另類朗尼職業生涯回顧: 救世主的晚期生涯

非Big6看英超 於 19/01/2021 發表 收藏文章
想知道更多英超英冠消息歡迎like我地嘅page: https://www.facebook.com/leagueinengland

幾日以來,大量關於朗尼生涯嘅回顧文章和影片出現,大部分都係關於他在曼聯十幾年嘅精彩時刻。筆者想做個另類d嘅回顧,睇返佢離開曼聯同愛華頓之後嘅旅程,要概括嘅話就可以用3個字形容—救世主。

首先從朗尼加盟華盛頓聯隊(DCU)開始。喺朗尼啱啱加盟果陣DCU只係東岸包尾,不過在季尾竟然殺到上第4有得打play off。朗尼可以講是完全carry曬成隊波,喺技術上面,朗尼嘅加盟令隊波喺前面有咗支點,進攻變得好順暢,佢嘅射術依然有保證,仲有罰球同埋開死球,令到DCU當時嘅進攻變到非常立體。喺精神上,成隊波因為有個世界級球員加盟,士氣喺開頭嘅蜜月期直線式上升,完全唔似排榜尾嘅球隊。第1季朗尼上陣20場射入12球同埋有6個助攻,數字上直接成為DCU嘅救世主,唔單止有幾球絕世入球,仲有其他入波亦都幫DCU脫胎換骨,用佢嘅經驗帶起咗陣中嘅球,當中上文提過嘅阿哥斯達更加係直接受惠於朗尼喺加盟而表現非常出色,一度傳過巴黎聖日耳門想簽佢,不過最後冇發生過。

期間有2球筆者印象好深刻,果陣短期內喺香港媒體2次見到有講關於朗尼嘅報道,真係覺得好驚訝。

第1球係對奧蘭多城,果陣2隊補時踢成2-2,喺差唔多最後一刻,DCU開角球,不過俾對面解圍,仲有得打反擊。喺昵個時候,速度已經慢咗好多嘅朗尼竟然喺前面追返去後面,仲可以好準確咁落腳鏟中波,偷到波之後喺半場後嘅位置,極大力斬去龍門遠柱,然後由朗尼喺DCU嘅好拍檔阿哥斯達(Luciano Acosta)接應頂入,成功絕殺。


第2球亦都係對奧蘭多城,今次朗尼就重現以前對韋斯咸做過嘅過半場笠射,結果真係笠死咗對面門將,而昵球歎為觀止嘅入球亦都係果場嘅唯一入球,朗尼再一次用超班實力直接幫DCU贏波。


當然好多人會話美職差過英超咁多,朗尼點跌watt都好過到去都仲可以有排玩,但筆者覺得可以玩到咁勁誇張真的唔係個個都得,某程度上證明咗佢當時佢仲好有實力喺英超立足,話唔定如果佢當年唔係加盟打比郡,而係去英超球隊,可好似同樣去過美職嘅伊巴帶領A米風生水起咁,再一次喺英超賽場證明自己。就算未必可以好似伊巴咁帶到隊波爭冠軍,但至少都應該可以好似迪科爾咁帶新特蘭護級成功掛。

雖然果季朗尼帶領DCU後上殺入play off,不過喺play off第1場,DCU以12碼輸俾哥倫布機員出局,朗尼就係其中一個射失。昵球射失就好似代表咗朗尼喺DCU嘅蜜月期已經完結,喺下一季,幾乎隊隊都睇穿咗DCU依賴朗尼嘅弱點,隊隊都識得揾人mark實朗尼,令佢果季嘅表現冇上一季咁作為救世主嘅存在。雖然都可以殺入play off,不過同樣喺第1場就被人淘汰,就此完結咗佢嘅DCU生涯。

之後,朗尼真係返去英格蘭,不過就唔係好似迪科爾咁去英超,而係去英冠打比郡做球員兼教練。喺打比郡果陣,朗尼主要係踢中場Deep-lying playmaker,全部入球都係罰球同埋十二碼,冇咁多機會好似喺美職果陣咁入咁多能人所不能嘅波,不過佢嘅罰球射術完全冇退步到,依然入咗幾球好靚嘅罰球。

啱啱9月對諾域治嘅比賽入面,打比郡就憑朗尼尾段嘅罰球,以1-0擊敗諾域治,終於喺英冠開齋,而昵球亦都保住咗當時領隊高古嘅飯碗(雖然最後都保唔住),做咗高古暫時嘅救世主。


昵球同時亦都係朗尼球員生涯最後一個入球,筆者果陣第一時間諗起佢破曼聯史上入球王紀錄嘅入球,同樣係罰球,同樣係比賽尾段,所以話晚期嘅朗尼變咗做救世主都絕對唔過份。


除咗入波之外,朗尼初初去到打比郡果陣,亦都重現返之前喺DCU出現過嘅事,喺技術上幫打比郡大幅提升創造力,喺精神上憑住佢豐富嘅經驗將打比郡嘅士氣大幅提升,令到打比郡由朗尼未嚟到之前只係中下游球隊,搖身一變喺復賽後幾場變成有機會爭附加賽嘅球隊,同上次一樣都繼續做救世主。不過今次做救世主嘅時間短過上次,皆因復賽之後賽程極之頻密,果陣高古依然場場用佢踢足90分鐘,加上今次嘅對手很快就睇穿咗DCU依賴朗尼嘅弱點,喺體力低同埋俾人睇實之下最後幾場發揮得幾差,而打比郡喺果幾場關鍵嘅比賽入面亦都全部輸曬,結果冇得踢play off。之後嚟到今季,打比郡喺高古嘅傳球戰術下嚟到樽頸位,搞到攻不銳守不穩跌落降班區,隨後高古被炒亦標誌住朗尼嘅球員生涯來到終章。

其實喺曼聯尾聲開始,雖然朗尼雖然唔係成日正選,但後備上場都成日可以做到球隊嘅救星,由果陣開始佢已經有救世主嘅影子,及後去到實力冇咁高嘅球會同聯賽,佢就好似救世主咁拯救咗隊波。甚至做打比郡嘅暫代教練果陣,佢亦都大幅改善咗打比郡嘅攻守表現,由之前成季只得1勝(就係上面提及對諾域治果場)變成接手之後6場不敗。不過同蘇斯克查果陣做暫代9勝1和,坐正之後即刻輸一樣,朗尼坐正之後第1場面對升班馬洛達咸即刻輸咗。希望佢之後做領隊都可以繼續球員時代嘅救世主效果啦!

如果喜歡我們的文章,請即分享到︰

標籤: 朗尼  生涯回顧  晚期  

留言


請按此登錄後留言。未成為會員? 立即註冊
    快捷鍵:←
    快捷鍵:→