曾經嘅巴西新星,傑志試腳球員介紹:羅拔

場邊筆記 於 12/07/2018 發表 收藏文章

(更新:有外國網站指羅拔與巴西球會邦迪比達簽咗三個月短約,其最新消息有待傑志公布。)


傑志公布組軍消息,除咗早前已經宣布加盟嘅前利物浦中場施素高之外,新加盟外援仲有曾經效力德乙同法甲球隊嘅克羅地亞射手泰迪 (Josip Tadić)。不過令球迷更感興趣嘅,或者會係朱志光教練口中即將來港試腳嘅21歲中場羅拔 (Robert Gonçalves Santos)。

富明尼斯青訓產品、巴西U-15同U-17嘅常規正選,羅拔喺青年軍嘅履歷應該係巴西頂尖嘅級數。當時嘅羅拔被認為係一個技術全面嘅進攻中場,個人盤球技巧同速度兼備、能夠串連球隊進攻,亦有埋門嘅能力。2013年底,年僅17歲嘅羅拔就已經為富明尼斯一隊上陣。

但係好景不常,羅拔喺2014年遇上嚴重車禍,腳部骨折、肝炎同肌肉問題令佢全年無法上陣同操練。喺2015球季復出之後,羅拔亦只係為球隊後備上陣4次。復出之後,羅拔場上決定較慢、表現過於花巧,甚至喺更衣室嘅態度都曾經成為被批評嘅地方。喺青年賽事呼風喚雨嘅羅拔,經過車禍之後嘅發展明顯不如預期。

不過,巴塞隆拿仍然願意俾機會羅拔,巴塞B隊喺2016年初借用呢位巴西小將半季,並帶有收購選項。然而,羅拔喺加盟球隊嘅時候已經超重,最終亦未能喺巴塞B隊取得任何上陣機會,黯然回歸富明尼斯。事後佢亦承認車禍休戰嘅一年令佢身型走樣,體重嘅問題亦係佢嘅一大困擾。

返到富明尼斯之後,羅拔曾經被外借到國內球會兩次,不過上陣機會同樣唔多。離開富明尼斯之後,如今佢選擇嚟傑志試腳。如果試腳順利,甚至之後表現出色嘅話,羅拔可能會得到喺亞冠表現自己嘅機會,博取其他球會嘅青睞。對於呢位一時得令嘅巴西小將,香港或者會係職業生涯重新出發嘅地方。

延伸閱讀: Fluminense midfielder Robert could be shrewd investment for Barcelona

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→