從筆感想:我的足球時代

特別提示 呢篇文以口語化出品,含粗口成份,反正都係寫自己感想。

今年某些原因,我決定從足總比賽退下來,生涯結束自己球員生涯(笑)。或許性格再一次影響自己道路,同時發覺自己踢開的足球,早就絕跡(變歷史文物啦)。十年或許很長,但無後悔當日選擇。

難以想⋯

細路個陣,老師最鍾意作文一定係問你大個想做甚麼工作?有時答案總是不同。到中學總會有老師灌輸一種唔努力做死一世老麥個啲⋯⋯對於無要求的我,只係想踢波。放工後多時落石地玩波或者同朋友組隊踢比賽。因為朋友介紹,我亦開始接觸草地足球。當接觸十一人足球後,發覺同七人足球難以相,變相要重新學習。接受唔同位置。及後去新組成丙組球隊試訓後加入球隊,算係夢想成真。即使唔係職業。

改變

因為球隊有宗教性質,某程度亦影響我信仰同日後對事睇法。因為有練習下,我亦放棄踢石地比賽,因為不想受傷。

對手

在丙組比賽,遇上不少對手。好像曾經效力甲組、前港腳,及後港超球員都有。最不想面對隊手,一定非老甲或部分超聯球員。假若一整隊老甲加港青的話,到時90分鐘就好飽啦。球員的話,我最喜歡對外籍球員,呢類對手很難遇上。遇上力量形球員,我不會輸蝕。換上速度型,我就頭痛。

通天老倌

自踢石比賽以來,我一直擔任中堅位置。後來開始踢草地初期,我試過二閘為先,到人手不足才有機會擔任中堅。到踢足總的比賽,我一直擔任中堅。後來表現不佳下,被安排到防中位置。坦白說我並不喜歡擔任其他位置,亦証明領隊對你本身所擔任位置表示不滿。後來一段時間我又重回中堅位置,可惜戰術、人選問題,我原本擔任位置又讓出。而我亦選擇另一種嘗試,擔任二閘。防守可以,進攻可免。不過我這類球員,又很快像安全套一樣,用完即棄(笑)。最估唔到係,我亦有用龍門身份出戰兩次。

無緣的升班

每年的升班都會不同,可能升一隊,可能兩隊,甚至四隊。而我在第一隊曾經兩度接近到升班資格,可惜功敗垂成。或者註定無呢種運氣或資格。無法協助球隊升班可能屬可惜的事,但換一個方向睇,唔屬於我既,大概都得不到。即使拎到聯賽亞軍又如何。

爭執

幾時都會出現,只係問題係大定細。在球員時代,總會遇上領隊用人唯親時候,或者找到他喜愛球員時,我大概屬首當其衝。雖然我覺得十分正常,但無人鍾意無故被抽起正選位置,比佢想落場球員擔正,有時我同領隊嘈起來,不過嘈完都無咩結果,態度照舊。記得有次足總盃輸到無聲出,要靠落場隊友去追返,結果真係反勝。之後球員受傷暫停比賽個陣領隊忽然上身講句踢四人防線個陣,我忍唔住講咗句唔駛理佢。結果完場我比人媽到飛起,好彩個陣朋友出聲撐,講返原因。可惜我已經對隊波都心淡。應該話我對個領隊心淡者,反正個陣練波個陣,好多人因為都會選擇性來唔來(或者場地問)。同埋做咗管理層下,見到咁既處事方式好難令人心淡。
重視

半季唔踢個陣,我去咗另一隊跟操。結果係新一季個陣我加盟另一隊。因為老細同領隊比機會我,要報答最簡單方法係,踢好每場波。而我係呢隊波三四球季,有上陣就為球隊博命,就算球隊贏輸都好。而家諗返對老細都好似唔好意思,因為一啲問題,係上個球季季尾到今季,我決定唔踢。

遇著個仆街玩針對

啱啱上一個球季,真係撞著個仆街領隊玩針。記得有一次失球,明明不屬於我的錯,卻在半場公然指責我。完場後老婆忍唔住對我講,佢有無撚病呀,淨係𨳒你一個。我就話,個啲有部分係佢睇住大,唔搵個生面口𨳒,唔通𨳒個熟咩。之後有一場首回合對西貢,一次平常飛剷,球證遲幾秒先吹返轉頭(人地叫到救哂命,隔5秒先吹返⋯⋯最大鑊係,我都無中個佢任何腳部位置),好彩都無咩事發生。不過個屎忽鬼話我落腳狠⋯⋯居然唔係撐自己人反而話我,真係企撚咗係到望住佢,真係想同佢講,你真係痴撚線。結果斷斷續續都上陣十幾場啦,之後有個踢中場舊隊友返來,佢索性將佢放係中堅或者搵其他人踢,都將我安放後備席,結果睇住隊波都幾無癮下,但睇到佢黑哂面就真係忍唔住笑(我好黑心同記仇架)。球季最後一個月索性連比賽練波都唔去。擺明話比佢知,你教我就唔撚踢,反正我唔認為係佢手下仲有出場機會。係我踢足總咁耐,未試過對一個領隊如此反感到我唔去練波同比賽。

傷患

球員最唔想有傷患,不過唔好彩我有一次肌肉撕裂,休息差不多一個月。感覺真係唔好受。除等佢自己好返外,無咩可以做。

隊長

擔任隊長,總會有種責任。唔知其他人點諗,但球隊選你做隊長,証明球隊都信任你(應該)。鞭策自己係一個唔錯做法。(不過苦了身邊隊友)

老將

有時遇到老將,好既會教你點踢,幫你減壓。相反有啲恃老賣老,唔教你點踢只係呼呼大叫,但佢對某啲球員又另一張臉。我有幸遇到幫助我既老將,但鄙視遇上呢類老屎忽。

現在

掛起球靴後,除返工外,都想陪老婆。畢竟佢一直都支持我行落去。至於考唔考牌,都係諗下先。而家應該享受返星期日既優閒,得閒寫下好多時錯字錯資料既文。反正我都係想思考下一步去向。


後記

至於有咩要寫要講,都未諗到。不過我只可以講,係適當時候做適當事,至少係你人生唔會後悔。記住一點,你人生係你,點行係自己決定,並唔係為人而行。

註1:只係本人立場,片面之詞。屬個人意見,如對號入座就係閣下問題。

註2:圖片只供參考。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→