一球成名定一早成名?捷克神鋒舒希克

唔sickball 於 20/06/2021 發表 收藏文章
歐國盃捷克以2:0擊敗蘇格蘭,當中捷克第二球遠射更加射入歷史中,以49.7碼成為有史以嚟呢項盃賽最遠既入波,入球功臣前鋒舒希克仲成為左媒體既焦點。而家就同大家介紹下呢位號稱「捷克伊巴」既神鋒。

舒希克今年25歲,187cm高,效力利華古遜,喺29場德甲攻入9球。不過佢既職業生涯一d都唔係平步青雲,捱過左唔少艱苦己時刻,先有今日既成就。佢出身於國內勁旅布拉格斯巴達既青訓,早喺青年時期已經獲得四大聯賽球探垂青。2016年,佢轉會去到意甲既森多利亞,以35場11球5助攻既出眾表現,為祖雲達斯留低左深刻印象。尼維特當時盛讚呢位後生仔潛質優厚,令佢諗起當年既伊巴,於是球會準備以2500萬歐元將佢收歸旗下。點知天意弄人,正當舒希克以為可以一登豪門之際,喺加盟前既體測,佢出現心律不正既情況,令交易無奈告吹。就係咁樣,佢錯失左轉投班霸既機會,取而代之既,係佢喺陰差陽錯之下,去左意甲另一老牌球會羅馬。佢以先借後買既形式轉會。可惜佢喺新東家表現一直未如理想,除左飽受傷患困擾,仲對球隊頻繁變更既陣式同戰術無所適從,總共踢左58場,只係入得8球,肩負唔起高達4200萬既身價。

失意於意甲既舒希克,決定挑戰德甲賽場,可以話係重獲新生。2019年佢被外借去RB萊比錫,28場賽事攻入10球;2020年佢比利華古遜用2650萬鎊買斷,36場賽事攻入13球,喺夏維斯離隊之後,為球隊補充返d火力。

舒希克身形高大,但佢並唔係空中霸王type前鋒。雖然佢制空力唔弱,但佢最大既優勢在於埋門準繩度同靈巧腳法,盤扭同個人突破都唔錯,仲擅長背身停球,同埋第一時間分邊比隊友進攻,有齊中鋒應有既技術特點。今次呢球世紀金球令佢再次獲得媒體關注,而佢都證明左比大家睇,佢都仲係嗰個潛質優厚既「捷克伊巴」,咁唔知今屆歐國盃佢又可以帶領球隊行到幾遠?

————————

中意睇我文章既
記得follow我Instagram @ngsickball

如果喜歡我們的文章,請即分享到︰

標籤: 歐國盃  捷克  舒希克  金球  

留言


請按此登錄後留言。未成為會員? 立即註冊
    快捷鍵:←
    快捷鍵:→