另一半係球迷既入嚟!歐國盃女友/男友指南

唔sickball 於 08/06/2021 發表 收藏文章
話咁快又到四年一度既歐洲國家盃。賽事因為疫情延期一年,有驚無險咁將會喺6月11號開鑼,今屆歐國盃有Mirror Error幫手造勢,關注度絕對不遜於世界盃。係球迷既你地,另一半可能未必認識足球係咩一回事;至於唔係球迷既你地,另一半都好可能會睇下波既,咁就要睇下呢篇「歐國盃女友/男友指南」啦!

1. 參賽選手
「曼聯定利物浦會攞冠軍呀?」
歐洲國家盃,顧名思義係由歐洲國家既足球隊組成。你地另一半平日捧開既曼聯同利物浦,係歐洲國家入面既球會,而唔係國家隊嚟,所以係冇份參加歐國盃架,不過佢地有唔少既球員都會代表返自己國家參賽既。如果你另一半同你講,曼聯拎倒歐國盃冠軍就乜乜乜既,筆者真係恭喜你呀。

「點解冇碧咸同美斯既?」
碧咸已經46歲,退左役八年架啦。至於美斯係阿根廷人嚟,請移玉步去睇美洲國家盃。

2. 賽事時間
「點解你晚晚都捱夜睇波架?」
因為歐國盃係喺歐洲舉行,同香港有時差。場波喺當地時間下晝至夜晚踢,咁香港人咪要凌晨捱夜睇波囉。

「場波幾時完啫?」
一場足球比賽一般嚟講都係90分鐘,不過場波有時可能會成兩個幾鐘頭。因為去到一場定生死既淘汰賽階段,90分鐘和波既話,係要踢多30分鐘既,如果都仲未決定倒勝負,就要射十二碼架啦,所以係答唔倒你場波exactly幾時完架。

3. 比賽內容
「咩係越位呀?」
越位既意思係,進攻方接球球員比對手守門員以外最後既防守球員更接近對手龍門。人話翻譯:總之就係進攻球員跑得太快企錯位所以犯規啦。睇圖就明架啦。

「成場波入得一兩球,有咩咁好睇喎」
唔係球迷既人會聚焦喺入波,都係好合理既事,但對於球迷嚟講,每一下傳波、射波、過人、攔截,都有值得欣賞之處,一場0:0既比賽都唔一定悶到抽筋架。你諗下d明星say個hi,班fans都依嘩鬼叫啦,唔通佢嗰下hi又好有實力好有技巧咩。

「咩係VAR呀?」
VAR = video assistant referee 影像助理裁判,啫係喺比賽途中暫停,然後即時replay返一d爭議性場面,例如手球(守門員以外既球員唔可以用手掂波)、十二碼、越位等等,輔助球證作出判決。不過VAR好多時候反而令到個判決有更多爭議,詳情可以問返你另一半。

4. 睇波心態
「輸波咋嘛,有咩好喊啫」
中意一樣野就自然投入,投入就自然緊張,緊張就自然有情緒。你會為韓劇主角死左而喊,你既另一半都可以為支持既球隊而喊。同埋老老實實,輸波真係可以好傷心囉。與其深究佢點解會喊,不如攬下佢安慰下佢好過啦。

「唔緊要啦下場再嚟過」
不過安慰既說話都記得唔好亂講,因為去到歐國盃既後段,會進入淘汰賽,輸波嗰隊係直接foul出局架。

5. 其他注意事項
- 如果你冇特別preference,請同另一半支持同一個國家,以免炒大鑊
- 幾斯文既人睇波都可能會好激動,粗口呢d就少不免,唔使大驚小怪
- 當你另一半大嗌「比牌呀」(黃牌紅牌)/「十二碼」/「黑哨」(球證判決唔公平) /「越位呀」既時候,請毫不猶疑地表示認同,再同佢一齊嗌
- 靚仔唔一定好波,好波唔一定靚仔,如果你另一半有踢波,請緊記佢先係最好波嗰個

有個球迷男朋友/女朋友既你地,可能未必明白22個男人追住個波有咩咁好睇。但兩個人相處就係互相遷就同陪伴,你肯抽時間去陪佢做佢中意做既事,或者等佢可以安心睇波唔使怕你發脾氣,係一個好好表達愛意既方法嚟架。至於有個唔識波既女朋友/男朋友既你地,人地完全睇唔明都肯陪你,就唔好嫌人煩同乜都問啦,睇波又好,拍拖又好,都係想開心啫。最後,聽講將share呢篇文比越多人,搵倒另一半既機會就越大架啦。識做啦咁 :o)

————————

中意睇我文章既
記得follow我Instagram @ngsickball

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→