史葛柏加是熱刺現時的最佳選項？ 精選

想知道更多英超英冠分析歡迎like同follow我地嘅page: https://www.facebook.com/leagueinengland

熱刺要尋找新領隊係人所共知嘅事，一直以嚟傳過好多個領隊，不過熱刺比較心水嘅，好似拿格士文同坦哈格，唔係俾其他球隊簽咗就係續咗約，啱啱仲有哈利卡尼要求離隊。熱刺仲唔快快趣確定人選嘅話，對下一季嘅發展唔係好事，但拖咗咁耐，恐怕現時可供選擇嘅最佳人選已經去到史葛柏加啦。

當然，大家都知道史葛柏加仲未夠班教熱刺，畢竟佢連教富咸都護唔到級。不過咁，熱刺又話要崇尚進攻嘅領隊，但今時今日市面上崇尚進攻嘅領隊，仲有幾多俾佢揀？最啱洗果兩個，即係上述果兩位教頭，已經俾人搶咗，咁仲有邊個俾佢揀？唔好睇富咸今季好似唔識組織攻淨係識打防反，其實佢地上季喺英冠係靠打組織進攻升班，只不過上到嚟英超明顯有實力差距先焗住要縮曬喺後場，如果俾柏加拎住熱刺嘅人腳，就算冇咗哈利卡尼冇埋孫興民都好，佢都會放膽打返佢自己比較偏好嘅進攻踢法，最多可能係對其他Big 6球隊先變一變陣。當然柏加能力上一定唔夠拿格士文勁，不過至少佢套足球理念係偏向進攻，啱曬主席利維嘅想法，而熱刺隊內的確係有部分球員唔滿意摩連奴嘅防守打法，既然請唔到拿格士文或者坦哈格，咁揾同樣係進攻型嘅柏加帶隊，絕對唔係壞事。
雖然柏加未必夠班，不過佢當然有其他優勝之處，先會令筆者覺得佢係現時嘅最佳選項，其中筆者覺得最最最重要嘅係佢名宿嘅身份。哈利卡尼要求離隊標誌住熱刺下季會進入大重整期，情況就同近年曼聯，車路士同阿仙奴經歷過嘅非常相似，而以上三隊喺中間過渡期起用嘅領隊，全部都係球會名宿。當然，林伯特同阿迪達喺自己球會嘅教波生涯可以用失敗嚟概括，而蘇斯克查都唔可以無爭議性地話係成功，但無可否認，佢地的確係喺球隊最動盪嘅時期幫到隊波手，就算三個入面最失敗嘅阿迪達都至少幫阿仙奴贏到個足總盃。名宿嘅威力在於佢嘅名氣同地位，尤其是當隊波嘅更衣室氣氛非常亂果陣，效用就更加大。類似嘅情況上至蘇斯克查頭十場九勝一和兼歐聯反勝巴黎聖日耳門，下至朗尼接掌打比郡後一度取得6場5勝壓出降班區，都有出現到。所以可以預期如果熱刺真係揾柏加接手，基本上一定會出現一段小陽春，而咁樣一段令隊波生猛返嘅表現，正正就係而家嘅熱刺最需要嘅嘢，不論係因為好長時間冇正式領隊，因為又拎唔到冠軍定係因為王牌射手要走，都好需要可以振奮到士氣嘅蜜月期，而揾名宿柏加帶隊就幾乎可以保證達到咁嘅效果。
不過，以上三個例子都出現咗蜜月期過後球隊不進則退嘅情形，咁嘅時候炒又好似對領隊不義，唔炒隊波又會繼續頹落去。但係，以利維嘅性格，佢都係將領隊用完即棄果隻，用咁嘅心態諗，選擇有英超執教經驗嘅柏加紛紛中比當時冇英超經驗嘅林伯同完全冇執教經驗嘅阿迪達更有保證。反正到時柏加將隊波執得正常返少少，然後到咗樽頸位果陣，利維都係會好狠心炒咗佢，咁不如索性將柏加視為一個過渡性領隊，最起碼止住血唔好好似死敵阿仙奴咁一沉不起。喺柏加完成佢嘅任務之後，隊波正常返就自然會有更多更有名氣嘅領隊願意接洽，到時只要請到合適嘅人選，就可能好似可以車路士揾到杜曹咁，提升返隊波去之前嘅水平。

除咗名宿光環之外，柏加仲有另一個優點，就係做改變會非常果斷。大家都仲記得富咸一開季果陣嘅水平差距係表露無遺，基本上同錫菲聯冇乜分別，同樣係超級魚腩。不過，去到而家，雖然富咸都係護唔到級，但至少唔係同錫菲聯一齊做包尾大幡，起碼都壓過西布朗以尾3排名降班，當中嘅關鍵好明顯就係先前所以嘅踢法上嘅改變。要由組織型變成防反型，不單止要將平常用開嘅部署完全改變，對富咸嚟講，仲要放低速度唔算特別標青，但上季為富咸貢獻咗差唔多4成入球嘅射手米特羅域，可想言之一開頭柏加變戰術果陣球迷同埋更衣室內部會有咩睇法。而家望返轉頭，柏加當初咁果斷做改變雖然達唔到目的，但都可以講係成功嘅。其實，早喺上年附加賽決賽，柏加同樣將米特羅域先列後備，並且改上穩守突擊踢法迎戰賓福特，最終決定令富喺果場波較為佔優，亦成功勝出升班。筆者相信如果熱刺真係揾柏加的話，佢嘅勇敢同果斷可以幫到隊波喺混亂同埋士氣低沉之中穩定返。固然佢嘅能力係差咁少少，但其他因素搭救之下，以而家熱刺嘅景況，佢都算係最佳嘅選擇啦。