曼聯2800萬鎊爭購多蒙特神鋒，以20萬鎊周薪誘加盟！ 精選

週中歐聯上演大四喜幫助多蒙特以4:1大炒皇馬後，波蘭前鋒利雲度夫斯基下季會去邊度再次成為傳媒炒作既焦點。《太陽報》同《每日郵報》同時透露，一直對利雲度夫斯基好有興趣既費Sir已經命令曼聯盡全力收購呢名24歲射手。
《太陽報》透露，曼聯打算出價2800萬鎊轉會費，外加20萬鎊周薪既5年合約(第一年3800萬鎊)，引誘多蒙特將利雲度夫斯基賣俾曼聯。利雲度夫斯基經理人日前證實，利雲度夫斯基將會係今夏離開多蒙特：「我地已經同一間球會達成協議，佢將會係今夏離隊。」普遍認為，呢間球會正係挖走多蒙特核心古沙既拜仁慕尼黑，而且買利雲度夫斯基既價格只係2000萬鎊。
不過，《太陽報》亦透露，多蒙特私下亦否認將利雲度夫斯基賣俾拜仁既傳聞，並且堅稱佢地唔會將利雲度夫斯基賣俾拜仁，畢竟佢地岩岩先將古沙賣俾死敵，已經令大部份多蒙特球迷不滿。
但《每日郵報》就預測，曼聯已經係呢場爭奪戰中輸咗，雖然多蒙特以4:1大炒皇馬既比賽中，曼聯球探已經係現場見證利雲度夫斯基既神級表現，費Sir一直認為利雲度夫斯基會係今夏加盟曼聯，但哥迪奧拿應承做拜仁領隊後就改變一切，呢名前巴塞隆拿領隊命令佢班同事一定要係多蒙特挖走兩個最好既球員，一個係古沙，另一個就係利雲度夫斯基。而韋斯咸領隊艾拿戴斯就透露一個令人可惜既一幕，佢地曾經有機會係2010年以300萬歐元將利雲度夫斯基帶到去布力般流浪：「我每日見到佢踢波就想買佢返黎，但我說服唔到董事會，當然好多球會都睇中佢，但我地有優勢，因為英超既吸引力，但依家就無可能，係週三既歐聯之後，佢依家身價為4000萬鎊。」