陳港斌更喺末段兩黃一紅被逐。或者係因為三名外援傷停,令南區可以作出嘅變動不多,但係冇用上劉家銘,將蘇沙搬去右路,繼續攻擊曾錦濤等決定,其實都可以商榷。

南區末段都有列文一次頭鎚中柱,不過隨住荷西安祖接應罰球頂入,東方亦奠定2-0嘅勝局,開季維持不敗。

【最後,歡迎追蹤】
Medium:https://medium.com/@khsportsworld

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→