放手一搏的勇氣: 紅玫瑰曼聯之勝利 精選

短短幾日，英超就連續上演兩次紅白玫瑰之戰。「首循環」曼聯喺主場憑住福仔同辛祖既入球，迫和列斯聯。「次循環」曼聯作客艾蘭路球場，傷兵滿營加上球員疲乏，喺不被睇好之下，以2:0擊倒對手。今場曼聯捱過慘不忍睹既頭60分鐘，最後憑住出色既戰術同換人調動，先扭轉局勢得以取勝。

1. 關鍵換人，立竿見影
成場波既轉捩點，係坦克喺61分鐘用利辛度馬天尼斯入替馬拉西亞。曼聯今場輪換哂一對中堅，冇錯的確可以比佢地有充足休息。可惜換嚟既係成個中後場都冇人比倒長傳去組織攻勢，加上列斯聯喺三閘線遮線，令曼聯冇辦法喺中路傳直線上去，配以邊路不惜氣力咁逼搶，連兩翼側擊都有困難。因此，曼聯早段只能不停喺後場回傳，連過半場都困難，唔好話殺入attacking third。不過換入馬天尼斯之後，梳爾打返熱悉既左閘，成個形勢即刻唔同哂。馬天尼斯除左地面搓傳之外，仲可以放長波比福仔打對手中堅身後。至於比起技術略嫌幼嫩既馬拉西亞，梳爾喺左路就多好多向前推進同疊瓦，仲交出一球靚傳中造就福仔入波。此外，喺對手後防體力逐漸下降，減少逼搶之下，加拿祖既速度同突破能力就大派用場，更加貢獻燕梳球，為曼聯鎖定勝局。
2. 角色轉換，效果顯著
馬斯亞長期倦勤，借將韋賀斯臨危受命攻堅。身高1米97既佢，一路都係擔任正中鋒，運用背身護球同set back去為隊友製作入球機會。但受制於列斯聯後場唔錯既制空力之下，加上本身前場供應好少，佢表現得患得患失。喺加拿祖入替出任左翼之後，坦克做左個好大膽既決定：安排韋賀斯墮後去中場。喺劣勢之下，放棄高中鋒支點，改為增加中場人手去創造攻勢，再推福仔想去做前場自由人快速突擊。結果韋賀斯成功加強中場反搶，做倒playmaking轉守為攻，勤力跑動亦換嚟入波機會。呢份改變既勇氣，就為球隊帶嚟勝利。
齋睇比數以為曼聯輕取對手，有睇場波就知道今仗勝利得來不易。面對主場球迷不斷嘲笑慕尼黑空難，贏波更加別具意義。起初坦克接掌曼聯教鞭，受到唔少批評。面對無數質疑聲音，佢一步一步建立自己風格，球隊成績亦穩步上揚。雖然以現時表現，曼聯仲未夠能力同歐洲列強分庭抗禮，好似呢場波就揭露晒中場串連欠奉、後防球員組織力弱、後備兵源不足等問題。尤其防守方面，麥佳亞保持麥麥送本色，連番贈送控球權比對手。但要出奇制勝，就要有放手一搏既勇氣，坦克就踏出左好好既第一步啦。
不過下次唔該唔好再出麥佳亞，以後都唔好。

————————

中意睇我文章既
記得follow我Instagram @ng.sickball