昔日紅魔青訓,今日身在何方?

NGSICKBALL 於 28/06/2021 發表 收藏文章
曼聯青訓人才輩出,球隊亦一直秉持重用青年球員既傳統。不過唔係每個後生仔都平步青雲,以下幾個冇再效力曼聯既青訓球員,對筆者嚟講都比較印象深刻。唔知大家仲記唔記得,或者又認唔認識佢地呢?

拉夫摩利臣
- 司職進攻中場
- 2010年地標戰
- 為曼聯共上陣3場
- 暫時未有班落
被費sir 形容為26年執教生涯入面,最令佢心痛既年青人,亦可能係曼聯最墮落既天才。同普巴同年既摩利臣,有同佢過之而無不及既天賦。佢盤扭技術出眾,擅長組織攻勢同處理死球。可惜,佢場內場外都紀律問題嚴重,成日練波遲到早退,又試過打交、家暴、刑事毁壞等。最後,費sir喺2015年忍痛放棄呢個才華橫溢,但自甘墜落既新星。離開曼聯之後,佢短暫踢過幾隊英格蘭球隊,輾轉之下又去過意大利同南美,最後喺今年1月同荷甲海牙解約,成為自由身球員。

占士威爾遜
- 司職前鋒
- 2014年地標戰,梅開二度協助曼聯3:0大勝侯城
- 為曼聯共上陣20場並攻入4球
- 來季將會效力英乙Port Vale維爾港
威爾遜上演地標戰之後,一直未能喺曼聯企穩陣腳,大部份時間都係外借去其他英格蘭球隊為主。佢2019年正式離開曼聯,加盟蘇超鴨巴甸。之後佢喺2020年1月轉投七小福旗下,英乙既Salford City沙福特。上季踢左28場,收穫8入球1助攻。完季之後球隊同佢解約,跟住佢就宣佈加盟同為英乙球隊既維爾港。

夏洛普
- 司職進攻中場
- 2017年地標戰,攻入先開紀錄一球,協助曼聯2:0輕取水晶宮
- 為曼聯共上陣1場並攻入1球
- 現效力英冠普雷斯頓
大家未必認得夏洛普個樣,但實會記得佢個打電話慶祝動作。佢喺地標戰一球成名之後,因為想爭取更加穩定既上陣機會,毅然拒絕同曼聯續約,轉投英冠普雷斯頓。上季佢就借左去英甲葉士域治,上陣23場,收穫1入球2助攻,來季將會回歸普雷斯頓。

查理史葛
- 司職中場
- 2004年加入曼聯青年軍,曾為U23上陣19場
- 現效力港超愉園
雖然查理史葛冇為曼聯一隊上過陣,但相信有留意開本地波既,對佢一定唔陌生。佢自細就加入曼聯青訓體系,2017年外借去蘇超咸美頓,可惜之後不獲續約,於是佢轉去英格蘭低組別聯賽球隊,但仕途都係未如理想。上季遠道而來加盟港超愉園,深受球迷愛戴。上陣22場,收穫3入球2助攻,仲入選為港超最佳11人。但愉園面臨散班危機,佢嚟緊會唔會繼續留喺香港,都係未知之數。不過佢既長傳同閱讀球賽能力出眾,攻守兼備,唯獨係體能略為遜色。有傳傑志、東方、南區都對佢虎視眈眈。

喺激烈競爭之下,被淘汰,或者選擇去尋求更大發展空間,都係見慣不怪既事。即使著上既唔再係曼聯球衣,都希望每個青訓球員都可以喺唔同舞台發光發亮。

————————

中意睇我文章既
記得follow我Instagram @ngsickball
標籤: 英超  曼聯  青訓  

留言


請按此登錄後留言。未成為會員? 立即註冊
    快捷鍵:←
    快捷鍵:→