征服香港的黑山神鋒: 丹恩奴域

唔sickball 於 09/10/2021 發表 收藏文章
現年40歲,身高1米87既既丹恩奴域,以頂級入球觸覺同門前把握力見稱,擅於喺前線走位同牽引對手。高壓既跑動逼搶,亦都令對手防守球員疲於奔命,稍不留神就喺後場犯下致命錯誤。丹贊彷彿成為左入波既代名詞,呢場梅開二度,嗰場連中三元。無論正選定後備,落親場就交足功課。

丹贊既職業生涯始於塞爾維亞和黑山第三級聯賽球會貝爾格萊德冼迪歷,跟住短暫踢過另外幾支本土隊伍。2007年外借去沙特班霸沙特艾阿里之後,嶄露頭角,就開始前往亞洲發展。佢先後效力韓職FC首爾、水原藍翼同FC大邱,以及中超既江蘇同北京國安,拎過塞爾維亞、黑山、沙特同韓國聯賽同盃賽冠軍。成名於韓職既佢,顛峰期喺FC首爾仲拎左三屆聯賽神射手(2011-2013)同亞冠盃亞軍(2013)。國際賽方面,佢代表塞爾維亞和黑山同黑山總共上陣30場,攻入8球,不過對上次代表國家隊出戰已經係2015年既事。單計CV,丹贊未必喺香港外援中名列前茅,但以個人同球會榮譽嚟計絕對冇得輸。

自評同基奧特一樣係「傳統老派前鋒」既丹贊,以38球成為亞冠歷史入球王。做唔倒銀河唯一,但都係亞洲第一。征戰亞冠賽場十五載,終於超越宿敵韓國名將李同國,但佢一d都未敢鬆懈,仲希望將入球記錄越推越遠。40歲既佢話比大家聽,年齡只係數字。

丹贊第一季登陸港超,就以17個入球榮獲聯賽神射手同入選最佳11人,仲贏埋香港足球明星選舉,成為三料足球先生。大家講笑話佢好似電競選手玩beginner mode咁,但輕鬆征服香港球壇,都係緣於佢既律己以嚴,對運動員體格同訓練態度既嚴謹執着。傑志喺亞冠賽事刷新香港球隊佳績(分組賽3勝2和1負),丹贊絕對功不可沒。相信呢一刻大家最希望既,就係佢可以喺傑志踢到掛靴。

P.s. 睇開歐洲波既朋友,有冇發現以前好似冇一隊國家隊叫「黑山」?黑山係歐洲巴爾幹半島小國,前稱南斯拉夫,之後改國名做塞爾維亞和黑山,亦喺2006年宣佈獨立。2010年世界盃外圍賽,係黑山第一場正式國際比賽。前祖雲達斯中鋒胡仙歷同哈化柏林既祖維迪都係丹贊同鄉。

————————

NGSICKBALL x HKPL.DAILY 合作企劃
中意睇我文章既
記得follow我Instagram @ngsickball

如果喜歡我們的文章,請即分享到︰

標籤: 香港足球  港超聯  傑志  丹恩奴域  

留言


請按此登錄後留言。未成為會員? 立即註冊
    快捷鍵:←
    快捷鍵:→