曼聯球探：今夏一定要買佢返黎曼聯！ 精選

據《每日郵報》報導，曼聯首席球探羅拿尋日去到西班牙睇馬體會對格蘭納達既比賽，結果主場作戰既馬體會以5:0大炒對手，法卡奧一人包辦兩球，成為球隊贏波頭號功臣。羅拿對曼聯獵物表現非常滿意，並強烈建議球會今夏要簽佢返黎。
上星期，西媒《馬卡報》爆出猛料，表示曼聯已經為法卡奧俾咗1700萬鎊既預付費。不過，好快英媒就透露費Sir否認買法卡奧，《太陽報》表示，費Sir正努力簽入效力多蒙特既利雲度夫斯基，對於法卡奧只係採取觀望態度，至於所謂既預定金，費Sir表示純粹亂講。
但係曼聯死口唔認幾日，首席球探羅拿就遠赴馬德里考察法卡奧。而上周末同格蘭納達一戰，法卡奧又有好表現，梅開二度之後，法卡奧聯賽入波已經達到24球。見多識廣既羅拿忍唔住力薦法卡奧入魔，不過呢個高效射手肯定大把人爭，車路士同曼城同樣對佢有興趣。

據西媒分析，如果法卡奧真係加盟曼聯，再加上雲佩斯，人馬疊集既前鋒線一定會走人，而朗尼同「小豆」查維亞靴南迪斯就成為重點清洗。最近傳朗尼加盟PSG既新聞就唔提住。如果曼聯一定要簽入法卡奧，咁「小豆」就極有可能離隊。
由於法卡奧既合約包含咗一條4700萬鎊左右既毀約金，再加上「小豆」身價應該唔低於2000萬鎊，所以曼聯極有可能「小豆」折現部份現金，再用多2700萬鎊買法卡奧。值得一提既係，如果法卡奧加盟曼聯，將會對車路士造成打擊，因為之前車路士一度被認為離法卡奧最近既球隊。
另外，任何希望得到法卡奧既球隊需要處理一個第三方協議，前車路士CEO同著名經理人文迪斯成立既經理公司曾幫助馬體會簽入法卡奧，所以佢地會擁有一部份球員既所有權。法卡奧係2011年以4000萬歐元+700萬歐元浮動轉會費既身價由波圖加盟馬體會，短短兩年，呢位哥倫比亞前鋒至今係各項賽事，已經為馬體會攻入56球。