對足球哲學堅持的男人: 陳曉明

唔sickball 於 17/09/2021 發表 收藏文章
曉明sir喺好多人眼中,係個擅於分析戰術同球員特點,有自身一套足球哲學既「學院派」教練。佢喺正式教職業球隊之前,都係一個運動健將。中二開始就做足球隊隊長,更加代表港隊踢五人足球。中學畢業之後,佢以舊生身份執教St Paul校隊,正式變成曉明sir,開啟佢教練之路。

2004年,當時29歲既曉明sir,放棄中學教席,全職做足球教練,而佢第一隊執教既,就係啱啱升上乙組,以年青球員為骨幹既香港08。2006年,佢去左甲組升班馬和富大埔,協助球隊護級,嶄露頭角。2010年係曉明sir最接近冠軍既一次,佢亦開始建立佢既足球哲學。佢崇尚兩翼側擊戰術,執教天水圍飛馬時期,中前場人腳踢法適合、陣式執行性強,令曉明sir套戰術如魚得水。最後天水圍飛馬勇奪聯賽、聯賽盃同足總盃亞軍。

但正正係因為佢對自身戰術既堅持,好少會為左個別球員而去轉換踢法,往往就需要時間比球員適應。2018年,曉明sir正式擔任理文教練,仲有愛徒兼好拍擋達sir曾昭達做助教。但當時球隊陣中工兵較多,中場組織力欠奉,翼鋒同兩閘傳中質素參差。戰術應用唔嚟,成績自然未如理想。不過理文選擇繼續信任曉明sir。

去到18-19季尾,就係曉明sir既里程碑。菁英盃決賽,理文以3:2擊敗佳聯元朗,勇奪球會歷史上首個錦標,亦係佢執教生涯15年嚟第一個冠軍。上季更加係理文暫時成績最好既一季: 聯賽第三、亞協盃晉級四強。曉明sir套足球哲學,喺理文身上越見奏效。中路掃蕩逼搶,兩翼側擊傳中,中鋒set back/入楔,再加上兩閘打內收型邊後衛(inverted full back,當中場壓前進攻,就收入中路負責逼搶同保護中堅)。聽落好似好common既戰術,雖然執行起嚟時時未必盡如人意,但總好過下下pass the ball to xx (隊中外援)。

由西瓜波去到學界足球,由大學interhall去到港超同亞協,呢位球場哲學家越走越遠,一步一步登上高峰。但不變既係,佢對自身一套足球哲學既堅持。曉明sir曾經講過,球迷對本地波就係爭咁d情感上既連結,所以佢會諗有咩去驅使人支持理文。可能仲有好多中意足球既香港人對港超冇乜歸屬感,但支持理文既原因,相信大家都已經揾倒了。

————————

NGSICKBALL x HKPL.DAILY 合作企劃
中意睇我文章既
記得follow我Instagram @ngsickball

如果喜歡我們的文章,請即分享到︰

標籤: 香港足球  港超聯  理文  陳曉明  

留言


請按此登錄後留言。未成為會員? 立即註冊
    快捷鍵:←
    快捷鍵:→