傳統 Poacher前鋒的末落,從科拿、「小豆」靴南迪斯說起

最近係網上見到下面的卡通圖,只要你有留意足球的話,即使你未必係皇馬、曼聯的球迷,相信睇圖你亦已然猜到圖中的球員是誰,他就係有「小豆」之稱、墨西哥前鋒靴南迪斯。



靴南迪斯係 2010年世界盃表現一鳴驚人,之後係夏季轉會英超球會曼聯。靴南迪斯加盟後亦不負眾望,係首場社區盾對車路士的賽事已經射入一個入球,之後表現一直非常搶眼,係第一季更經常係後備入替後取得入球,成為新一代「後備殺手」。作為利物浦球迷,當然對靴南迪斯恨之入骨啦,但小弟亦同時不禁非常佩服靴南迪斯的走位以及射手觸覺。

靴南迪斯走位非常靈活,特別係擅長於門前把握入球機會。但問題係為甚麼如此出色的前鋒,無論係費格遜時代、莫耶斯、以及雲高爾執教後都無法獲得正選上陣機會,而外借皇馬試用後皇馬亦無意收購呢?

要解釋,得先從近幾十年的足球演變說起。

傳統足球上,即使不同國家、聯賽都有不同主流陣式,但當中絕大部份都不離開 442、343、352、433等幾個陣式,雙前鋒或三前鋒可謂必然之選,直到近十年左右時間防守足球才大行其道,單前鋒的 451陣式的出現大大改變了前鋒的角色以及所需的條件。

傳統足球中無論使用甚麼陣式,雙前鋒或三前鋒互相合作,例如一個走位拉開空檔、另一個入楔;或係一個「高q大棍」,另一個把握力十足;或係兩個都走位靈活,令對方後衛難以防守等等不同組合拍檔。相信不少資深球迷都聽過第一代 SAS舒利亞配瑟頓、黑雙煞約基配高爾、高貝利的黃金組合柏金配及亨利等等出色前鋒組合,當然資深的利物浦球迷亦不會忘記科拿配哥利摩亞、奧雲配希斯基等前鋒組合。

係眾多不同前鋒組合、類型中,傳統出色 Poacher前鋒可謂炙手可熱的前鋒。Poacher前鋒角色主要係係禁區內「捕獵」機會,一般 Poacher前鋒擁有頂尖的把握能力,只要對方後衛一時大意係禁區內沒有好好釘緊 Poacher前鋒,他們就有能力以出色的射門,一腳「射死」對方。要好好防守 Poacher前鋒可謂十分困難,Poacher前鋒走位靈活,往往能夠係適當時間、適當地點出現,昔日的科拿、恩沙基,今日的靴南迪斯、波連尼都係典型的 Poacher前鋒。

Poacher前鋒未必有遠射技術、未必有出色的盤扭技術、未必有出色的二傳能力、未必有速度,主要係禁區內等待機會,以臨門一腳「射死」對方,但係係現今足球場上,這類前鋒係大球會中卻沒有立足之地。



係現今球壇中,不少名帥都喜歡講求防守,摩連奴、賓尼迪斯、高普等都係 451陣式的愛好者,問題係 Poacher前鋒並不適合踢單前鋒。

以摩連奴的 451陣式為例,摩連奴喜歡「步大力雄」的中鋒型前鋒,經典例子如杜奧巴、迪亞高哥斯達。主要原因係杜奧巴擁有出色的控球能力,加上「步大力雄」的帶球能力,幾乎可以以一己之力係反擊時突破對方防線缺口。

相信不少利物浦對全盛時期的費蘭度托利斯依然歷歷在目,當年費蘭度托利斯亦能夠以一己之力係前線突破對方防線,對方中堅要一對一防守費蘭度托利斯可謂非常困難,加上費蘭度托利斯活動範圍頗大,有能力為後上的謝拉特、古治等球員拉開對方防線製造入球機會。




但可惜的係,雖然傳統 Poacher前鋒擁有頂尖把握能力,但卻往往無法為其他球員拉開對方防線、沒有極高的速度、未必有出色的盤扭技術、未必有良好的控球突破能力。對現今強調快速反擊的足球戰術而言,這類前鋒並未符合以上戰術要求,亦係「小豆」靴南迪斯、波連尼等 Poacher前鋒未能係大球會立足的原因。

時也命也,如果科拿、恩沙基遲出生十幾年的話,他們能否依然成為一代傳奇,無人知,但係靴南迪斯、波連尼等 Poacher型前鋒的確未必符合的現代足球對前鋒要求,只可以說像靴南迪斯、波連尼般的 Poacher型前鋒生不逢時。

覺得小弟寫得 ok或想要更多 Liverpool資訊,可以到 fb按個讚支持下啦。
https://www.facebook.com/myheartisredlfc

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • lap_hei
    lap_hei 於 26/07/2015 評論 NO. 1

    其實你由頭到尾都係講波連尼。。。。

  • lintohu
    lintohu 於 27/07/2015 評論 NO. 2

    其實重點係靴南迪斯、波連尼同科拿仲有一大段距離

快捷鍵:←
快捷鍵:→