曼市雙雄、拜仁爭購祖雲達斯3000萬歐元中場

馬羅塔出任祖雲達斯總經理以黎，完成多宗出色收購，其中免費簽入普巴同派路，以及30萬歐元簽入巴沙利等等既低成本交易。相比之下，1050萬歐元簽入維達爾，雖然用左唔小錢，但同樣都係超值引援。
加盟祖雲達斯首季，維達爾就表現出超強既攻守平衡，入球、助攻樣樣精，仲勇奪上季意甲搶截王。今季呢位智利中場愈黎愈搶眼，球季過左一半就已經係各條戰線共攻入9球及交出9球助攻既完美表現，係祖記取得卓越成績既頭號功臣。
樹大招風，成為歐洲一流中場既維達爾，引黎多間豪門既注意。上年夏天，皇馬同拜仁都嘗試過簽入佢，但報價都被斑馬軍拒絕。一波剛平，一波又起，據《都靈體肯報》引用《BBC》同《圖片報》既消息，曼市雙雄正嘗試挖走維達爾，而將會係今夏執教拜仁既哥迪奧拿，亦對佢好有興趣。
《都靈體育報》表示，係祖雲達斯度過左兩季之後，如今既維達爾身價已經達到3000萬歐元，係意甲最有價值球員之一，但呢一個數字對上述三間豪門都唔係問題。而且無論維達爾係曼聯同曼城，定係拜仁，能攻擅守既維達爾都有做主力既能力，亦係呢三間豪門睇中佢既原因。雖然目前祖雲達斯仲未收到正式報價，但該報認為三間豪門已經開始接觸祖記高層，將會為維達爾開出3000萬歐元或更高既報價。上年收到類似報價個陣，馬羅塔以「祖記唔賣冠軍球員」為理由拒絕，唔知今夏情況又會係點呢？《足球市場》透露，包括領隊干地在內既一班決策層，已經動左出售維達爾既念頭。首次從技術層面黎睇，維達爾係祖雲達斯既地位無需多講，但成長神速既普巴，令干地有左送走智利中場既念頭。更重要既係，祖雲達斯財力有限，夢寐以求既頂級射手遲遲未有。若果可以用3000萬歐元以上既價格賣走維達爾，斑馬軍唔單止可以有2000萬歐元既資金，而且仲可以籌集到購買前鋒所需既資金。雖然維達爾已經成為祖雲達斯既重要一員，但為左進一步提升球隊整體實力，犧牲維達爾已經係馬羅搭最低損失，而著重培養普巴同堅持留住馬朗尼，或者係干地為後維達爾時代必要準備。