曾經,我不喜歡拉蘭拿

今季高普上任利物浦的第二個球季,利物浦成績比之前明顯有所改善,入球數字更係英超廿隊之冠,當中幾名前場球員絕對係功不可沒,包括今季大突破、暫時為利物浦射入 7個入球的拉蘭拿。

拉蘭拿係 2014/15以二千五百萬英鎊由修咸頓加盟利物浦,在當時算係利物浦陣中轉會費較高的球員。係加盟利物浦前,拉蘭拿為修咸頓射入 9個入球並交出 5次助攻 (部份數據分析網站計算為 6次),加上修咸頓隊長身份以及擁有英藉球員少有的出色控球技術,因此當時不少利物浦球迷都對拉蘭拿抱有很大期望,希望拉蘭拿、巴洛迪利等新加盟進攻球員能夠盡量減輕蘇亞雷斯離隊對利物浦的影響。



係加盟利物浦首個球季,拉蘭拿的發揮並不算亮眼,英超上陣廿七場只射入 5球以及交出 3次助攻,數據明顯比修咸頓時大為失色。

有觀看球賽的球迷都會知道,拉蘭拿每次上陣都會彷如「拚命三郎」般不惜氣力左奔右跑,但當時實際對球隊幫助並不如預期中那麼重要,無論翼鋒或其他進攻位置,拉蘭拿的進攻表現只能算是勉強合格。珠玉在前,利物浦整體低迷的進攻表現更令球迷懷念離隊的蘇亞雷斯。

到上一個球季,利物浦最大變化莫過於高普成為新領隊。無論領隊個性、球隊踢法,高普和羅渣士都可謂大相逕庭。對一些係羅渣士年代表現一般的球員而言,今次的轉變可以說是一個重新證明自己實力的契機,例如費明奴以及安利簡等表現都明顯更上一層樓,中堅洛夫雲亦較之前更為穩定。

係上個球季,即使拉蘭拿表現比首個球季有所改善,但個人依然認為只能說是平平無奇。作為前場攻擊球員,入球、助攻、機會製造等數據可以說是球員的「成績表」,不過拉蘭拿係聯賽上陣超過二千分鐘只射入 4球及交出 6次助攻,如果說首個球季係「蜜月期」,需要時間和隊友建立默契,那麼第二個球季的表現應該要更進一步。



要說拉蘭拿表現差嗎,但拉蘭拿係場上卻非常勤力,只要拉蘭拿上陣,每場都會不惜氣力「走上走落」,每場的跑動距離一定係場上 Top3,印象中拉蘭拿更曾成為英超廿隊球員中總跑動距離 Top5球員之一。入球不多但卻非常關鍵,上季拉蘭拿聯賽 4個入球中不乏重要入球,例如主場 3:0擊敗曼城、作客補時階段反勝諾域治等。

要說拉蘭拿表現好嗎,上季拉蘭拿對球隊的幫助明顯不及新加盟的費明奴,更遑論古天奴。作為 playmaker,個人一直認為拉蘭拿的傳球偏向保守,而且有時控球時間太長,特別係在邊路的控球、無謂盤扭偏多而拖慢進攻節奏,對比利物浦另一翼鋒或 playmaker位置的古天奴,拉蘭拿係傳球、助攻等都比明顯比下去。無論作為翼鋒抑或 playmaker,拉蘭拿係入球、助攻、機會製造等數據都只算是普普通通。

過去利物浦陣中有不少球員「百x成材」,當中最經典的算係由背負「水貨」之名到成為隊長的軒達臣。不過拉蘭拿和其他「百x成材」的球員例如軒達臣、奧歷治、史達寧等不同,現年 28歲的拉蘭拿已經不是黃毛小子,加上連續兩季表現不差但又不算突出,因此小弟以為拉蘭拿已經「見底」,不會期望拉蘭拿有任何突破。

係今季開季之前,利物浦前場購入文尼、韋拿度姆兩名中前場球員,加上原有的古天奴、費明奴、奧歷治等球員,一開始還會懷疑拉蘭拿能否爭到一席正選位置,不過半季過後,這些懷疑立即一掃而空。



今季高普改變拉蘭拿係場上的位置,由 433陣式的翼鋒位置改到較後的中場,效果立竿見影。半季過去截至目前為止,拉蘭拿為球隊上陣十七場射入 7球並交出 7次助攻,半季的數據已經超過以前兩個球季,更重要係拉蘭拿繼續發揮所長,利用用不盡的體力在場上不斷走動補位,如果大家有留意今季利物浦的比賽,大家可以發現不論前場、中場、後場都有拉蘭拿的身影。除此之外,拉蘭拿今季減少了一些無謂控球,反而利用文尼、費明奴等拉開的空間入攝射門和組織,結果拉蘭拿今季的表現不單單以「更上一層樓」形容,個人甚至認為拉蘭拿的表現可以說是脫胎換骨。




係剛剛對曼城的比賽,拉蘭拿亦成為利物浦取得勝利的無名英雄。首先拉蘭拿係上半場助攻韋拿度姆頂入奠定性一球,除此之外可能不少球迷並沒有留意到,拉蘭拿係比賽中亦有 4次成功鏟截 tackles,和軒達臣並列場上之冠,大大減輕利物浦防守壓力。



曾經,我不喜歡拉蘭拿,過去一直覺得拉蘭拿總是有一種「食之無肉,棄之有味」的感覺,亦以為拉蘭拿實力已經「見底」,不過事實證明只要找到適合自己的位置,肯搏肯捱定有出路,拉蘭拿能夠係今季大爆發絕非僥倖。

各位球迷如果想要更多 Liverpool資訊,可以到 facebook 專頁按個讚,支持下啦。
https://www.facebook.com/myheartisredlfc

如果喜歡我們的文章,請即分享到︰

標籤: 利物浦  拉蘭拿  高普  

留言

會員
我要評論
請按此登錄後留言。未成為會員? 立即註冊
  • Kitming Wong
    Kitming Wong 於 01/01/2017 評論 NO. 1

    佢未黎利記時
    我已經印左佢國家隊件衫

  • 竣成
    竣成 於 01/01/2017 評論 NO. 2

    他不是台湾某电台美食主持人吗?

  • Tak Pang
    Tak Pang 於 01/01/2017 評論 NO. 3

    下年先係真。對決!高普戰術用左喺球隊已一年,加上又入左d自己想要嘅人,其待哥帥下年夾熟隊波後會變成點
    Ps. 好想佢入番vv

  • Chan John
    Chan John 於 01/01/2017 評論 NO. 4

    一直都咁愛佢❤

  • 景頁熹
    景頁熹 於 01/01/2017 評論 NO. 5

    lalalalalalallala

  • Heiman Leung
    Heiman Leung 於 01/01/2017 評論 NO. 6

    不嬲覺得佢唔錯

  • Tak Pang
    Tak Pang 於 01/01/2017 評論 NO. 7

    拉拉拉不樓都好,利記我最like佢

  • Carson Lei
    Carson Lei 於 01/01/2017 評論 NO. 8

    愛上了 ❤️

  • 蔡耀安
    蔡耀安 於 01/01/2017 評論 NO. 9

    原來已經28歳...

  • 鄒凱賓
    鄒凱賓 於 01/01/2017 評論 NO. 10

    今屆好fit

  • Dan Lau
    Dan Lau 於 01/01/2017 評論 NO. 11

    嗱嗱嗱

  • Kaya Yeungkawai
    Kaya Yeungkawai 於 01/01/2017 評論 NO. 12

    Love his passion!

  • 鄭家駿
    鄭家駿 於 01/01/2017 評論 NO. 13

    14-15真係成篤屎咁,不過成功需苦幹,終於有收成

  • Ryan Cheung
    Ryan Cheung 於 01/01/2017 評論 NO. 14

    英格蘭少有好技術嘅球員

  • Rainbow Leung
    Rainbow Leung 於 01/01/2017 評論 NO. 15

    早係修咸頓已經好喜歡佢
    利申:曼迷

  • Iris Wong
    Iris Wong 於 01/01/2017 評論 NO. 16

    一見鍾情

  • Micky Yen Hao
    Micky Yen Hao 於 01/01/2017 評論 NO. 17

    是利物浦我就愛.. =)

  • Siu Fung Tsang
    Siu Fung Tsang 於 01/01/2017 評論 NO. 18

    從未試過唔鐘意佢,佢係修咸頓個陣已經鐘意佢,英格蘭少有嘅技術型球員

  • Leung Man Kin
    Leung Man Kin 於 01/01/2017 評論 NO. 19

    呢個無名英雄係好野黎架

  • Gerrard Chim
    Gerrard Chim 於 01/01/2017 評論 NO. 20

    唔識波既咪咁諗囉

  • Ken Muk
    Ken Muk 於 01/01/2017 評論 NO. 21

    修咸頓時期巳經愛上

  • Zen Zen
    Zen Zen 於 01/01/2017 評論 NO. 22

    佢在修咸頓時已經喜歡這球員

  • Ka Wai Lee
    Ka Wai Lee 於 01/01/2017 評論 NO. 23

    七入球七助攻,跑動距離最多
    係咪英超最全面既球員?

  • Wilson Yuen
    Wilson Yuen 於 01/01/2017 評論 NO. 24

    今季真系對佢改觀

  • Raymond man
    Raymond man 於 01/01/2017 評論 NO. 25

    已經愛上了😀

  • Gary Tsang
    Gary Tsang 於 01/01/2017 評論 NO. 26

    初初到個位根本唔啱佢打,宜家絕對係主力之一

  • kinfung
    kinfung 於 01/01/2017 評論 NO. 27

    不嬲不嬲,通常衣d時候就會有好多先知走出泥

  • Manson So
    Manson So 於 01/01/2017 評論 NO. 28

    上季好增佢,成人扭失波!今季成熟咗,希望佢同法明奴入球及助攻都可繼續增加。💪YNWA

  • Lok Seng Siong
    Lok Seng Siong 於 01/01/2017 評論 NO. 29

    想当初 官方网站通知知道他加盟后 我就立刻去买他的球衣了 感恩 他没有让我失望❤️

  • Lok Lee
    Lok Lee 於 01/01/2017 評論 NO. 30

    最尾個段正正説出高普講過球員心態先係最緊要, 佢一定俾機會呢d球員

  • Arnold Wan
    Arnold Wan 於 01/01/2017 評論 NO. 31

    由佢初黎報到已經唔錯啦 就算點衰都唔夠巴神 摩蘭奴 羅帥時既路夫蘭衰 甚至都好過隻250 而家就更加唔洗講喇=]

  • Simon Fong
    Simon Fong 於 01/01/2017 評論 NO. 32

    係修咸頓時唔錯,一過利記跌晒watt,以為係一季球員,今屆則肯定咗自己價值。

  • Ngai Ngai Ngai
    Ngai Ngai Ngai 於 01/01/2017 評論 NO. 33

    真心佩服高普、佢用既人打高幾班

  • Don Chan
    Don Chan 於 01/01/2017 評論 NO. 34

    曾經,我不喜歡路夫蘭

  • Frankie Ip
    Frankie Ip 於 01/01/2017 評論 NO. 35

    曾經,我都同筆者有同感,係佢攞左波之後成日控波過人但又過唔到,係佢到斷䌫都斷得幾嚴重,但今季真係正好多

  • Paddy Ku
    Paddy Ku 於 02/01/2017 評論 NO. 36

    我曾經都不喜歡

  • Ivan Chun
    Ivan Chun 於 02/01/2017 評論 NO. 37

    一早已經愛上佢

  • Shing Ho Yue
    Shing Ho Yue 於 02/01/2017 評論 NO. 38

    LALALA >>>f4

  • Alex Wong
    Alex Wong 於 02/01/2017 評論 NO. 39

    第一季黎利物浦已經印佢波衫,佢係修頓個時已經覺得佢正,羅渣士激發唔到佢,但都睇到佢好努力!有時覺得佢有啲似古治!

  • Ka Kui Lam
    Ka Kui Lam 於 02/01/2017 評論 NO. 40

    高普今季將拉蘭拿發揮加盟利物浦最高水準,完全進步神速,就算近幾場冇古天奴,拉蘭拿完全做到代替佢角色,呢樣要贊一贊高普,揾到拉蘭拿最佳位置!

  • Chi Hin Wu
    Chi Hin Wu 於 02/01/2017 評論 NO. 41

    本身佢係技術好好既球員,剛加盟利記時,其實並吾係當時利記最需要用到既球員,所以帶動吾到對波之餘,自己亦越踢越沉,但幸好佢同軒仔都有好好心態,好球員遇到好領隊,自然可以發揮到佢地既潛能。今年,有四位球員刺激到成隊球員既發揮,第一,文尼,令到進攻元素多左n倍。第二,古天奴既覺醒,分擔左大家壓力。第三,沉著應戰既費明奴, 佢既配合,佢既走位,佢專做一d吃力不討好工作,令到大家可以有更多空位,有更多傳球路線選擇。第四,占士米拿,堵塞左左後防呢個最大既弱點,充滿智慧既防守同後上配合,穩定既發揮,為隊波提供穩定既支援。呢四位,都激發左所有球員既潛能,今到佢地今年大躍進。當然,領隊高普世界級功力亦係關鍵中既關鍵。

  • Chi Hin Wu
    Chi Hin Wu 於 03/01/2017 評論 NO. 42

快捷鍵:←
快捷鍵:→