逆境自強,守得雲開: 梳爾

NGSICKBALL 於 17/04/2021 發表 收藏文章
現年25歲既梳爾,喺2014年以超過三千萬鎊轉會費,由修咸頓加盟曼聯,成為當時既「全球最貴年青球員」。之後佢既表現尚算唔錯,只不過間唔中都會受到傷患困擾。

2015年9月,喺歐聯分組賽對燕豪芬既賽事中,對手既一次粗暴飛鏟,搞到梳爾小腿嚴重骨折,被抬出場治理嗰時,更加要使用氧氣罩,仲爭d搞到要截肢。最後佢休養左接近一年,去到2016年8月先正式復出。可惜,佢繼續傷患纏身。2018年9月,佢喺歐國聯對西班牙既比賽,同卡華積爭頂之後,頭部撞落地下,再一次要用氧氣罩同擔架抬出場。

經歷多次傷患之後,球迷唔難發現梳爾有一段時間少左搏哂老命既攔截同飛鏟,踢法都慢慢偏向保守,好少殺上前場。摩連奴曾經批評佢練波態度散漫,仲不斷傳出要賣走佢既消息。之後,球迷當中都有唔少負面聲音,話佢身形走樣同冇左以前嗰種拼搏精神,同上季季尾打底左,中意後上助攻既小將威廉斯形成對比。今季蘇斯克查仲收購左擅長出波,偏向進攻型既左閘泰利斯。正當大家以為梳爾準備失寵之際,佢不單止繼續坐穩正選,仲克服傷患,回復返以前充滿侵略性既打法,成為球隊不可或缺既攻守主力。

今季梳爾暫時打左27場英超,交出1入球5助攻,仲係今季英超創造最多進攻機會既後衛。如果計哂五大聯賽所有球員既話,佢係2021年入面排第三既球員,僅次於好多球迷恨到流哂口水既辛祖同法蘭克福既哥斯迪。相比過去幾季,佢既進攻意識同效率都有顯著進步。

闊別國家隊已久既梳爾,喺世界盃外圍賽,不論助攻助守,亦都交出優秀表現。上場反勝熱刺更加踢出爭氣波「威返比摩佬睇」。希望佢可以更加成熟同穩定,最重要係保持健康,繼續踢好波啦。

————————

中意睇我文章既
記得follow我Instagram @ngsickball
標籤: 英超  曼聯  梳爾  英格蘭  

留言


請按此登錄後留言。未成為會員? 立即註冊
    快捷鍵:←
    快捷鍵:→