法乙豪門加入朗尼爭奪戰！朗尼告知隊友今夏必走人！ 精選

歐聯被淘汰後，朗尼再次成為曼聯既話題人物，被費Sir放係後備席後，英媒就一直估朗尼今夏會唔會離開。Goal.com近日就獨家透露，朗尼已經同曼聯隊友講今夏會走人。至於朗尼下一站，巴黎聖日耳門、拜仁慕尼黑同摩納哥都有可能。
據Goal.com透露，朗尼想離隊既念頭並唔係同皇馬比賽後先產生，而係早1個月就已經有。今年2月第一個星期國家隊比賽日，朗尼就私下同隊友講，佢今夏有可能離開曼聯。不過，而對愛徒要走既傳聞，費Sir就死口都唔認，主場對車路士既足總盃賽前，費Sir就親口否認朗尼離隊既傳聞，並表示朗尼肯定會留係曼聯。但朗尼知道自己係曼聯既處境，認為自己係球隊既地位正下滑。
如果朗尼今夏真係要走人，咁邊隊最希望可以簽入佢呢？事實上，呢段時期同朗尼傳出傳會傳聞既球隊有好多，包括曼城、巴塞隆拿、拜仁慕尼黑。當然，仲有財大氣粗既巴黎聖日耳門，而最出人意料既爭購者係法乙球隊摩納哥。
所有競爭球隊，巴黎聖日耳門應該係最有希望，之前《太陽報》分析既「朗尼五大下一站」中，巴黎聖日耳門既可能性係最大。因為巴黎聖日耳門老闆承諾會係今夏投入1億鎊既轉會資金，大大增加左引入朗尼既信心同資金。與此同時，可以同伊巴、碧咸、達施華等球星一齊效力，亦係朗尼考慮因素之一。而據《每日星報》報導，法乙球會摩納哥亦對朗尼產生興趣。據了解，摩納哥由前車路士領隊雲尼亞里領軍，球隊目前排係法乙榜首，下季重返法甲既希望極大。另外，摩納哥老闆亦係一個揮金如土既人，今年冬季轉會窗，摩納哥曾差啲簽入碧咸。據了解，摩納哥已經向朗尼承諾會開出高昂轉會費+免稅薪水既條件。