里奧費迪南詐傷鐵證如山！ 精選

里奧費迪南以參加英格蘭比賽會影響佢治療傷勢為理由退出英格蘭大名單，外界質疑里奧費迪南其實並無傷，係費Sir要里奧費迪南退出國家隊，或者係里奧費迪南得登報復鶴臣唔帶佢參加2012歐國盃，而最新既證據顯示，里奧費迪南詐傷既可能性真係好大。因為本周末里奧費迪南將會搭15粒鐘機去中東做評述嘉賓。
值得一提既係，里奧費迪南評述既呢場比賽正正係英格蘭對聖馬力諾既比賽，而且飛到去中東卡塔爾要搭15粒鐘機，係英格蘭呢場世盃外圍賽既3倍，長距離既路程一定會影響球員既健康同狀態，何況里奧費迪南正係以背傷要康復為理由退出英格蘭，據了解，當時里奧費迪南表示康復需要嚴格按照治療計劃、呢兩日都唔可以參加訓練為理由去拒絕鶴臣既召入。
不過，里奧費迪南唔會一直留係卡塔爾直至英格蘭第二場對黑山既比賽，而邀請里奧費迪南既半島電視台CEO則透露里奧費迪南今次黎卡塔爾已經計劃左兩年：「我地已經同里奧費迪南傾左兩年，最後一切終於都傾好，係中東，出名既評述嘉賓每次都好受歡迎，就算佢地講既野要經過翻譯。至於里奧費迪南既身體問題，就要取決於曼聯同佢自己，但卡塔爾既體育設備唔比其他地方差，曼聯就試過係一月黎卡塔爾備戰。」呢句話的確係真，中東既溫暖陽光同先進既體育設備吸引左唔少英超球隊係冬天黎卡塔爾備戰，亦有助一啲傷兵加速康復。