從一而終,細數英超中一生只效力一支球會的球員

上次介紹過一些球員甘願冒「猶大」、「叛徒」之名也要轉會球會宿敵,不過並非所有球員都會如此令球迷傷心,亦有唔少球員願意為愛他們的球迷付出所有,從一而終到退休,one man one club,以下球員絕對值得大家尊敬。(以下所有球員均已退休,除了最後一位球員,其他球員以出道年份排列)


阿當斯 Tony Adams
效力球會: 阿仙奴
效力年份: 1983年 - 2002年


如果亨利、韋拉係阿仙奴千禧年代的代表人物,那阿當斯、伯金絕對係 90年代阿仙奴的代表人物之一。

阿當斯從阿仙奴青訓出身。早年出道,17歲已經第一次為一隊上陣。之後係成為常規正選的 1986/87球季立即為球隊贏得聯賽盃冠軍。1988年以年僅 21歲之齡成為阿仙奴史上最年輕的隊長,可謂少年得志,風光一時。當年係格拉咸帶領下,四名後防包括阿當斯、保特、右後衛迪臣、左後衛溫特本被稱為 famous four,四人組成當時阿仙奴後防銅牆鐵壁。




可惜少年得志後,阿當斯同當時另一英格蘭天才橫溢的中場加斯居尼一樣出現酗酒問題,阿當斯甚至試過醉酒駕駛被判入獄。分別在於阿當斯之後戒酒成功,專心足球事業。

之後係新領隊雲加帶領下,阿當斯重拾光輝,同門將施文、另一中堅基昂、右後衛迪臣、防中韋拉等組成新一代阿仙奴銅牆鐵壁。阿當斯、基昂兩個中堅鎮守中路、加上防中韋拉,硬朗的踢法為阿仙奴係 1997/98球季奪得英超聯賽冠軍、足總盃雙冠王。

2002年阿當斯以 35歲結束球員生涯,2004年入選英格蘭足球名人堂 English Football Hall of Fame。

作為「阿仙奴先生」Mr Arsenal,阿當斯絕對係忠心不二,甚至曾經講過: 「只要係阿仙奴給我的合約,我會毫不猶疑簽名。」 “I will sign every contract Arsenal put in front of me without reading it.”,更見忠誠可貴。





加利·基利 Gary Kelly
效力球會: 列斯聯
效力年份: 1992 - 2007


作為年輕一代英超球迷,不少人應該唔知當年列斯聯皇朝的厲害,當時列斯聯一直係英超前列球隊,係 1998/99球季打入歐洲足協盃四強,到 2000/01球季列斯聯甚至係歐聯進入四強。不過之後經營不善,僅三個球季後係 2003/04球季列斯聯更要降級英冠。當時不少陣中球員只好無奈離開。

加利·基利身為列斯聯皇朝的右後衛,到之後列斯聯淪落英冠,可謂見證球隊的由盛轉衰。患難見真情,加利·基利對球隊一直不離不棄,無論球隊成敗,他都一直默默留係列斯聯支持球隊。從 1992年起,加利·基利為列斯聯效力 16年,上陣 531場比賽後,最終係 2006/07球季以32歲之齡退休。

最後一場列斯聯主場賽事中,幾位前列斯聯傳奇球員 Paul Reaney, Allan Clarke, Mick Jones特別頒發一個水晶花瓶給加利·基利,感謝他為球隊的貢獻。

加利·基利亦係當時列斯聯左後衛 Ian Harte的舅父 (不過其實兩人只差三年),二人更曾係英超同場上陣。





史高斯 Paul Scholes、加利尼維利 Gary Neville、傑斯 Ryan Giggs
效力球會: 曼聯
效力年份: 1994年 - 2013年、1992年 - 2011年、1990年 - 2014年


作為曼聯 class of 92一代,六人可謂羸盡所有球會錦標,亦係曼聯係 1999年「三冠王」的重要功臣。美中不足的係 class of 92六人中只有三人一直留係球隊,菲臘·尼維利轉會愛華頓、畢特轉投紐卡素、碧咸轉投銀河艦隊皇家馬德里,只有三人一直為曼聯王朝付出所有。毫無疑問,史高斯、加利尼維利、傑斯都對曼聯有舉足輕重的影響。歷史沒有如果,不過如果無 class of 92六人,費格遜依然可以建立曼聯王朝嗎?

三人中傑斯效力曼聯最耐,1990年已經出道,恐怕傑斯出道時不少讀者還未出生。24年以來絕大部份時間係球隊左翼絕對人選,亦成為費格遜強調兩翼齊飛戰術的重要棋子。傑斯為球隊上場963場,亦係球會出場最多紀錄,而連續 24個球季為曼聯上陣紀錄相信短時間內難以改寫。

加利尼維利自出道以來一直係曼聯及英格蘭必然正選右閘,同當年碧咸係曼聯或英格蘭都成為最佳右路拍檔。加利尼維利係堅尼 05年離隊後更接過隊長臂章,可見費格遜肯定他的領導能力及對球隊的重要性,2011年以剛好 400場英超比賽結束球員生涯。

史高斯可能係 class 92六人中最默默耕耘,最低調的一個。不過對不少當年英超球迷而言,史高斯的炮彈式遠射可謂深入腦海。除此之外,史高斯最令人難忘的係從初出道的前鋒、輔鋒、攻中、到退休前防守組織中場,史高斯係隊中除了中堅外其他中路角色都曾踢過,而且每個位置都踢得八面玲瓏,個人一直認為史高斯絕對係過去多年來英格蘭球員中最 underrated 的球員。

史高斯係 2010/11球季後退役。但半季後 2012年1月,史高斯係費格遜力邀下再次復出,可見史高斯對曼聯影響深遠,缺乏史高斯的曼聯中場可謂天淵之別。最後史高斯為曼聯上陣 676場,成為曼聯歷史排名第三上陣球員。

即使作為利物浦球迷,個人依然非常尊敬史高斯,場內默默付出,無論領隊要求踢任何位置都可以處理得宜,場外私生活檢點,從來與緋聞絕緣,絕對係其中一個英格蘭球員榜樣。

三人退役後各有不同生活,加利尼維利現時為 Sky Sport評述員,同時亦係英格蘭代表隊助教。傑斯依然照留係球隊擔任助教。




京治 Ledley King
效力球會: 熱刺
效力年份: 1998年 - 2012年


同蘇甘保相比,兩人位置上相同、亦係體格強壯的黑人中堅,但最大分別係兩人一人竟然加盟宿敵球會阿仙奴,而另一人就對母會熱刺忠心耿耿,從一而終。

以中堅而言,京治速度甚高、而且位置感強,必要時亦可以上前一格到防中位置。係英格蘭國家隊便曾出任隊中防中。

作為高質素中堅,京治最可惜係出道以來一直受膝傷困擾,很少球季可以完整踢完一個球季。作為熱刺主力球員兼隊長,京治只有兩個球季係英超上陣超過 30場比賽,大部分球季都在傷病中度過,直接影響場上表現。但只要京治完全康復,京治依然係熱刺中堅位置的首選,係 2009年雜誌 The Times 更把京治選熱刺史上第 25位最佳球員。

無奈京治長期受膝傷困擾,係 31歲之齡,為熱刺係英超上陣 268場後,京治選擇提早結束球員生涯,現在為熱刺宣傳大使。



加歷查 Jamie Carragher
效力球會: 利物浦
效力年份: 1996年 - 2013年


加歷查係當年少數由利物浦青訓出道的利物浦球員。作為近年利物浦青訓球員,有趣的是加歷查年幼時其實係利物浦同城宿敵愛華頓球迷。

加歷查係當年利物浦青年軍贏得 1996年青年足總盃 FA Youth Cup的其中一位主力,當年陣中還有另一青訓奧雲,之後兩人都被提拔升上一隊。從 1996年出道以來,加歷查除了防守出色勝任中堅位置,亦因為可以出任後防所有位置例如左閘、防中等而被委以重任,可謂利物浦後防通天老倌。

作為利物浦球迷,相信不少人不會忘記加歷查同希比亞拍檔中堅組合,當年加歷查同希比亞正正係 2005年利物浦奪得歐聯冠軍的關鍵成員之一。加歷查同希比亞組成的中堅組合可以話係利物浦近二十年最穩健的組合。

係2013年5月19日,加歷查為球隊上陣最後一場比賽迎戰 QPR,以 508場英超紀錄結束球員生涯。除了英超,加歷查總共為利物浦上陣 737場比賽,係利物浦歷史第二多上陣球員。

現在加歷查同宿敵曼聯球員加利尼維利同為 Sky sports評述員。




拿鐵斯 Matthew Le Tissier
效力球會: 修咸頓
效力年份: 1986年 - 2002年


如果講從一而終,one man one club的話,一定一定不可不提拿鐵斯,年輕一代球迷可能唔知拿鐵斯是誰,但希望今日起你可以知道他的名字。



拿鐵斯係聖徒的青訓產品,曾經和舒利亞等被認為係英格蘭新一代希望,由 1986年係修咸頓出道直到 2002年退休,拿鐵斯係一間球會效力達 16年之久,前後上陣 540場射入 209球,他的盤扭射門依然為人津津樂道。

可惜修咸頓實力有限,加上英格蘭國家隊亦非勁旅,16年職業生涯從沒有贏過任何錦標,但拿鐵斯依然忠心耿耿。對比之前介紹的球員,他們都曾為自己的球隊贏得過一些錦標,例如英超冠軍、歐聯冠軍、足總盃甚至聯賽盃等,而拿鐵斯卻明知效力修咸頓無法為他贏得大賽錦標,依然留效更顯得忠誠可貴。

過往不少人認為如果以拿鐵斯實力唔係效力修咸頓的話,成就一定會更大。但拿鐵斯卻認為如果他唔係效力修咸頓的話,他就無可能係球場上有出色表現,愛自己球隊的心絕對係令人肅然起敬。

建議年輕球迷睇下拿鐵斯當年表演。



覺得小弟寫得都 ok的話或者想要更多 Liverpool資訊,可以到 facebook 專頁按個讚,支持下啦。
https://www.facebook.com/myheartisredlfc

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Tsin Long Fok
    Tsin Long Fok 於 06/09/2014 評論 NO. 1

    Gerrard?

  • Kelvin Chelsea
    Kelvin Chelsea 於 06/09/2014 評論 NO. 2

    泰利-3-?

  • RoyCn
    RoyCn 於 06/09/2014 評論 NO. 3

    泰利同謝生都未退役😓

  • Kafai Gor
    Kafai Gor 於 07/09/2014 評論 NO. 4

    雲佩斯

  • ヴィンセン卜 パク
    ヴィンセン卜 パク 於 07/09/2014 評論 NO. 5

    講真,Le Tissier係當年英格蘭國家隊的中場中僅次肥仔嘜的天才但亦係最無運選入英格蘭國家隊的中場
    無記錯Le Tissier的12碼亦係英格蘭所有聯賽中少有的極高命中率,披甲16年好似只係miss 1次12碼

  • Ricky Ho
    Ricky Ho 於 07/09/2014 評論 NO. 6

    Giggs呢?

  • Yin Simon
    Yin Simon 於 07/09/2014 評論 NO. 7

    謝拉特

  • 文偉
    文偉 於 07/09/2014 評論 NO. 8

    拿鐵斯好野

  • Tong Kinlam
    Tong Kinlam 於 07/09/2014 評論 NO. 9

    朗尼啦

  • Alan Ngai
    Alan Ngai 於 07/09/2014 評論 NO. 10

    朗尼係 愛華頓轉會的!謝拉特仲未退役

  • 查理寧
    查理寧 於 07/09/2014 評論 NO. 11

    身不由己,如皇馬,魯爾,古迪,米蘭的阿柏天尼,

  • 亞康
    亞康 於 07/09/2014 評論 NO. 12

    希望泰利都可以啦…

  • Shuk Wah Chan
    Shuk Wah Chan 於 07/09/2014 評論 NO. 13

    平生不識拿鐵斯……佢當年肯走,曼,利,阿排哂隊。個人認為佢根本就係球王級數,就因為佢係細球會,國家隊都唔係常客。作為曼迷,有場對聖徒輸3比2,就係因為呢杯拿鐵連中三元,感到心痛之餘,也暗地裡為他叫好!

  • 東坡居士
    東坡居士 於 07/09/2014 評論 NO. 14

    终於有人識欣賞好波之人……

  • Ronaldo Kaka Maradona Messi
    Ronaldo Kaka Maradona Messi 於 07/09/2014 評論 NO. 15

    拿鐵斯所攻入嘅入球,9成都沒有助攻, 都係憑一己之力......

  • Kit Mill
    Kit Mill 於 07/09/2014 評論 NO. 16

    689

快捷鍵:←
快捷鍵:→