港隊鋒綫新希望: 安永佳

唔sickball 於 02/04/2021 發表 收藏文章
今季港超復賽之後,不論場內場外既舉動都被受關注。有「港足男神」、「香港Marco Reus」之稱既傑志前鋒安永佳就係其中一個最受矚目,炙手可熱既新星。

安永佳現年24歲,係香港同紐西蘭混血兒,細細個就開始踢傑志青年軍,亦都由U13開始代表港隊。佢先後就讀University of San Francisco同Syracuse University,代表學校參加美國大學足球聯賽。美國學界人才輩出,青年軍時期一路都係進攻球員既佢,為左爭取更多上陣機會,毅然轉型踢左閘,但表現依舊出眾,freshman year就入選西岸最佳新秀11人。

去到2019年,大學畢業之後既安永佳,未能登陸美職聯,就回流香港加盟佢既boyhood club傑志,簽佢人生第一份職業合約。與此同時,佢代表香港出戰省港盃,攻入一球以4:0大炒廣東,令佢開始深得球迷歡心。今季既安永佳踢返熟悉既正前鋒位置,更加係大放異彩。暫時佢喺傑志踢左9場港超賽事,攻入2球;菁英盃仲「雙殺」標準流浪,兩次對壘都上演帽子戲法,total 6場比賽入面,攻入8球。喺大部份球隊都用外援或者入籍兵打前鋒之際,作為港超新人,安永佳能夠喺衛冕冠軍傑志擔任正選前鋒,仲排喺射手榜第二位,只係僅次辛祖,實在唔容易。

麥基同陳七相繼退休之後,港隊前鋒一直青黃不接。每逢港隊出現新秀前鋒,大家都會又期待又怕受傷害。因為近年唔少出色既本地進攻球員,一係就後勁不繼,一係就迫於無奈越踢越後,再唔係就自我放棄。身高1米88既安永佳,雖然唔係大隻枉躉中鋒type,速度亦唔算高,但係走位靈活,有盤扭有突破,first touch同埋門觸覺都唔錯。如果佢可以加強制空能力同背身護球,傑志同港隊既攻力都可以更上一層樓。希望佢嚟緊可以鞏固正選前鋒位置,吸收多d國際賽既經驗,最理想就可以外流啦!

p.s. 佳佳真係好靚仔
p.s.2. 本地波等緊你地,入場睇啦喂
————————
中意睇我文章既
記得follow我Instagram @ngsickball
loading

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→