未聽過? 為你介紹歐聯分組賽中 7支非主流聯賽球隊

係尋晚已經舉行的 2014-15球季歐聯分組賽的抽籤,除了一些大家耳熟能詳的球隊之外,今屆 32支球隊中亦有唔少非歐洲主流聯賽球隊。以下為大家介紹一下七支分組賽中非歐洲 UEFA十大聯賽 (西班牙、英格蘭、德國、葡萄牙、意大利、俄羅斯、法國、烏克蘭、荷蘭、比利時)的球會。


Group A:

Olympiakos 奧林比亞高斯 (希臘)



受歐洲幾年前金融風暴影響,希臘整體經濟受嚴重影響,而不少希臘球會亦波及,整個希臘聯賽係 UEFA排名亦滑落到第 13名,可謂近年最低,不過幸好班霸奧林比亞高斯依然可以進入分組賽。

奧林比亞高斯可謂希臘聯賽中的傳統勁旅。對不少香港球迷而言,相信印象最深係上季歐聯 16強比賽,奧林比亞高斯憑阿仙奴借將祖爾甘寶主場以 2:0擊敗當時莫耶斯帶領的曼聯,可惜作客以 0:3敗於曼聯,兩回合合計差少少打敗曼聯,不過表現應該已經令唔少球迷驚訝。

不過上兩季主要入球球員美度古 Konstantinos Mitroglou及借將祖爾甘寶已經離開,未知實力有多大影響。幸好隊中另一前鋒,前巴塞名將沙維奧拿 Javier Saviola依然留隊,相信將會成為入球主要來源,另外巴塞借將阿費利 Afellay能否係奧林比亞高斯「重生」將影響球隊成敗。


Malmo馬模 (瑞典)

你可能未聽過瑞典球會 Malmo馬模,但其中一個Malmo馬模青訓出身球員你一定聽過,無錯,佢就係瑞典前鋒伊巴謙莫域。

伊巴謙莫域係 Malmo馬模青訓出身,1999年 17歲時已經被提升到一隊,係1999年至2001年期間於瑞典超級聯賽中上陣 40場比賽射入 16球,表現可謂相當不俗。

當時伊巴謙莫域的表現已吸引英超阿仙奴領隊雲格注意並邀請伊巴到阿仙奴。當年伊巴去到倫敦後,雲格要求伊巴進行試腳,而伊巴認為依然需要試腳係侮辱自己,結果阿仙奴就此錯失一個神鋒,伊巴謙莫域真係何其霸氣。



除了伊巴謙莫域, 前利物浦球員、芬蘭藉的列馬倫亦曾係職業生涯晚期 2005至07年效力過 Malmo馬模。

Malmo馬模最佳成績係 1979年打入歐洲聯賽冠軍盃決賽,亦係暫時唯一一支瑞典球會打入歐聯決賽,當時敗給諾定咸森林。

另外 Malmo馬模亦係自 2000年以來成功進入歐聯分組賽的瑞典球會,今屆歐聯資格賽 UEFA CL Qualification Malmo馬模擊敗奧地利班霸薩爾斯堡紅牛進入歐聯分組賽,相信瑞典人應該對 Malmo馬模充滿期待。


Group B:

Basel 巴素利 (瑞士)

相比同組保加利亞球會 Ludogrets,相信大部份球迷對這瑞士球會並不感到陌生。巴素利全名 Football Club Basel 1893,近年一直稱霸瑞士超級聯賽,亦係近年歐聯常客。巴素利上屆係歐聯分組賽對車路士時連贏兩次,可惜不敵史浩克 04無緣晉級。

巴素利陣中有幾名球員值得留意。包括曾效力利物浦,現年 31歲的右後衛 Philipp Degen。Philipp Degen 08-11年效力利物浦期間不斷受傷患困擾只有上陣 13次,英超聯賽 7次上陣,之後轉會德甲史特根,2011年回到青訓球會巴素利。

後防線上除了 Philipp Degen,25歲中堅 Fabian Frei亦值得留意。前季曾經傳過阿仙奴領隊雲加看中 Fabian Frei。Fabian Frei同時亦係瑞士國家隊 2014世界盃成員之一,實力不錯。另外前國米阿根廷藉後衛森美爾 Samuel現時亦效力該瑞士球會。

而係進攻上,上季效力另一支瑞超球會草蜢的攻中 Shkelzen Gashi今季轉投巴素利。Shkelzen Gashi上季代表草蜢上陣 32場射入 19球,今季係瑞士超級聯賽上陣 6場已經射入 4球,狀態大熱。



巴素利陣中最為亞洲人熟悉的球員可能係今季買入的日本前鋒柿谷曜一朗。上季柿谷曜一朗為大阪櫻花射入21球,今季係巴素利上陣 4場比賽 191分鐘射入 1球並交出 1個助攻。

當然最重要係隊中中鋒,33歲、身高 1.96米的 Marco Streller。Marco Streller 2007年已經效力巴素利,上季 25場射入 10球,今季係瑞士超級聯賽上陣 4場射入 3球,必須小心應付。


Ludogorets 盧多格雷斯 (保加利亞)



Ludogorets全名 PFC Ludogorets Razgrad,中文譯做盧多格雷斯,係上屆保加利亞聯賽冠軍。

盧多格雷斯上屆參加歐聯附加賽敗給今屆同組的巴素利,無緣進入歐聯分組賽。不過係歐霸盃成績唔錯,32強擊敗意甲拉素打入 16強,16強則敗於華倫西亞。

今屆盧多格雷斯係歐聯附加賽先後擊敗盧森堡的 F91 Dudelange、塞爾維亞貝爾格萊德球會柏迪遜 FK Partizan、最後一輪更以互射十二碼擊敗傳統東歐勁旅,羅馬尼亞首都球會布加革斯特星隊 FC Steaua Bucuresti打入歐聯分組賽,同時亦係球會第一次打入歐聯分組賽。

圖為盧多格雷斯上屆係歐霸成績,面對荷甲勁旅 PSV及意甲拉素依然可以獲得勝利,證明實力並不弱。




Group F:

APOEL (塞浦路斯)



APOEL FC係位於塞浦路斯首都尼科西亞的球會。APOEL FC可謂國內班霸,曾經20次獲得聯賽冠軍和 18次塞浦路斯杯冠軍。

APOEL FC 近年係歐洲賽事成績算係不錯。係 2002-03球季APOEL FC首次打入歐聯第三輪資格賽 CL Qualification Third round,2009-10球季 APOEL FC終於打入歐聯分組賽。係 2011-12球季更歷史性淘汰法甲球隊里昂打入歐聯 8強比賽,最後才係 8強賽不敵皇家馬德里。

不過今次抽籤對 APOEL而言可謂下下籤,同組對手包括巴塞隆拿、巴黎聖日門及 Ajax 阿積士,相信應該難以「偷雞」。

現時 APOEL FC係 UEFA球會排名第 52。


Group G:

Maribor 馬里博爾 (斯洛文尼亞)



相信 Maribor 馬里博爾會係另一支香港球迷甚為陌生的球隊,但其實馬里博爾係歐聯進級過程中淘汰蘇超傳統勁旅些路迪進級分組賽,證明實力並不太弱。不過暫時新球季係國內聯賽 5輪比賽後只係排名第四,相信同時亦要分心國內聯賽成績下難以有好表現。


Group H:

BATE 巴迪 (白俄羅斯)




白俄羅斯球會BATE 巴迪絕對係國內一支獨秀的「超級班霸」,由 2006年起開始連續 8年成為國內聯賽冠軍。同時BATE 巴迪亦可謂歐聯常客 ,近年多次打入歐聯分組賽,包括 2008至09球季、2011至12球季、2012至13球季以及今個球季都成功進入分組賽,不過每次都係分組賽出局,未曾成功再進級 16強比賽,且看今季可唔可以有所突破。

BATE 巴迪亦係前阿仙奴、白俄羅斯飛翼希比Alex Hleb的母會,2012年 31歲的希比回流自己成名地 BATE 巴迪,直到上季季中希比再次外闖到土耳其球會。


覺得小弟寫得都 ok的話或者想要更多 Liverpool資訊,可以到 facebook 專頁按個讚,支持下啦。
https://www.facebook.com/myheartisredlfc

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→