費Sir或以2500萬鎊賣朗尼，購C朗！ 精選

費Sir係歐聯16強次回合對皇馬既大戰中擺朗尼係後備席上，直到73分鐘先至派佢上陣，根本就唔夠時間去力挽狂瀾。為此，朗尼老婆高蓮係Twitter上公開質疑費Sir既決定。

雖然一直聲稱自己唔識足球，但高蓮仲可以由朗尼既神情睇得出佢唔開心，高蓮係Twitter上表示：「好難相信朗尼今晚竟然無正選！」不過，係被其他Twitter用户批評之後，高蓮隨即删除左呢個話，並加左一句：「我唔係太識足球，所以我唔係想講啲咩。我只係想見到我老公係大賽中上陣，希望佢可以上陣比賽。」
而各大英媒都紛紛估朗尼將會係今夏被賣走。《太陽報》指出，有意購入朗尼既買家甚至只需要2500萬鎊就可以帶走佢，兩年半前朗尼曾經因為質疑曼聯雄心而鬧轉會，雖然後來回心轉意簽新合約，但呢家就係曼聯方面打算賣走佢。10年前，碧咸同樣係主場對皇馬既歐聯比賽中做後備，然後係幾個月後就被費Sir賣走。
《太陽報》甚至指出，費Sir打算用賣朗尼既轉會費同騰出既25萬周薪去回購C朗，因為佢認為朗尼已經過左巔峰，呢家既韋碧克比起朗尼更適合搭配雲佩斯，而《太陽報》仲調查左6萬個讀者，其中有55%既人認為朗尼應該係今夏離開曼聯。
而《鏡報》就認為曼聯會係收到3500萬鎊既轉會費先肯賣走27歲既朗尼，朗尼同曼聯既合約係今季後就只會得返兩年，按照正常規則黎講，曼聯會係今季後同佢傾續約，但到個陣費Sir將會聽取包括車路士、曼城同巴黎聖日耳門對佢既報價。但《每日電訊報》同《每日郵報》就一致認為，朗尼呢家既身價只係值2000萬鎊，畢竟雲佩斯上年加盟曼聯既轉會費只不過係2200萬鎊，巴洛迪利轉會至AC米蘭既身價都只係2000萬鎊，顯示依家既轉會費已經唔似以前咁高，而費Sir認為朗尼狀態下降亦係佢決定賣走朗尼既一個關鍵因素。
不過，較為理性既《衛報》就持完全相反既態度，佢地認為朗尼既轉會費可能唔會高，但佢高達25萬鎊既周薪加上其他獎金，朗尼係曼聯每月可以收到30萬鎊，呢個數目並唔係每支歐洲豪門都可以承受到，其中就包括要削減開支以符合歐足聯財致公平競技法則既曼城。