拜利的去或留

唔sickball 於 05/04/2021 發表 收藏文章
最近有唔少傳聞提到,拜利因為希望有穩定既上陣時間,猶疑緊同唔同曼聯續約。佢喺2016年以3000萬鎊由維拉利爾轉投曼聯,至今一路表現理想,深受球迷歡迎。跟住落嚟,筆者會講下佢既長處同弱點:

優點1
身體對抗性強,體力極佳
拜利身高1米87,對比1米94既麥佳亞,佢既身體對抗性過之而無不及,但就多一份靈巧,少一份笨重。佢最擅長就係箝制勸於跑動同走位既靈活型前鋒,呢樣亦係麥佳亞同連迪路夫都未必好搞得掂既。佢亦係喺曼聯芸芸眾多中堅入面,體能條件係最好既一個。

優點2
攔截果斷,預判搶截準繩
好多球迷傾向選擇拜利多過連迪路夫,係因為拜利球風硬朗,防守時顯得非常勇猛。喺球場上不時見到佢踢到飛沙劈石,奮不顧身咁飛鏟對手。仲有,佢防守反應好快,擅於預判對手攻勢,快一步破壞佢地傳球路線。

不過拜利都有佢既弱點,令曼聯一直希望尋找一個更適合既中堅人選。

弱點1
傷患問題嚴重,經常缺陣
蘇斯克查選擇連迪路夫擔任正選中堅,除左係佢個人偏好之外,筆者認為都可能同拜利既身體狀況有關。畢竟一個容易受傷既球員,用得太多又怕觸發佢一d舊患。佢一直深受傷患困擾,2019年更加因為膝傷同做手術缺陣超過200日,總共錯過34場賽事。今季touch wood佢暫時都未見嚴重傷患,不過喺4月5日確診COVID-19,希望佢都早日康復,回歸戰線。

弱點2
偶爾有奇怪失誤,派膠收場
拜利有時會犯一d非常低級既錯,出現驚險鏡頭,例如高難度動作解圍撻Q,企錯位包左越位,同埋發夢mark漏人。不過,大家都應該留意倒,曼聯另外兩位正選中堅都係咁上下不穩。

拜利可唔可以遠離傷患,保持良好出場狀態,係佢能唔能夠競逐曼聯正選位置既關鍵。除非佢要求天價人工,否則筆者都好希望拜利可以續約留隊,畢竟健健康康既拜利,點都穩陣過連迪路夫囉。

————————
中意睇我文章既
記得follow我Instagram @ngsickball

如果喜歡我們的文章,請即分享到︰

標籤: 英超  曼聯  拜利  新型肺炎  

留言


請按此登錄後留言。未成為會員? 立即註冊
    快捷鍵:←
    快捷鍵:→