有憾無悔的球王: 尼馬

NGSICKBALL 於 14/04/2022 發表 收藏文章
C朗美斯呢對絕代雙驕,眨下眼已經雄霸球壇十幾年。當年尼馬既橫空出世,令球迷充滿期盼。可惜,亢龍有悔,盈不可久,佢最後都係冇達到預期高度。

2013年,巴塞用8000萬歐元將一個冇歐洲賽經驗,但潛力無限既巴西天少年帶返魯營。佢都不負所託,第一次國家打吡,就以一傳一射奠定勝局。14-15球季,係佢功成名就既一年——歐聯、西甲、國王盃,襄括三大錦標。翌年,佢同美斯、蘇亞雷斯組成既MSN更係聞風喪膽,全季合共攻入130球。16-17球季,尼馬協助球隊喺歐聯十六強次回合大勝PSG 6:1,收服首回合0:4失地,締造歷史上一次最精彩既反cup。當年既巴塞,叫做地上最強。

但尼馬好清楚,佢從來都唔係魯營球場既主角。因為地上最強入面最強嗰個,永遠都叫做美斯。2017年,佢以破世界紀錄既2.2億歐元轉投PSG。雄心壯志既璀璨新星,決心自立門戶,帶領隊友衝擊歐聯寶座。佢要證明比人睇,自己有能力打破兩大球王壟斷,森巴足球傳人先係世界冠軍。可惜佢既巴黎之路冇想像中咁一帆風順。雖然加盟PSG之後表現持續出色,但三連霸之後,喺上季意外失落法甲冠軍。歐聯更係一次又一次失利,最接近獎盃既一次,係前季決賽飲恨輸比拜仁。今季尼馬更有顯著退步跡象,各項賽事共合只攻入6球,大失所望,喺主場都比自家球迷親切問候。

國家隊賽事,係尼馬足球事業另一個舞台,亦係佢未能翻越既一個高峰。有憾無悔既足球生涯,尼馬既遺憾係一次又一次同世界盃擦身而過。2014嗰屆,八強對哥倫比亞,比對手後衛辛尼加用膝頭撞到脊椎受傷,緣盡餘下賽事,仲要睇住隊友喺主場球迷面前比德國蹂躪1:7;2018嗰屆,大概冇人記得佢踢成點,淨係知佢個抱膝翻騰五周半,同埋巴西拎唔倒冠軍。唯一安慰係,2016年里約奧運,佢帶領巴西勇奪足球金牌,歷史首面男子足球金牌。今屆世界盃,一直盛傳係尼馬既最後探伐,但要一圓冠軍夢,又談何容易。

尼馬既球技毋庸置疑,盤扭、傳球、射術、速度、突破能力、組織同創造性,都係世界頂級水平。佢華麗同優雅既森巴足球風格,係近年碩果僅存。佢喺球場上既熱情,令佢成為現今球壇最具感染力既球員,俘虜萬千球迷既心。只係,面對對手攔截,以誇張方式過人,然後比對手更兇狠咁剷倒飛起,最後傷患不斷,係尼馬球場上既寫照。今季飽受傷患困擾,缺陣22場賽事,有人提醒佢係時候改下個花巧踢法;有人歸咎佢受左傷仲掛住開party而冇好好休養。

一直被譽為最接近C朗美斯既足球天才,三十而立,繼承世一由一步之遙到漸行漸遠。時至今日,地球人球王之位,前有利雲度夫斯基賓斯馬,後有麥巴比夏蘭特,慢慢球迷都唔記得,其實尼馬先係第一個世三。因為佢既私生活,總係吸引過喺球場上入左幾多球波,貢獻左幾多個助攻。源於沉醉享樂既天性,佢活躍於林林總總既商業活動,廣告代言贊助排山倒海之餘,社交狂歡聚會亦必不可少。佢同邊個明星名人開party,買左咩NFT,點樣同阿妹慶祝生日,永遠都喺鎂光燈下。但佢深知,足球只係佢熱愛既興趣同事業,享受生活先係佢人生座右銘。打開佢ig,你就明白咩叫work life balance。

練波練足就得啦,你叫我做多兩節gym咩,不如陪下家人朋友好過,橫掂我仲fit過你。有憾無悔,盡情活出真我固然無悔,衝擊世一失敗自然有憾。不過最憾嗰個,可能係仲等緊佢高舉金球獎同世界盃既球迷,好似係。

————————

中意睇我文章既
記得follow我Instagram @ng.sickball

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→