本地波返嚟啦！港超24-25賽季預測 精選

話咁快本地波又開季，上季個預測都有好多估錯之處(aka 燈燈地)，一於今季再試下自己眼光/燈力如何。

先講港超big 4

今季預期競爭會非常激烈，衛冕冠軍理文積極擴軍之餘，仲成功留住神射手安尼亞同助攻王艾華頓(係，你冇睇錯)。前中後三線都有新外援，但徐宏傑離隊之後，係咪有適合人選填補右閘位置，係爭冠關鍵。

上季聯賽亞軍大埔，今季除左保留哂陳肇鈞、謝家榮、加比爾呢班主力，仲有伊高沙托尼愛回家，又簽入韋法頓同尼高拉斯等增加後備力量，整體實力都有所提升。班波本身好有form同默契，筆者就覺得係奪冠大熱啦。

上季足總盃冠軍同聯賽第三既東方，都有巴杜姆回歸，雖然有鍾樂安轉投傑志，但喺盧比度帶領之下，成隊波將士用命，實而不華，加上有馬希偉同吳宇曦呢d潛力新星，好機會衝擊盃賽冠軍。

上季傑志聯賽僅得第四，來季無緣亞洲賽，所以今季陣容都有大幅改動，恩查、米基爾等悉數離隊，簽入慈英同馬查度在內既好多新球員。相信班波夾熟左之後，踢起嚟會比上季優勝。

港超聯賽: 大埔
高級組銀牌: 傑志
足總盃: 理文
菁英盃: 東方
神射手: 巴科爾

再講其餘五隊

暫時覺得五隊都屬於陪跑性質。新升班既九龍城可唔可以避免包尾，好睇條龍骨(中鋒、中場中、中堅)發揮如何。南區同流浪對陣強隊，能唔夠成為攔路虎，可能係決定聯賽冠軍既重要factor。至於港會同北區，外援同本地球員人腳上，都係北區佔優，相信港會都係較大機會爭包尾或者尾二。

預計聯賽排名:
1大埔 2理文 3傑志 4東方
5南區 6流浪 7北區 8港會 9九龍城

希望今季唔好又燈，多謝收睇，記得入場睇波呀！

-------------------------------------------------------------------------------------------------

中意睇我文章既
記得follow我Instagram @ng.sickball