曼聯老將：我想對皇馬個陣正選上陣！雲佩斯：我無大礙！ 精選

曼聯老將傑斯希望佢近期神勇既表現可以打動費Sir，係歐聯主場對皇馬比賽中正選上陣；另外，曼聯作客QPR時，臀部受傷既頭號射手雲佩斯尋日同老婆出去食飯既時候，宣稱傷勢並無大礙。

上輪對QPR既聯賽係傑斯個人生涯第999場比賽，而呢位老將用一個漂亮反越位入波鎖定勝局，為球隊鞏固12分既領先優勢，亦係佢連續兩場英超比賽入波。下星期曼聯將會係主場迎戰皇馬既歐聯次回合萬眾矚目，傑斯希望佢可以用出色表現打動費Sir，正選上陣，首回合佢係班拿貝只係後備上陣。
傑斯表示：「我有咁出色既表現會令到費Sir好頭痛，但係呢件係件好事。我地無向前睇到太遠，亦無興奮過龍。我地既狀態好好，而費Sir有一個龐大既陣容去選擇同做調整，係球季呢個階段，呢點無疑係最重要。」
依家曼聯上下最擔心既係雲佩斯傷勢，佢係上輪對QPR時零角度射門為拉菲爾助攻後，撞上場邊既攝影機，令佢上半場被提前換下。賽後費Sir透露佢臀部受輕傷，而雲佩斯親口承認佢傷勢無大礙。尋日佢同老婆出去食飯時，回答球迷問題佢表示：「我一切都好好，多謝關心。」

英媒表示雲佩斯臀部只係瘀傷，佢會缺席兩至三日既訓練，費Sir有可能俾佢係今周末主場對諾域治既聯賽中休息，以備戰下周中主場對皇馬既比賽。雲佩斯今季已經為曼聯係英超攻入19球，係隊內同聯賽頭號射手，而且上陣次數亦多得驚人，關於佢既傷勢，曼聯好快就會有官方既說法。