既生瑜何生亮: 蒙特與科頓

英格蘭近年人才輩出，蒙特同科頓就係其中兩個最突出既新星。佢兩個分別係車路士同曼城既青訓產品，呢兩年佢地由嶄露頭角，去到慢慢爭取倒正選，到而家已經成為球隊進攻核心。

由於蒙特同科頓既風格同位置都有d相似，又係灸手可熱既英超班霸自家青訓仔，所以好多人都會將佢地比較。蒙特喺車仔中場線舉足輕重，可以勝任攻中、左右中場、兩翼，被譽為比昔日林伯特既全面既靈魂人物。個人技術方面，蒙特勤於跑動同逼搶，擅長突破同擺脫對手，射門同死球處理都唔錯。至於進攻組織方面，佢傳球視野良好，擅長引球走位入楔，精準既第一時間傳送，反映出佢上佳既閱讀球賽能力。今季佢表現出色，36場6入球6助攻，仲獲選為車仔player of the year。雖然佢才華橫溢，但其實佢既職業生涯，都唔係平步青雲。佢升上U23之後，先後被外借到荷甲維迪斯同英冠打比郡。19年返到車仔，先受到領隊重用既佢，偏偏就比人揶揄做「契仔」。但佢一步一步咁用實力去俘虜球迷既心，由名不經傳既後生仔，變成球隊奪冠不可或缺既功臣，仲喺歐聯決賽交出一記絕妙長傳助攻。
至於科頓，自細已經受曼城重點栽培，係青訓尖子，職業生涯可以話係扶搖直上。17年既時候，哥迪奧拿已經揚言佢必成大器，會成為球會傳奇。同蒙特一樣，科頓都係中前場既通天老倌，會根據戰術需要，去踢唔同既位置，除左攻中同左右兩翼，連假9都應付倒。大衛施華離隊之後，佢上陣機會大增，亦都累積好多寶貴既比賽經驗。個人技術方面，佢以盤扭同控球見稱，擅長突破同單對單變速過人，創造力都唔錯。至於進攻組織方面，佢走位靈活，擅長竄擾對手，恰到好處既致命短傳同無球跑動，反映出佢上佳既位置感。今季佢同樣表現出色，28場9入球5助攻，喺主將迪布尼受傷既時候，挺身而出，化成球隊進攻命脈，係曼城英超奪冠功臣。

互相競爭，又一齊進步既蒙特同科頓，都係具有足球智慧既前場多面手。蒙特比較似係playermaker，創造更多助攻同入球機會，但靈巧敏捷既科頓更擅長突破過人，入球轉化率都更加高。總括而言，蒙特既優勢在於團隊合作，但科頓既個人技術就略勝一籌。佢兩個一方面為各自球隊力爭冠軍，另一方面喺國家隊力爭正選，至今都有所成就，一個拎左英超，一個捧左歐聯。佢地都喺本土同歐洲賽場證明左自己，而下一步就係嚟緊既歐洲國家盃。英格蘭喺同一時代，有兩顆閃耀新星誕生，好多人都形容佢地做「既生瑜，何生亮」，幸福既煩惱。唔知假以時日，佢地又可唔可以更上一層樓，而邊一個又會更加成就非凡呢？
————————

中意睇我文章既
記得follow我Instagram @ngsickball