原創分析:利物浦對曼聯,中場爭奪成勝負關鍵

英超第二次雙紅會,利物浦主場迎戰曼聯,結果係謝拉特下半場領紅的情況下最終以 1:2不敵曼聯。

今場比賽可謂由「師公」雲高爾對「徒孫」羅渣士,兩人足球理念同受巴塞控球式踢法影響,但二人對球隊的表現方式明顯不一,羅渣士更加強調進攻方面,相反雲高爾比較之下防守空間更為緊湊,而 343對戰 433陣式係英超聯賽中並不常見。

今季季初雲高爾和羅渣士都花了不少時間找出球隊最適當的陣式及人選,利物浦係季初試了不少陣式,442、451、433等陣式都嘗試過,最後以 343陣式這個甚少球隊使用的陣式迎接下半季賽程。而曼聯亦不遑多讓,352、442、451、433等等陣式曼聯亦幾乎全都試過,最後 433的表現確比之前好好多。




係分析時先不談謝拉特的紅牌,單係上半場曼聯表現的確係利物浦之上。
馬達入球



馬達入球源於利物浦前場失球開始,值得注意的係當時利物浦中場係失球後位置依然偏前,如果利物浦可以快速搶回控球權的話當然無問題,但相反曼聯長傳找到中場費蘭尼。




軒達臣已經來不及回防費蘭尼,利物浦防中位置只剩一人面對兩名曼聯中場,另外值得注意的係利物浦三中堅係位置上輕微偏右。



雖然摩蘭奴已經從前場跑回來,但明顯之前摩蘭奴係位置上走得太前,令摩蘭奴及沙高之間擁有太多空間令馬達有機可乘。

係下半場初段羅渣士換入謝拉特,目的非常明顯,加強中場硬度及長傳能力。但可惜事與願違。紅牌令利物浦處於劣勢。



係十人應戰下,利物浦再失一球,又係馬達入球。



當時卡域克長傳靴里拉,係無人壓迫防守下靴里拉嘗試自己射門,吹毛求疵要批評一下的是祖亞倫距離靴里拉太遠了。



當時靴里拉推順後射門被阻出,但足球再落在馬達腳下。




當時摩蘭奴上前釘緊馬達,個人認為此刻摩蘭奴沒有問題,馬達亦十分巧妙地和迪馬利亞進行 one two,各位球迷可以留意當時馬達除了傳給迪馬利亞,靴里拉附近亦沒有人防守。



但之後摩蘭奴沒有好好釘緊馬達令馬達有機可乘,當然必要一讚馬達的半窩利射門十分精彩。



明顯可以見到係馬達的半窩利射門時,摩蘭奴係位置上和馬達有一小段距離。

馬達係上下半場梅開二度多少均和摩蘭奴失位沒有釘緊馬達有關。另外甚為可惜的係謝拉特職業生涯的最後一次英格蘭打吡竟然以紅牌結束。雖然史杜列治係少打一人,落後兩球情況下依然射入一球,但無法協助利物浦迫和。

今場比賽除了曼聯表現出色之外,利物浦自己表現、失誤亦明顯偏多,今季利物浦擁有高達 83%傳球成功率,但今場比賽只有 74%,當中不少係無太大壓力下傳失。



除此之外利物浦中場二人祖亞倫、軒達臣的確不夠費蘭尼硬朗,曼聯的費蘭尼及靴里拉二人的鏟截次數明顯係利物浦之上。兩人合共有 11次成功鏟截,可謂令利物浦中場完全無法有效組織,加上費蘭尼贏得全場最多的 11次頭鎚爭頂,令利物浦完全沒有空中優勢。

個人認為有利物浦中場有少少「格食格」感覺。當利物浦面對偏技術型的中場例如曼城、阿仙奴、熱刺時,祖亞倫及軒達臣表現明顯較好,相反面對硬朗型或「爛仔型」中場例如史篤城、維拉、曼聯等中場表現明顯差一大截。如果利物浦球迷記得今季兩次對修咸頓時表現的話,都應該記得利物浦中場面對對方硬朗的中場球員雲耶馬時可謂吃盡苦頭,個人認為長遠而言羅渣士必要購入一名硬朗的防守中場加強中場硬度以應付對方硬朗的中場。
總括而言,係英超只剩八輪聯賽的情況下曼聯領先利物浦5分之差,相信前四對曼聯而言幾乎係囊中之物。

費蘭尼全場精華
https://www.youtube.com/watch?v=-SbxPh2BuCE
覺得小弟寫得都 ok的話或者想要更多 Liverpool資訊,可以到 facebook 專頁按個讚,支持下啦。
https://www.facebook.com/myheartisredlfc

標籤: 利物浦  曼聯  羅渣士  雲高爾  謝拉特  

留言


請按此登錄後留言。未成為會員? 立即註冊
    快捷鍵:←
    快捷鍵:→