原創分析:淺談利物浦對修咸頓、新特蘭 (進攻問題)

淺談利物浦 vs. 修咸頓、新特蘭 (進攻問題)

註: 今次利物浦賽後分析由球迷 Lee Jeremiah分析。

同樣,面對著「泊大巴」的球隊。

同樣,受著中前場主力球員缺陣影響。

筆者嘗試在這兩仗戰況相近 (雖然戰果不一)的比賽中,指出利物浦的進攻組織問題,尤其是針對三位中場球員:安利簡(Can)、軒達臣(Henderson)、韋拿杜姆 (Wijnaldum)。

安利簡:百感交雜

防守上,安利簡善用身形的能力確實保護了利物浦防線不少,但他「望波唔跟人」又不時帶來驚險場面。

進攻上,他盤扭的膽量及技術不時為利物浦製造機會 (尤其對比較保守的軒達臣),但他的傳球質素又較飄浮,而且射門質素有待改善:過去兩仗射門7次,無一次中目標。



軒達臣:「過份」保守

軒達臣目前在陣中屬於一個墮後的防守中場;相比兩閘球員,他後上的頻率、參與度較低,反而較多時候與兩名中堅形成三人防線。但他的「保守」讓利物浦面對泊大巴的球隊時,較難推進。
首先,是軒達臣保守的企位。相信不時觀看利物浦賽時的讀者也可留意到,利物浦邊路進攻的支援往往減少,傳球往往會回到中路。但軒達臣慣常留在兩名中堅附近,未能善用對方中場的空位推進。



第二,是軒達臣保守的走位。尤其在缺少拉蘭拿(Lallana)和古天奴(Coutinho)的情況下,中場的機動性減低。當軒達臣向前傳球時,他並未有向前走位,只是較保守的留在後方,令利物浦難以向前推進,反而只是不斷的回傳。面對泊大巴的球隊,「快」是製造機會的一大技巧,但當發動攻勢的軒達臣未有走位時,利物浦未能以簡單快速的 “one-two” 突破,難以進攻。



第三,是軒達臣保守的傳球。他習慣「睇定」才作出傳球,不時會錯失瞬間出現的空位。



當然,高普可能安排他擔任墮後的角色及位置,但能否多一點的靈活性,尤其面對泊大巴的球隊,重現快速的 “one-two”,或有冒險多點的傳球及企位,甚至遠射,增加利物浦的進攻力度?

韋拿杜姆:猶豫不決

韋拿杜姆確實需要時間適應新的右中場角色,因為他現時需要參與更多組織的工作;他傳球/射門的決定有時顯得太猶豫,浪費了一些機會。



筆者肯定三位角色是有一定的實力及潛質 (尤其是安利簡),但現時陣中的位置角色不一定是最適合他們。面對這「位置角色錯配」,利物浦未來會否迎來新的中場球員?

各位球迷如果想要更多 Liverpool資訊,可以到 facebook 專頁按個讚,支持下啦。
https://www.facebook.com/myheartisredlfc

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Wilson Chan
    Wilson Chan 於 27/11/2016 評論 NO. 1

    但軒達臣個位,如果佢衝上去但俾人截咗,就好易俾人傳到心臟位甚至失波,我覺佢保守冇問題,佢主要職責都係保控球權同防止對手打反擊。

    反而老母就真係應該做多啲野,佢明明係進攻人才,但嚟到極少上腳,唔知係高普order定點。

  • Alan Hung
    Alan Hung 於 27/11/2016 評論 NO. 2

    其實前幾場都見到安利簡/韋拿杜母會同軒達臣有默契地一個上前另一個就守,但今場唔知係安利簡慣性衝左上去定係真係軒達臣保守,基本上都係佢逗後,靈活性明顯降低左。

  • Cheng Tsz Him
    Cheng Tsz Him 於 27/11/2016 評論 NO. 3

    Can傳波真係差,還是應該說創造力低,尤其是高波!
    對住大巴球隊應該向前走多D,或者有時上去頂波二傳,身材好需要有這個責任企出來做頂波工作。
    杜姆就應該要在禁區頂靜待一腳波兜入去,或者大膽D傳直線入禁區。
    軒達臣防守的第一道防線係需要,我認為個波在右路攻勢時,占士米拿可以過去中間偏左幫守,以防萬一,或者有需要就前插。

  • Sunny Wu
    Sunny Wu 於 27/11/2016 評論 NO. 4

    同意樓上,不同意軒達臣走位上「保守」,少前插,個人認為正正係他有效執行戰術紀律的表現,一個墮後組織防中,最重要做既係幾樣野:不斷現位令中堅和閘不會被對方焗死迫死而保持控球權、將球由後場傳到前場、作為雙中堅前的屏障保護禁區頂、當失去控球對方反擊時一係直接攔斷對方傳球,一係纏住對方帶波球員令隊友可以有時間回防,最後係控制節奏轉邊組織攻勢和搶斷後放長傳反擊。如果經常前插,幫中後場互傳和防對手反擊兩方面就好易出問題,不是說不可以前插,但真係要睇得好準才可以做。
    而軒達臣真正再要改善的,應該係控制節奏和轉邊組織攻勢,現在他的腳下功夫都係比較粗糙,一些頂級中場可以一控一傳的處境,他都可能要控多一兩下才傳到,慢左少少就差好遠,節奏的變化亦唔夠多,要嘗試由慢慢猜突然轉快,才可以打亂對方的防守。不過,高普對他的改造都只係過了三份一季而已,隊長仲年輕,相信還可以見到很多進步的。

  • Peter Pun
    Peter Pun 於 27/11/2016 評論 NO. 5

    以前對住弱隊成日都失分 個個都掛住攻 所以軒仔更加著重防守 避免陰溝裡翻船

  • Bart Tsui YW
    Bart Tsui YW 於 27/11/2016 評論 NO. 6

    安利簡下半場表現有好到
    見佢交波少左錯誤

  • Frankie Leung
    Frankie Leung 於 27/11/2016 評論 NO. 7

    個人感覺 軒達臣 做左 成隊嘅一塊重力牆,真係唔可以輕易走開,否則即使前場迫搶成功,陣腳都幾飄,萬一搶唔到俾人打番轉頭,真係衰多二錢重。

  • Frankie Yip
    Frankie Yip 於 27/11/2016 評論 NO. 8

    問題咪就係無左拉蘭拿囉...完~

  • Gary Kwan
    Gary Kwan 於 27/11/2016 評論 NO. 9

    正正係can嘅冒失,先令軒達臣更為保守。如果can稍為穩陣少少,軒達臣就可以同佢互換位置。我相信作者都一樣認同,軒達臣係有能力打前一格,而且效果會比can好,後上能力強,而且有條件打速率高嘅onetwo。或者咁講,如果用盧卡斯代替can,效果可能更好。

    好認同作者寫can嘅缺點,佢要上高一個層次就必須要改善表現飄忽嘅問題,而且對比其他中場球員,佢嘅速率的確係差一截,今季利記咁強勢,某程度上都要歸功於中場傳球速度高、迫搶快,自從can打正選以嚟利記行軍明顯慢咗。

  • Ykai Leung
    Ykai Leung 於 28/11/2016 評論 NO. 10

    中場3 個質數有限,冇一個派牌人

  • Ares Ngan
    Ares Ngan 於 28/11/2016 評論 NO. 11

    軒神作為防中 前面有個經常失波既can 唔認同佢上去助攻會更好 今場對面長時間9個10個係禁區頂守 LB 同RB 都經常殺埋上去 特別係C2 今場打到好似翼咁 而can 一係推失一係吊高個波傳失 好需要留返防中係度頂住 如果比對方一個反擊搞掂 到時更加難攻 所以要先做好防守 唔可以因為攻唔入就連防中都壓埋上去 要釋放軒神 我同意其他師兄講法 換lucas 出黎將軒神打前一格

  • Dan Lau
    Dan Lau 於 28/11/2016 評論 NO. 12

    根本系廢

  • Ka Sing Chan
    Ka Sing Chan 於 28/11/2016 評論 NO. 13

    認同,這3個中塲太慢了不夠速度,而且軒仔有時可以自己射門的情況下他反而揾人交波,可以大胆D自己射門,真係要認真正視問題!😮

  • Siteper Gasir
    Siteper Gasir 於 28/11/2016 評論 NO. 14

    James 頂lalala. Monero 安守本份回防?可否

  • Chorus Ng
    Chorus Ng 於 29/11/2016 評論 NO. 15

    對擺大巴時候,我覺得可以用番摩仔打左閘, 用origi 打單箭頭, firmino 踢 lalala 個位的組織型前場 , 中場三個可以不變,突別對住會打反擊的隊伍,我覺得軒仔企得後反而保障左人地防反

快捷鍵:←
快捷鍵:→