原創分析:巴塞隆拿對利物浦,以曼城為鏡,放棄控球

利物浦係歐聯四強首回合三球不敵巴塞,今次三球大敗甚至係利物浦今季各項比賽首次三球不敵其他球隊,當中原因包括領隊部署、傷患、把握力等幾個不同因素組成。

利物浦雖然曾在歐聯擊敗不少歐洲強隊,包括 PSG、曼城、拜仁等球隊,但近年首次面對巴塞,利物浦係戰術上顯得有所不足,今次文章簡單對比利物浦過去係強強對陣的控球數據,巴塞如何面對傳中,以及巴塞如何為勝利放下身段,改變一貫控球在腳的踢法。

以往利物浦遇強越強,其中一個主要原因係利物浦「遇強即屈、借花獻佛」,在強強對碰時往往放棄無謂控球,加強防守,讓對方掌握控球主導比賽,但利用死球、對方後防犯錯,兩閘準繩長傳加上反擊等方法撕破對方防線。單以反擊而言,利物浦今季係英超已經 6次藉反擊入球,係二十隊中排第三。




利物浦今季係英超以及歐聯分別擁有平均 58.7%和 52.3%控球率,但剛巧係擊敗其他 Big6及歐洲強隊的幾場比賽,利物浦都明顯比平時少了不少控球,例如在英超雙殺熱刺的兩場比賽中,利物浦只有 39%及 48%控球;在作客擊敗拜仁的比賽中,利物浦亦只有 42%控球,比首回合主場賽和拜仁時少了 7%控球。另外在上年歐聯八強對曼城兩場比賽,當時利物浦分別只有 31%及 33%控球,但利物浦卻能把握對方後防犯錯奠勝;相反今季曼城擊敗利物浦比賽中,利物浦反而獲得 51%控球。

雖然並不一定每次利物浦擊敗強隊時的控球百分比都特別低(例如擊敗車路士的比賽有62%控球),而且控球百分比和比賽結果沒有絕對的必然關係,但明顯今次巴塞汲取了曼城上季慘痛教訓,係今場比賽放棄一貫控球在腳的踢法,加強防守,巴塞今季係西甲及歐聯分別平均有約六成控球,但上場巴塞只有 47.5%,令利物浦大部份時間空有控球但老鼠拉龜。


巴塞隆拿西甲、歐聯平均控球

除此之外,巴塞係防守利物浦的傳中時明顯花了不少功夫。利物浦今季係英超以及歐聯場均有 19和17次傳中,成功傳中則為 4.6及 4.4次,當中主要來自兩閘準繩傳中製造威脅,因此利物浦右後衛阿諾 TAA因傷缺陣可謂影響深遠,亦令左後衛羅拔臣成為重點防守對象,今場羅拔臣依然有 2次成功傳中但威脅不大。

眾所周知,今季利物浦兩閘助攻能力冠絕英超,不過祖高美斯的傳球能力遠遠不及 TAA,TAA在歐聯擁有 2次助攻及 2次關鍵傳球 Key passes成為隊中之冠,而今場祖高美斯只有一次傳中但不成功,間接令利物浦少了一道破密度防守的利器。

除了 TAA,費明奴的傷患問題嚴重影響賽前部署。毫無疑問費明奴對利物浦前場的重要性實在不言而喻,而韋拿度姆雖然係攻擊球員出身,但近年在高普「改造」下,韋拿度姆在利物浦的埋門觸感已大不如前,今場甚至零次射門,31次觸球亦係前場球員中觸球最少,從結果來看,今次安排實在令人費解。



利物浦球員場上位置

最後雖然巴塞以三球擊敗利物浦,但從 Expected goals (xG)來看並不如實際比分差距那麼大,今場 Expected goals比分為 2.15:1.58,對比另一場歐聯四強比賽熱刺對阿積士,那場比賽實際比分和 Expected goals比分更為接近,xG比分和實際比分差異說明蘇亞雷斯、美斯的把握力實在恐怖得可怕,而美斯的靚絕罰球更說明美斯為何是當今最佳球員。




總括而言,無論係戰術安排、球員把握力、以及傷患影響等各方面,巴塞都比利物浦更勝一籌,次回合利物浦回到主場更不太可能放棄主導權,但如果面對一心放棄控球的巴塞,背水一戰的利物浦不太樂觀。
各位球迷如果想要更多 Liverpool資訊,可以到 facebook 專頁按個讚,支持下啦。
https://www.facebook.com/myheartisredlfc

標籤: 利物浦  歐聯  巴塞  控球  

留言


請按此登錄後留言。未成為會員? 立即註冊
    快捷鍵:←
    快捷鍵:→