文仙尼：我係英超最佳領隊！但只有一數據佔優，點贏費Sir？？ 精選

曼城係足總盃大勝列斯聯之後，文仙尼豪言過去15個月奪得3座獎盃既佢先係英超最佳領隊，回擊佢將被炒既傳出。但係佢既足總盃要追溯到2011年5月，所以過去15個月內佢其實只係攞到英超同社區盾。比較返過去15個月文仙尼同費Sir係英超既成績，費Sir係勝率同入球方面都佔優，佢差既係就係獎盃，上季以得失球劣勢痛失聯賽冠軍肯定令佢好火滾，但今季佢有希望可以爭返呢啖氣。
文仙尼：「過去15個月，我係英格蘭最佳既領隊。有人係過去6個月都話曼城要換領隊，哥迪奧拿會接手，佢決定去拜仁慕尼黑之後，又有新人選。我攞過1座英超冠軍、1座足總盃冠軍同社區盾冠軍，係過去15個月無人可以同我有同樣成就。」
文仙尼講呢番話，好明顯就係無將費Sir放入眼內。上季曼聯罕有地四大皆空，聯賽最後一輪因為得失球差而痛失冠軍。費Sir同一班球員今季都忍住呢度氣，誓要重奪英超冠軍，依家佢地已經拋離曼城12分，重登英超王者寶座好可能只係時間問題。文仙尼就係呢段時間內奪得曼城史上第一座英超冠軍，上年夏天仲擊敗車路士，奪得社區盾冠軍，係文仙尼眼中，獎盃先係衡量英超最佳領隊既標準。佢話過去仲攞埋足總盃冠軍，但佢上次拎足總盃冠軍要追溯到2011年5月，超出15個月既範圍。呢15個月內拎左兩個冠軍仲有一個人，就係前車路士領隊迪馬提奧，迪馬提奧上季短短幾個月就勇奪歐聯同足總盃，效率都超過左文仙尼。
對比返過去15個月文仙尼同費Sir係英超既戰績(2011年11月至今年2月)，費Sir係勝率同入球方面佔優。曼聯同曼城都踢左74場比賽，曼聯52勝，比曼城多出10場；曼聯輸左14場，比曼城少2場；曼聯攻入162球，但坐擁豪華鋒線既曼城只係入左138球；另外，曼城仲係和局高手，一共奪得16場和局，係曼聯既2倍；曼城唯一佔優既係防守，佢地失左73球，比曼聯少10個。曼聯接受左上季既教訓之後，今季雖然失波多，但佢地既得失球已經比曼城多出7個；雙方都輸左3場，但曼城和局多達8個，比曼聯多6場，因此佢地落後曼聯12分。