塞翁失馬，焉知非福：重拾自我的奧迪加特 精選 推薦

阿仙奴今季英超表現令人眼前一亮，高躍榜首位置，繼0304不敗神話之後，再次奪冠不是夢。球隊近況大勇，中場核心奧迪加特絕對居功至偉。

現年24歲，司職進攻中場既奧迪加特，係阿仙奴同挪威國家隊隊長，相信球迷對佢一d都唔陌生。2015年，西甲班霸皇家馬德里喺挪超球會史卓加斯特羅致當時只得16歲既佢，並同時安排佢喺預備組同一隊跟操。「奧迪加特」呢個名，一瞬間成為球壇熱話，但原來呢位挪威神童，一早喺足球場上留低歷史印記。13歲就正式為成年隊喺友誼賽初次落場；15歲已經喺頂級聯賽站穩陣腳，上陣23場攻入5球。佢加盟皇馬既第一年，喺賽季煞科戰後備入替C朗，以16歲零157日之齡，榮登皇馬歷來最年輕上陣球員寶座。

足球天才登上銀河艦隊，你以為係熱血漫畫故事開端，點知情節完全事與願違，更將呢位天才狠狠擊落凡間。奧迪加特喺皇馬頭兩年，大部份時間都喺預備組磨練自己。直至2016年年尾，佢先有機會喺西班牙盃32強，對住丙組球隊既比賽正選上陣。其後，皇馬將佢外借至荷甲海倫芬，結果就開啟左佢浪人生涯。年輕小將最大既辛酸，就係明明夢想成真，換嚟既卻係不斷寄人籬下，歸家無期。19-20球季，佢外借去皇家蘇斯達，表現依舊出色。正當大家以為佢終於可以躋身銀河艦隊，慢慢接任摩迪中場指揮官一職，20-21頭半季，轉眼已經喺皇馬第六年既奧迪加特，只係獲得7次上陣機會。年少成名既佢，敵不過歲月無情，喺星光燦爛既豪門之中，慢慢變得暗淡無光，然後消失喺球迷眼前。但原來塞翁失馬，焉知非福，呢個逐漸被遺忘既名字，隨住最後一次外借生涯，默默開啟左足球新一章。

奧迪加特一到埗阿仙奴，已經好快適應球隊風格同英超比賽節奏。21-22球季，佢以3500萬歐元正式成為兵工廠一員。佢憑住出眾既閱讀球賽能力，往往能夠控制球隊進攻節奏，為隊友製造機會，以精準傳球撕破對手防線。今季佢既腳下功夫更見成熟，總係可以洞察比賽形勢，創造入球，而佢自己既射術亦有所進步。阿仙奴喺佢帶領之下，進攻行雲流水，佢亦係今季英超最佳中場之一。由馬德里到倫敦，奧迪加特終於再次閃耀球場。
喺綠茵場上一步一足印，由銀河艦隊之失意少年，蛻變為兵工廠之靈魂人物。當初喺皇馬既艱苦歲月，今日成為佢變得更強大既助力。如今球迷從佢既眼神可以見倒，少左一份迷惘，多左一份熱情。好多潛質新星都會陷入低潮，經歷迷失。或者奧迪加特既成長並未達到大家預期，但能夠重拾自我，先有機會步月登雲。唔知佢既足球新一章，會唔會加入英超冠軍呢個情節？
————————

中意睇我文章既
記得follow我Instagram @ng.sickball